മുൻകൂട്ടി പറയാതെ പൂട്ടി; കൊച്ചിയിലും കോഴിക്കോട്ടും 'കോറോഹെൽത്ത്' ജീവനക്കാരെ തെരുവിലിറക്കി! ഒടുവിൽ മന്ത്രി ഇടപെട്ടു, നടപടി മരവിപ്പിച്ചു

കൊച്ചി: യുഎസിലെ ടെക്സസ് ആസ്ഥാനമായി പ്രവർത്തിക്കുന്ന പ്രമുഖ മെഡിക്കൽ കോഡിങ് കമ്പനിയായ ‘കോറോഹെൽത്ത്’ (CorroHealth) കേരളത്തിലെ ഓഫിസുകൾ പൂട്ടി എണ്ണൂറോളം ജീവനക്കാരെ അപ്രതീക്ഷിതമായി പിരിച്ചുവിട്ടു. കൊച്ചി പാലാരിവട്ടം ഓഫിസിലെ അറുന്നൂറോളം ജീവനക്കാരെയും കോഴിക്കോട് ഓഫിസിലെ ഇരുനൂറോളം പേരെയുമാണ് ഒരു മുന്നറിയിപ്പും കൂടാതെ ഒരൊറ്റ ദിവസം കൊണ്ട് ജോലിയിൽ നിന്ന് ഒഴിവാക്കിയത്.

രാവിലെ പതിവുപോലെ ജോലിക്ക് എത്തിയപ്പോഴാണ് തങ്ങളുടെ ഓഫിസുകൾ അടച്ചുപൂട്ടിയ വിവരവും സിസ്റ്റം ലോഗ് ഔട്ട് ചെയ്യാനുള്ള നിർദ്ദേശവും ജീവനക്കാർ അറിയുന്നത്. ഓഫിസിൽ പെട്ടെന്ന് ഒരുക്കിയ അനൗൺസ്‌മെന്റിലൂടെ ‘ഇന്ന് നിങ്ങളുടെ അവസാനത്തെ ദിവസമാണ്’ എന്ന് കമ്പനി അധികൃതർ പ്രഖ്യാപിക്കുകയായിരുന്നു. കമ്പനിയുടെ ചിഹ്നങ്ങളോ സീലോ പോലുമില്ലാത്ത വെറും വെള്ള പേപ്പറിലാണ് പിരിച്ചുവിട്ടുകൊണ്ടുള്ള കത്ത് ജീവനക്കാർക്ക് നൽകിയത്.

കേരളത്തോടുള്ള കടുംവെട്ട്; ഉത്തർപ്രദേശിലും ഹൈദരാബാദിലും പുതിയ നിയമനം

കേരളത്തിലെ കടുപ്പമേറിയ തൊഴിൽ നിയമങ്ങൾ പാലിക്കുന്നതിനോടും, ഓവർടൈം അടക്കമുള്ള അധിക ജോലികൾക്ക് കൃത്യമായ വേതനം നൽകണമെന്ന വ്യവസ്ഥയോടുമുള്ള കമ്പനിയുടെ എതിർപ്പാണ് ഈ കൂട്ടപ്പിരിച്ചുവിടലിന് പിന്നിലെന്ന് ജീവനക്കാർ ആരോപിക്കുന്നു. കേരളത്തിൽ പ്രതിസന്ധി പറഞ്ഞ് ഓഫിസുകൾ പൂട്ടുമ്പോഴും, കമ്പനി ഉത്തർപ്രദേശിലും ഹൈദരാബാദിലും പുതിയ നിയമനങ്ങൾ നടത്തുന്നുണ്ടെന്നും ജീവനക്കാർ ചൂണ്ടിക്കാണിക്കുന്നു. മുന്നോട്ടു നടത്തിക്കൊണ്ടു പോകാൻ സാധിക്കാത്തതിനാലാണ് പിരിച്ചുവിടലെന്നാണ് കമ്പനിയുടെ ഔദ്യോഗിക ന്യായം.

