മാസപ്പടി കേസ്: അന്വേഷണം നിയമപരമായ ബാധ്യത; രാഷ്ട്രീയ വേട്ടയാടലില്ലെന്ന് വി.ഡി. സതീശൻ

തിരുവനന്തപുരം: മാസപ്പടി കേസിലെ തുടർ അന്വേഷണവുമായി ബന്ധപ്പെട്ട് സർക്കാരിന്റെ നിലപാട് വ്യക്തമാക്കി മുഖ്യമന്ത്രി വി.ഡി. സതീശൻ. അന്വേഷണ നടപടികളിൽ രാഷ്ട്രീയ വേട്ടയാടലോ പ്രതികാരബുദ്ധിയോ സർക്കാരിനില്ലെന്നും, ലഭിച്ച നിയമോപദേശത്തിന്റെയും സുപ്രീം കോടതി വിധികളുടെയും അടിസ്ഥാനത്തിൽ നിയമപരമായ നടപടികൾ മാത്രമാണ് സ്വീകരിക്കുന്നതെന്നും അദ്ദേഹം പറഞ്ഞു.

എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി.) കൈമാറുന്ന വിവരങ്ങൾ കേരള പൊലീസിന് ലഭിച്ചാൽ അന്വേഷണം നടത്തേണ്ടത് നിയമപരമായ ബാധ്യതയാണെന്ന് സതീശൻ വ്യക്തമാക്കി. എന്നാൽ നേരിട്ട് എഫ്.ഐ.ആർ രജിസ്റ്റർ ചെയ്യാതെ ആദ്യം പ്രാഥമിക പരിശോധന നടത്തണമെന്നാണ് സുപ്രീം കോടതി നിർദേശമെന്നും അദ്ദേഹം ചൂണ്ടിക്കാട്ടി.

വിഷയത്തിൽ സർക്കാരിന് യാതൊരു എടുത്തുചാട്ടവുമില്ലെന്നും ലഭിച്ച നിയമോപദേശത്തിൽ സുപ്രീം കോടതി വിധികൾ ഉൾപ്പെടെയുള്ള കാര്യങ്ങൾ വ്യക്തമായി പരാമർശിച്ചിട്ടുണ്ടെന്നും മുഖ്യമന്ത്രി പറഞ്ഞു. അതിനാൽ അന്വേഷണം നടത്തുന്നത് രാഷ്ട്രീയ ലക്ഷ്യത്തോടെയല്ലെന്നും നിയമപരമായ ബാധ്യത നിറവേറ്റുന്നതിന്റെ ഭാഗമാണെന്നും അദ്ദേഹം വ്യക്തമാക്കി.

അതേസമയം, കേരളപ്പിറവിയുടെ 70-ാം വാർഷികത്തിന്റെ ഭാഗമായി ‘ഫെസ്റ്റിവൽ കേരള’ എന്ന പേരിൽ സംസ്ഥാനത്തുടനീളം വിപുലമായ പരിപാടികൾ സംഘടിപ്പിക്കാനും തീരുമാനിച്ചു. വയോജന ക്ഷേമ വകുപ്പിന്റെ പേര് ‘മുതിർന്ന പൗരന്മാർക്കുള്ള വകുപ്പ്’ എന്നാക്കി പുനർനാമകരണം ചെയ്യാനും മന്ത്രിസഭ തീരുമാനിച്ചു.

സംസ്ഥാനത്ത് വർധിച്ചുവരുന്ന റോഡപകടങ്ങൾ കുറയ്ക്കുന്നതിനായി ഗതാഗത വകുപ്പിന്റെ നേതൃത്വത്തിൽ വിവിധ വകുപ്പുകളെ ഏകോപിപ്പിച്ച് ശക്തമായ ബോധവൽക്കരണവും തുടർനടപടികളും സ്വീകരിക്കും.

നിലവിലെ ലോക കേരള സഭ പിരിച്ചുവിടാനും, പ്രവാസികൾക്കായി കൂടുതൽ ഫലപ്രദമായ പുതിയ ബദൽ സംവിധാനം കൊണ്ടുവരാനും തീരുമാനിച്ചതായും മുഖ്യമന്ത്രി അറിയിച്ചു.