കൗൺസിലർമാരെ മാറ്റിപ്പാർപ്പിച്ചു, തടഞ്ഞുവെച്ചു; ഒടുവിൽ തിജാരയിൽ കോൺഗ്രസിന്റെ അട്ടിമറി വിജയം

ജനാധിപത്യത്തിന്റെ സൗന്ദര്യം എന്ന് പറയുന്നത് വോട്ടെടുപ്പുകൾ തന്നെയാണ്. എന്നാൽ വോട്ടെടുപ്പുകളിൽ വിജയിച്ചവരെ പിന്നീട് പണവും പദവിയും വാഗ്ദാനം ചെയ്ത് ഒപ്പം കൂട്ടുന്ന കുതിരക്കച്ചവടം എന്ന പ്രതിഭാസത്തെയും മറികടന്ന് വേണം ഇപ്പോൾ ചിലയിടങ്ങളിൽ സർക്കാരോ ഭരണസമിതിയോ രൂപീകരിക്കാൻ എന്നതാണ് യാഥാർഥ്യം. ഇതാണ് ഇപ്പോൾ രാജസ്ഥാനിൽ കണ്ടുകൊണ്ടിരിക്കുന്ന നാടകീയ നീക്കങ്ങൾ വ്യക്തമാക്കുന്നത്. എന്നാൽ അതിനെയെല്ലാം മറികടന്ന് നാടകീയ നീക്കങ്ങൾക്കൊടുവിൽ രാജസ്ഥാനിലെ തിജാര മുനിസിപ്പൽ കൗൺസിൽ ചെയർപേഴ്‌സൺ തെരഞ്ഞെടുപ്പിൽ കോൺഗ്രസിന് അട്ടിമറി വിജയം ലഭിച്ചിരിക്കുകയാണ്. ഇത് ഇത്രയധികം ദേശീയ പ്രാധാന്യം നേടുന്നത് അതുകൊണ്ടുതന്നെയാണ്. സ്വന്തം അംഗങ്ങളെ പോലും നിലനിർത്താൻ കഴിയാത്ത സ്ഥിതിയിലായിരുന്നിട്ടും 17 സ്വതന്ത്രരുടെ പിന്തുണ നേടിയാണ് കോൺഗ്രസ് സ്ഥാനാർഥി വിജയിച്ച് മുനിസിപ്പൽ ചെയർമാനായത്. തിജാര മുനിസിപ്പാലിറ്റിയിൽ ആകെയുള്ള 35 അംഗ കൗൺസിലിൽ 31 കൗൺസിലർമാരും സ്വതന്ത്രരായിരുന്നു. മൂന്ന് ബി.ജെ.പി അംഗങ്ങളും ഒരു കോൺഗ്രസ് അംഗവുമാണ് കൗൺസിലിലുണ്ടായിരുന്നത്.

എന്നാൽ സ്വതന്ത്രരായി വിജയിച്ചവരിൽ പലരും വ്യത്യസ്ത ചിന്താഗതികളും ആശയങ്ങളും പുലർത്തുന്നതിനാൽ ഇവർക്കിടയിൽ ഒരു ധാരണ രൂപപ്പെട്ടിരുന്നില്ല. സ്വതന്ത്രർക്ക് ഒറ്റക്കെട്ടായി ഭരണസമിതി രൂപീകരിക്കാൻ കഴിയില്ലെന്ന് മനസ്സിലായതോടെ ചെയർപേഴ്‌സൺ തെരഞ്ഞെടുപ്പിൽ നിർണായകമായ സ്വതന്ത്ര കൗൺസിലർമാരെ തങ്ങളുടെ പക്ഷത്തെത്തിക്കാനുള്ള നീക്കത്തിലായിരുന്നു കോൺഗ്രസും ബി.ജെ.പിയും. കോൺഗ്രസിന് ഒരു സീറ്റും ബി.ജെ.പിക്ക് മൂന്ന് സീറ്റും മാത്രമാണുള്ളതെന്ന് ഓർക്കണം. ആശയപരമായി കോൺഗ്രസിനൊപ്പമാണെന്ന് കൂടുതൽ കൗൺസിലർമാർ അറിയിച്ചതോടെ സ്വതന്ത്രർ കോൺഗ്രസിനൊപ്പം ചേരുകയായിരുന്നു. ഇത് ബി.ജെ.പിക്ക് വലിയ തിരിച്ചടിയായി. തുടർന്ന് ബി.ജെ.പി കുതിരക്കച്ചവടത്തിനുള്ള നീക്കങ്ങൾ ശക്തമാക്കിയതായി കോൺഗ്രസ് ആരോപിച്ചു. ഇതോടെ കോൺഗ്രസ് നേതൃത്വം പാർട്ടി ഭരിക്കുന്ന ഹിമാചൽ പ്രദേശിലേക്ക് കൗൺസിലർമാരെ മാറ്റി. സ്വതന്ത്ര കൗൺസിലർമാരെയടക്കം 18 പേരെ കോൺഗ്രസ് ഹിമാചൽ പ്രദേശിലെ കസോളിലേക്ക് മാറ്റുകയും രാജസ്ഥാനിലെ മുനിസിപ്പാലിറ്റിയിലെ ഭരണം ഉറപ്പാക്കുന്നതിനുള്ള ചർച്ചകൾ നടത്തുകയും ചെയ്തു. ഇതിനിടെ സ്വതന്ത്ര കൗൺസിലറായ രാമാവതാർ സൈനിയെ കോൺഗ്രസ് ചിഹ്നത്തിൽ ചെയർപേഴ്‌സൺ സ്ഥാനാർഥിയാക്കി. ഒരാൾ പോലും ബി.ജെ.പിയുടെ പ്രലോഭനങ്ങൾക്ക് മുന്നിൽ വഴങ്ങാതെ തെരഞ്ഞെടുപ്പിന്റെ തലേദിവസം രാജസ്ഥാനിലേക്ക് മടങ്ങുകയും ചെയ്തു.