എം.എൽ.എയും ലേബർ ഓഫിസറും തെരുവിലേക്ക്; മന്ത്രിയുടെ ഇടപെടൽ

പെട്ടെന്നുള്ള കൂട്ടപ്പിരിച്ചുവിടലിനു പിന്നാലെ കൊച്ചി ഓഫിസിന് മുന്നിൽ ജീവനക്കാർ ശക്തമായ പ്രതിഷേധവുമായി രംഗത്തെത്തി. വിവരമറിഞ്ഞ് തൃക്കാക്കര എം.എൽ.എ ഉമ തോമസും ജില്ലാ ലേബർ ഓഫിസറും സ്ഥലത്തെത്തി ജീവനക്കാരുമായും കമ്പനി പ്രതിനിധികളുമായും ചർച്ച നടത്തി.

തുടർന്ന് എം.എൽ.എ സംസ്ഥാന തൊഴിൽമന്ത്രിയുമായി ബന്ധപ്പെട്ടതിനെത്തുടർന്ന് വിഷയം പരിശോധിക്കാൻ തൊഴിൽ വകുപ്പ് ഉന്നതതല യോഗം വിളിക്കുകയായിരുന്നു. ഇതോടെ തിങ്കളാഴ്ച (ജൂലൈ 6) വരെ പിരിച്ചുവിടൽ നടപടികൾ താൽക്കാലികമായി മരവിപ്പിക്കാനും തൽസ്ഥിതി തുടരാനും കമ്പനി സമ്മതിച്ചു. തിങ്കളാഴ്ച തൊഴിൽ വകുപ്പ് സെക്രട്ടറിയുടെ സാന്നിധ്യത്തിൽ നടക്കുന്ന ഈ നിർണായക യോഗത്തിൽ കമ്പനിയുടെ മുതിർന്ന മാനേജ്‌മെന്റ് പ്രതിനിധികൾ പങ്കെടുക്കും.

ആവശ്യങ്ങളിൽ ഉറച്ച് ജീവനക്കാർ

നിലവിൽ മൂന്ന് മാസത്തെ ശമ്പളമാണ് നഷ്ടപരിഹാരമായി കമ്പനി വാഗ്ദാനം ചെയ്യുന്നത്. എന്നാൽ ഇത് അപര്യാപ്തമാണെന്നും ചുരുങ്ങിയത് 10 മാസത്തെ ശമ്പളമെങ്കിലും നഷ്ടപരിഹാരമായി വേണമെന്നുമാണ് ജീവനക്കാരുടെ ആവശ്യം.

പിരിച്ചുവിടൽ ഉത്തരവ് പൂർണമായും പിൻവലിച്ച് തങ്ങളെ ജോലിയിൽ തിരിച്ചെടുക്കണമെന്നാണ് ജീവനക്കാരുടെ പ്രധാന ആവശ്യം. തൊഴിൽ നിലനിർത്താൻ ആവശ്യമാണെങ്കിൽ ശമ്പള ഘടനയിൽ മാറ്റം വരുത്തുന്നതിനെക്കുറിച്ച് ചർച്ച ചെയ്യാൻ തയ്യാറാണെന്നും അവർ അറിയിച്ചിട്ടുണ്ട്. എന്നാൽ കമ്പനി പിരിച്ചുവിടലുമായി തന്നെ മുന്നോട്ട് പോകാനാണ് ഭാവമെങ്കിൽ അർഹിക്കുന്ന കൃത്യമായ നഷ്ടപരിഹാരം നൽകണമെന്ന നിലപാടിലാണ് ജീവനക്കാർ. തിങ്കളാഴ്ച നടക്കുന്ന ചർച്ച കേരളത്തിലെ എണ്ണൂറോളം ഐടി/മെഡിക്കൽ കോഡിങ് ജീവനക്കാരുടെ ഭാവി നിർണ്ണയിക്കും.