പോയല്ലോ അച്ഛാ..." ജീവൻ രക്ഷിക്കാൻ സ്വന്തം ജീവൻ നൽകിയ രാജേഷിന് കണ്ണീരോടെ വിട
പ്രളയജലത്തിൽ കുടുങ്ങിയ ഒരാളെ രക്ഷിച്ച ശേഷം ഒഴുക്കിൽപ്പെട്ട് മരണം; അച്ഛന്റെ ചേതനയറ്റ ശരീരം കണ്ട് മക്കളുടെ നിലവിളി നാടിനെ കണ്ണീരിലാഴ്ത്തി.
Desk Mediagraamam 
തലക
കണ്ണൂർ: പ്രളയജലത്തിൽ അകപ്പെട്ട ഒരാളെ രക്ഷിക്കുന്നതിനിടെ സ്വന്തം ജീവൻ ബലിയർപ്പിച്ച രാജേഷിന്റെ വേർപാടിൽ കണ്ണീരിലാണ് നാട്. ഓഗസ്റ്റ് 1-ന് വൈകിട്ട് അഞ്ചോടെയായിരുന്നു ദാരുണ സംഭവം.
മീന്തുള്ളി തുരുത്തിൽ ഒരാൾ കുടുങ്ങിക്കിടക്കുന്നതായി വിവരം ലഭിച്ചതിനെ തുടർന്ന് രാജേഷും സുഹൃത്ത് മനുവും സ്ഥലത്തെത്തി. മോട്ടോർ സ്ഥാപിക്കാൻ പോയ ബെന്നി അപ്രതീക്ഷിതമായി ഉയർന്ന പ്രളയജലത്തിൽ കുടുങ്ങുകയായിരുന്നു. കഴുത്തോളം വെള്ളത്തിൽ മുങ്ങിയ ബെന്നി ഒരു തെങ്ങിൽ പിടിച്ചുനിന്ന നിലയിലായിരുന്നു.
അതിസാഹസികമായി ബെന്നിയുടെ അടുത്തെത്തിയ രാജേഷ്, തന്റെ ലൈഫ് ജാക്കറ്റ് അഴിച്ച് ബെന്നിയെ ധരിപ്പിക്കുകയും സുരക്ഷിതമായി കരയിലെത്തിക്കുകയും ചെയ്തു. തുടർന്ന് റോപ്പിന്റെ സഹായത്തോടെ പുഴ മുറിച്ചുകടക്കാൻ ശ്രമിക്കുന്നതിനിടെ ശക്തമായ ഒഴുക്കിൽ രാജേഷ് അകപ്പെടുകയായിരുന്നു. സുഹൃത്ത് മനു രക്ഷിക്കാൻ ശ്രമിച്ചെങ്കിലും റോപ്പിലെ പിടിവിട്ട് രാജേഷ് വെള്ളത്തിൽ മുങ്ങിപ്പോയി.
പിന്നീട് നടത്തിയ തിരച്ചിലിൽ രാജേഷിന്റെ മൃതദേഹം കണ്ടെത്തി തിരുവനന്തപുരത്തെ വീട്ടിലെത്തിച്ചു. അവസാനമായി അച്ഛനെ ഒരുനോക്ക് കാണാൻ എത്തിയ മക്കൾ, "പോയല്ലോ അച്ഛാ..." എന്ന് പൊട്ടിക്കരഞ്ഞ നിമിഷം അവിടെയുണ്ടായിരുന്നവരുടെ കണ്ണുകളും നിറഞ്ഞു.
ഭാര്യയും രണ്ട് മക്കളും അച്ഛനും അമ്മയും ഉൾപ്പെടുന്ന കുടുംബത്തിന്റെ ഏക ആശ്രയമായിരുന്ന രാജേഷിന്റെ വേർപാട് നാടാകെ ദുഃഖത്തിലാഴ്ത്തിയിരിക്കുകയാണ്.
