'പെൻഷൻ വാങ്ങി ജീവിക്കാൻ അനുവദിക്കില്ല'; പോലീസ് ഉദ്യോഗസ്ഥൻ നേരെ ഭീഷണിയുമായി അർജുൻ ആയങ്കിയുടെ ഫേസ്ബുക്ക് പോസ്റ്റ്
അര്ജുന് ആയങ്കിയെ കോതമംഗലം റിസോര്ട്ടില് നിന്നും കസ്റ്റഡിയിലെടുത്ത സര്ക്കിള് ഇന്സ്പെക്ടര്ക്കെതിരെയാണ് ഭീഷണി സന്ദേശം അയച്ചിരിക്കുന്നത്
കോഴിക്കോട്: പോലീസ് ഉദ്യോഗസ്ഥന് നേരെ നിരവധി ക്രിമിനൽ കേസുകളിലെ പ്രതിയായ അർജുൻ ആയങ്കിയുടെ ഭീഷണിപ്പെടുത്തി കൊണ്ട് ഫേസ്ബുക്ക് പോസ്റ്റ്. പെൻഷൻ വാങ്ങി ജീവിക്കാൻ അനുവദിക്കില്ല എന്നാണ് ഭീഷണി. അര്ജുന് ആയങ്കിയെ കോതമംഗലം റിസോര്ട്ടില് നിന്നും കസ്റ്റഡിയിലെടുത്ത സര്ക്കിള് ഇന്സ്പെക്ടര്ക്കെതിരെയാണ് ഭീഷണി സന്ദേശം അയച്ചിരിക്കുന്നത്. 'ഞങ്ങളനുഭവിച്ച ഈ നിയമവിരുദ്ധ അധികാര ദുര്വിനിയോഗ പ്രതികാര നടപടി ഇനിയൊരാള്ക്കും നേരിടേണ്ടി വരരുത്. നിന്നെപ്പോലുള്ള കാക്കിയിട്ട ചെന്നായ്ക്കളെ നിയമപരമായും, പോലീസ് ബുദ്ധിയില് നിയമത്തിന്റെ കണ്ണിപൊട്ടിച്ച് രക്ഷപ്പെട്ടാല് കായികപരമായും നേരിടാന് ഞങ്ങള് തയ്യാര്. നീയും നിന്റെ ഡിപ്പാര്ട്ട്മെന്റും ഭരണപാര്ട്ടിയുടെ ഒത്താശയോടെ ഇനിയുമെന്നെ ദ്രോഹിക്കുമെന്നെനിക്കറിയാം. യുദ്ധപ്രഖ്യാപനം നീയടങ്ങുന്ന സിസ്റ്റത്തിനെതിരെയല്ല, ഈ സിസ്റ്റത്തിലെ കൈക്കൂലിയും കൂട്ടിക്കൊടുപ്പും കൊട്ടേഷനും നടത്തി ചിരിച്ചുകൊണ്ട് നിരപരാധികളുടെ ജീവിതം നശിപ്പിക്കുന്ന പുഴുകുത്തുകളായ നിന്നെപോലുള്ള ക്രിമിനലുകള്ക്കെതിരെയാണ്', എന്നും ഫേസ്ബുക്കിൽ പോസ്റ്റിൽ പറയുന്നു.
വിവാഹച്ചടങ്ങില് പങ്കെടുക്കാനെത്തിയപ്പോള് പുന്നേക്കാടുള്ള റിസോര്ട്ടില് വെച്ചായിരുന്നു കോതമംഗലം പൊലീസ് അര്ജുന് ആയങ്കിയെയും സുഹൃത്തുക്കളെയും കസ്റ്റഡിയിലെടുത്തത്. ഇതിന് മറുപടിയെന്നോണം ആണ് ഇപ്പോൾ പോലീസ് ഉദ്യോഗസ്ഥനെ ഭീഷണിപ്പെടുത്തി കൊണ്ടുള്ള ഫേസ്ബുക്ക് പോസ്റ്റ് വന്നിരിക്കുന്നത്.
