പി.എസ്.സി ഉന്നതർക്ക് ഇനി ‘കവച’മില്ല; ചോദ്യം ചെയ്യലിന് ഹാജരാകണമെന്ന് ക്രൈംബ്രാഞ്ച്

കുറ്റകൃത്യം ചെയ്തവൻ ആരായാലും, അവൻ ഭരണഘടനാ സ്ഥാപനത്തിന്റെ ഏറ്റവും ഉയർന്ന കസേരയിലാണ് ഇരിക്കുന്നതെങ്കിലും നിയമത്തിന് മുന്നിൽ വെറുമൊരു കുറ്റവാളി മാത്രമാണ്! 'ഞങ്ങൾ രാജാക്കന്മാരാണ്, സ്വതന്ത്ര കമ്മീഷനാണ്, ഞങ്ങളെ തൊടാൻ ആർക്കും അധികാരമില്ല' എന്ന അഹങ്കാരത്തോടെ ചോദിക്കാൻ പോകുന്നവരുടെ മുഖത്തുനോക്കി ചിരിച്ചുകൊണ്ട് നിന്നവർക്ക് ഒടുവിൽ ആ സത്യം തിരിച്ചറിയേണ്ടി വന്നിരിക്കുന്നു. സ്വന്തക്കാർക്കും വീട്ടുകാർക്കും തങ്ങളുടെ വണ്ടിയുടെ ഡ്രൈവറുടെ ഭാര്യയുടെ അനിയന് വരെ പിൻവാതിൽ വഴി ജോലി തട്ടിക്കൊടുത്ത് തടിച്ചുകൊഴുത്ത പി.എസ്.സി ഉന്നതന്മാരെ തേടി ഒടുവിൽ അന്വേഷണസംഘം എത്തുമ്പോൾ കേൾക്കുന്നത് കേവലം ഒരു തർക്കത്തിന്റെ വാർത്തയല്ല, മറിച്ച് അഴിമതിക്കാരെ നിയമത്തിന് മുന്നിൽ മുട്ടുകുത്തിക്കുന്നതിന്റെ കഥയാണ്. 'ഞങ്ങൾ അങ്ങോട്ട് വരില്ല, വേണമെങ്കിൽ അന്വേഷണ ഉദ്യോഗസ്ഥർ ഇങ്ങോട്ട് വരട്ടെ' എന്ന് ശാഠ്യം പിടിച്ച് ഉയർന്ന കസേരയുടെ തണലിൽ ഒളിക്കാൻ നോക്കിയവർക്ക് ഭരണഘടനയും നിയമവും നൽകിയ ആഘാതമാണ് ഇപ്പോൾ കേരളം കാണുന്നത്. പി.എസ്.സി ചെയർമാൻ എം.ആർ. ബൈജു ഉൾപ്പെടെയുള്ള ഉന്നതരോട് ചോദ്യം ചെയ്യലിനായി ക്രൈംബ്രാഞ്ച് ആസ്ഥാനത്ത് ഹാജരാകാനായിരുന്നു അന്വേഷണ സംഘത്തിന്റെ കർശന നിർദേശം. എന്നാൽ നാല് കമ്മീഷൻ അംഗങ്ങൾക്ക് ഈ മാസം 15 മുതൽ ഹാജരാകാൻ ആവശ്യപ്പെട്ട് നോട്ടീസ് നൽകിയപ്പോൾ ഭരണഘടനാ സ്ഥാപനത്തിന്റെ പെരുമ പറഞ്ഞ് ഒഴിയാനാണ് അവർ ശ്രമിച്ചത്. നിയമസഭാ പെറ്റീഷൻ കമ്മിറ്റി വിളിച്ചപ്പോൾ കമ്മീഷൻ സെക്രട്ടറി നേരിട്ട് ഹാജരാകേണ്ടതില്ലെന്ന മുൻ ഹൈക്കോടതി ഉത്തരവ് വരെ ചൂണ്ടിക്കാട്ടി ഒളിച്ചോടാൻ നോക്കിയവർക്ക് മുന്നിലാണ് ക്രൈംബ്രാഞ്ചിന്റെ കണിശമായ അടുത്ത നീക്കം എത്തിയത്.

