ട്രംപിന് ജ്ഞാനേഷിനെ വേണം! അമേരിക്കൻ തിരഞ്ഞെടുപ്പിലെ തിരിച്ചടിയിൽ പരിഹാസവുമായി സോഷ്യൽ മീഡിയ

ന്യൂഡൽഹി: അമേരിക്കൻ ഇടക്കാല തിരഞ്ഞെടുപ്പിൽ പ്രസിഡന്റ് ഡൊണാൾഡ് ട്രംപിന്റെ റിപ്പബ്ലിക്കൻ പാർട്ടിക്കേറ്റ കനത്ത തിരിച്ചടിക്കു പിന്നാലെ ഇന്ത്യയിൽ സമൂഹമാധ്യമങ്ങളിൽ പരിഹാസപ്പെരുമഴ. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെ പരാമർശിച്ചുള്ള ട്രോളുകളാണ് വ്യാപകമായി പ്രചരിക്കുന്നത്.

'ട്രംപ് സാഹിബ്, ഗ്യാനേഷിനെ കൂടെക്കൂട്ടിയിരുന്നെങ്കിൽ ഇന്ന് ഈ ദിവസം കാണേണ്ടിവരില്ലായിരുന്നു' എന്നായിരുന്നു കോൺഗ്രസ് മാധ്യമവിഭാഗം മേധാവി പവൻ ഖേരയുടെ പരിഹാസം.

പ്രധാനമന്ത്രി നരേന്ദ്രമോദിയെ ലക്ഷ്യമിട്ട് അഭിഭാഷകനും ആക്ടിവിസ്റ്റുമായ പ്രശാന്ത് ഭൂഷണും രംഗത്തെത്തി. 'സുഹൃത്തേ, ഗ്യാനേഷിനെ അയക്കാൻ കഴിയാത്തതിൽ ക്ഷമിക്കണം. ആദ്യം എനിക്ക് തന്നെ അദ്ദേഹത്തെ ആവശ്യമായിരുന്നു' എന്ന രീതിയിലായിരുന്നു അദ്ദേഹത്തിന്റെ പരിഹാസം.

'ട്രംപിന് ഇപ്പോൾ ഗ്യാനേഷിനെയാണ് ഏറ്റവും ആവശ്യം', 'ഗ്യാനേഷ് കുമാർ ഉണ്ടായിരുന്നെങ്കിൽ ട്രംപിന് ഈ തോൽവി സംഭവിക്കില്ലായിരുന്നു', 'അമേരിക്കയിലെ തിരഞ്ഞെടുപ്പ് നടത്താൻ ഗ്യാനേഷിനെ അയക്കണം' തുടങ്ങിയ കുറിപ്പുകളും മീമുകളും സമൂഹമാധ്യമങ്ങളിൽ വൈറലായി.

ഇന്ത്യയിലെ വോട്ടർപട്ടിക പരിഷ്കരണവുമായി ബന്ധപ്പെട്ട എസ്.ഐ.ആർ വിവാദവും 'വോട്ട് ചോരി' ആരോപണങ്ങളുമാണ് അമേരിക്കൻ തിരഞ്ഞെടുപ്പ് ഫലവുമായി ബന്ധപ്പെടുത്തി ട്രോളുകൾക്ക് ആധാരമായത്. ഗ്യാനേഷ് കുമാർ ഭരണകക്ഷിക്ക് അനുകൂലമായി പ്രവർത്തിച്ചെന്ന പ്രതിപക്ഷ ആരോപണങ്ങളും അദ്ദേഹത്തിന്റെ രാജി ആവശ്യവും ഇതോടെ വീണ്ടും ചർച്ചയായി. ആരോപണങ്ങൾ ഭരണപക്ഷം നിഷേധിക്കുന്നുണ്ട്.

അതിനിടെ, അമേരിക്കയിൽ ടെക്സസ്, ജോർജിയ, അയോവ തുടങ്ങിയ റിപ്പബ്ലിക്കൻ ശക്തികേന്ദ്രങ്ങളിൽ ഡെമോക്രാറ്റുകൾ നേടിയ മുന്നേറ്റവും കോൺഗ്രസ് ഉൾപ്പെടെയുള്ള രാഷ്ട്രീയ സംവിധാനങ്ങളിലെ അധികാരമാറ്റവും ട്രംപിന് വലിയ തിരിച്ചടിയായി. ട്രംപിന്റെ നയങ്ങളോടുള്ള ജനരോഷമാണ് പരാജയത്തിന് കാരണമായതെന്നാണ് വിലയിരുത്തൽ.

അമേരിക്കൻ തിരഞ്ഞെടുപ്പ് ഫലം ആഗോള രാഷ്ട്രീയത്തിൽ ചർച്ചയാകുമ്പോൾ ഇന്ത്യയിലെ തിരഞ്ഞെടുപ്പ് വിവാദങ്ങളെ ബന്ധപ്പെടുത്തി ട്രംപിനെയും ഗ്യാനേഷ് കുമാറിനെയും ഒരുമിച്ച് പരിഹസിക്കുകയാണ് സോഷ്യൽ മീഡിയ.