എന്നാൽ രാജസ്ഥാനെ ചുറ്റിപ്പറ്റിയുള്ള ഹരിയാന, ഗുജറാത്ത്, ഡൽഹി തുടങ്ങിയ സംസ്ഥാനങ്ങൾ ബി.ജെ.പി ഭരിക്കുന്ന സാഹചര്യത്തിൽ യാത്രയിലും തടസ്സങ്ങളുണ്ടായതായി കോൺഗ്രസ് ആരോപിച്ചു. വോട്ടെടുപ്പിന് മുന്നോടിയായി ഹിമാചൽ പ്രദേശിൽ നിന്ന് കൗൺസിലർമാർ മടങ്ങിയെത്തുന്നതിനിടെ പൊലീസ് അവരെ തടഞ്ഞു. ഹരിയാനയിലെ ടോൾ പ്ലാസയിൽ 25 പൊലീസ് വാഹനങ്ങൾ കൗൺസിലർമാർ സഞ്ചരിച്ച വാഹനങ്ങൾ തടയുകയും കൗൺസിലർമാരെയും അവരുടെ കുടുംബാംഗങ്ങളെയും തടഞ്ഞുവെക്കുകയും ചെയ്തതായി കോൺഗ്രസ് ആരോപിച്ചു. പിന്നീട് ഹരിയാണ പൊലീസ് പഞ്ചകുള മേഖലയിൽ കൗൺസിലർമാരെ തടഞ്ഞുവെച്ചതായി അറിഞ്ഞ കോൺഗ്രസ് നേതാക്കൾ പിഞ്ചോർ പൊലീസ് സ്റ്റേഷനു മുന്നിൽ പ്രതിഷേധം നടത്തിയതിനെ തുടർന്ന് അവരെ മോചിപ്പിച്ചു. കൗൺസിലർമാരുടെ വരവ് സംബന്ധിച്ച് രാജസ്ഥാനിൽ അനിശ്ചിതത്വം തുടരുന്നതിനിടെ വോട്ട് ചെയ്യാനുള്ള സമയപരിധി നീട്ടണമെന്നാവശ്യപ്പെട്ട് കോൺഗ്രസ് ഹൈക്കോടതിയെ സമീപിക്കുകയും ചെയ്തു. തുടർന്ന് ഉച്ചയ്ക്ക് രണ്ടിന് നിശ്ചയിച്ചിരുന്ന വോട്ടെടുപ്പ് ആദ്യം രാത്രി എട്ടിലേക്കും പിന്നീട് രാത്രി പത്തിലേക്കും മാറ്റി. ഒടുവിൽ കൗൺസിലർമാർ എത്തി വോട്ട് ചെയ്തതോടെ അർധരാത്രിയോടെയാണ് വോട്ടെടുപ്പ് അവസാനിച്ചത്. വോട്ടെണ്ണലിൽ ആകെ പോൾ ചെയ്ത 35 വോട്ടുകളിൽ ഒരെണ്ണം അസാധുവായി. കോൺഗ്രസിന്റെ രാമാവതാർ സൈനി 18 വോട്ടുകൾ നേടി വിജയിച്ചു. ബി.ജെ.പി സ്ഥാനാർഥി സുഭാഷ് ചന്ദ് സൈനിക്ക് 16 വോട്ടുകളാണ് ലഭിച്ചത്. ഇതോടെ തിജാര ചെയർപേഴ്‌സൺ തെരഞ്ഞെടുപ്പ് ദേശീയ രാഷ്ട്രീയത്തിന്റെ ശ്രദ്ധയിലേക്ക് എത്തി.