അധികാരത്തിന്റെ തണലിൽ എന്തും കാട്ടിക്കൂട്ടാമെന്ന പി.എസ്.സി ഉന്നതരുടെ ധാർഷ്ട്യത്തിന് ഈ യു.ഡി.എഫ് സർക്കാർ കൃത്യമായ മറുപടിയാണ് നൽകുന്നത്. ഈ സർക്കാരിന്റെ കാലത്ത് പിൻവാതിൽ നിയമനങ്ങളോ, അഴിമതിയോ, സ്വജനപക്ഷപാതമോ നടക്കില്ലെന്നും, അത് നടത്താൻ ശ്രമിക്കുന്ന തലതൊട്ടപ്പന്മാർ ഏത് കൊമ്പത്തിരിക്കുന്നവരായാലും അവരെ നിയമത്തിന് മുന്നിൽ കൊണ്ടുവരുമെന്നുമുള്ള വ്യക്തമായ സന്ദേശമാണ് ആസൂത്രണ ബോർഡ് പരീക്ഷാക്രമക്കേടിലെ ഈ കടുത്ത നിലപാടിലൂടെ വെളിപ്പെടുന്നത്. തങ്ങൾക്ക് പ്രത്യേക പരിഗണനയുണ്ടെന്ന പി.എസ്.സിയുടെ വാദം പൊളിച്ചുകൊണ്ട് ക്രൈംബ്രാഞ്ച് തേടിയ വിശദമായ നിയമോപദേശം പുറത്തുവന്നതോടെ കളി പൂർണ്ണമായും മാറി. ക്രിമിനൽ അന്വേഷണവുമായി ബന്ധപ്പെട്ട് പി.എസ്.സി അംഗങ്ങൾക്ക് യാതൊരുവിധ പ്രത്യേക നിയമപരിരക്ഷയുമില്ലെന്നും, അന്വേഷണ ഉദ്യോഗസ്ഥർ നിർദേശിക്കുന്ന സ്ഥലത്ത് ഹാജരായി മൊഴി നൽകാൻ അവർ ബാധ്യസ്ഥരാണെന്നും നിയമോപദേശം വ്യക്തമാക്കി. പി.എസ്.സി ആസ്ഥാനത്തെത്തി മൊഴിയെടുക്കേണ്ടതില്ലെന്നും ക്രൈംബ്രാഞ്ച് ഓഫീസിലോ അന്വേഷണ സംഘം ആവശ്യപ്പെടുന്നയിടത്തോ വരണമെന്നും നിയമോപദേശം വന്നതോടെയാണ് പി.എസ്.സിയുടെ എല്ലാ കണക്കുകൂട്ടലുകളും തെറ്റിയത്. ഒടുവിൽ മറ്റ് വഴികളില്ലാതെ പ്രത്യേക അന്വേഷണ സംഘം വീണ്ടും നോട്ടീസ് നൽകാൻ ഒരുങ്ങിയതോടെ തങ്ങളുടെ വിറയ്ക്കുന്ന കാലുകൾ മറയ്ക്കാനും ചോദ്യം ചെയ്യലിൽ നിന്ന് രക്ഷപ്പെടാനും ഹൈക്കോടതിയിലേക്ക് ഓടേണ്ട അവസ്ഥയിലായി പി.എസ്.സി ഉന്നതർ.

വർഷങ്ങളായി ആയിരക്കണക്കിന് സാധാരണക്കാരായ ഉദ്യോഗാർത്ഥികളുടെ സ്വപ്നങ്ങൾ തല്ലിക്കെടുത്തി അഴിമതി നടത്തിയവരെ വെറുതെ വിടാൻ ഈ ഭരണം തയ്യാറല്ല. ഭരണഘടനാ സ്ഥാപനമെന്ന പദവി ചൂണ്ടിക്കാട്ടി ക്രിമിനൽ അന്വേഷണത്തിൽ നിന്ന് പരിരക്ഷ ആവശ്യപ്പെടാനാകില്ലെന്ന സത്യം തിരിച്ചറിഞ്ഞിട്ടും, ആസൂത്രണ ബോർഡ് പരീക്ഷാക്രമക്കേടിൽ ഉയർന്ന ഗുരുതര ആരോപണങ്ങളിൽ നിന്ന് തലയൂരാനാണ് അവർ നെട്ടോട്ടമോടുന്നത്. പി.എസ്.സി അംഗങ്ങൾ ചോദ്യം ചെയ്യലിന് ഹാജരാകേണ്ടതില്ലെന്ന നിലപാടിനെ ശക്തമായി വിമർശിച്ച മുഖ്യമന്ത്രി വി.ഡി. സതീശൻ, ക്രിമിനൽ അന്വേഷണത്തിൽ പി.എസ്.സി ചെയർമാനോ അംഗങ്ങൾക്കോ പ്രത്യേക പരിരക്ഷയില്ലെന്ന് തുറന്നടിച്ചതോടെ ഈ പോരാട്ടം പുതിയൊരു ഘട്ടത്തിലേക്ക് കടന്നിരിക്കുകയാണ്. പി.എസ്.സി ആസ്ഥാനത്തെത്തി മൊഴിയെടുക്കണമെന്ന ആവശ്യവും തള്ളി നിയമോപദേശത്തിന്റെ അടിസ്ഥാനത്തിൽ ക്രൈംബ്രാഞ്ച് മുന്നോട്ട് പോകുമ്പോൾ, ചോദ്യം ചെയ്യലിനെതിരെ ഹൈക്കോടതിയെ സമീപിച്ച പി.എസ്.സിയും അന്വേഷണ സംഘവും തമ്മിലുള്ള തർക്കം ഒരു വമ്പൻ നിയമപോരാട്ടമായി മാറിയിരിക്കുന്നു. അഴിമതി വെച്ചുപൊറുപ്പിക്കില്ലെന്ന നിശ്ചയദാർഢ്യത്തോടെ യു.ഡി.എഫ് സർക്കാർ മുന്നോട്ടുപോകുമ്പോൾ, ഭരണഘടനാ കവചവും വെച്ച് അഴിമതി മറയ്ക്കാൻ നോക്കിയ തലതൊട്ടപ്പന്മാരുടെ അഹങ്കാരം തകർന്നടിയുന്ന കാഴ്ചയ്ക്കാണ് രാജ്യം ഇനി സാക്ഷ്യം വഹിക്കാൻ പോകുന്നത്.