ജാതിയുടെയും തൊട്ടുകൂടായ്മയുടെയും പേരിലുള്ള അപമാനം അംഗീകരിക്കാനാകില്ല: സ്വാതന്ത്ര്യദിനത്തിൽ വി.ഡി. സതീശൻ

തിരുവനന്തപുരം: ഇന്ത്യയുടെ 80-ാം സ്വാതന്ത്ര്യദിനാഘോഷങ്ങളുടെ ഭാഗമായി തിരുവനന്തപുരത്തെ സെൻട്രൽ സ്റ്റേഡിയത്തിൽ മുഖ്യമന്ത്രി വി.ഡി. സതീശൻ ദേശീയ പതാക ഉയർത്തി. സ്വാതന്ത്ര്യദിന സന്ദേശത്തിൽ ജനാധിപത്യവും മതേതരത്വവും സാമൂഹിക നീതിയും പുരോഗമന വികസനവും മുൻനിർത്തിയുള്ള നവകേരളത്തിന്റെ ആവശ്യകത മുഖ്യമന്ത്രി ചൂണ്ടിക്കാട്ടി.

ജാതിയുടെയും തൊട്ടുകൂടായ്മയുടെയും പേരിൽ രാജ്യത്തെ മുതിർന്ന നേതാവിന് പോലും അപമാനം നേരിടേണ്ടിവന്ന സാഹചര്യം ഗൗരവത്തോടെ കാണണമെന്ന് വി.ഡി. സതീശൻ പറഞ്ഞു. ജീവിതകാലം മുഴുവൻ രാഷ്ട്രീയരംഗത്ത് പ്രവർത്തിക്കുകയും നിരവധി തവണ ഭരണഘടനാ പദവികൾ വഹിക്കുകയും ചെയ്ത മുതിർന്ന നേതാവ് പോലും ഇത്തരം അപമാനത്തിന് ഇരയാകുന്നത് രാജ്യത്തിന് നൽകുന്ന സന്ദേശം എന്താണെന്ന് ചിന്തിക്കണമെന്നും അദ്ദേഹം പറഞ്ഞു.

രാജ്യം ഇത്തരം ഇരുണ്ട കാലഘട്ടങ്ങളിൽനിന്ന് ഏറെ മുന്നോട്ട് വന്നിട്ടുണ്ടെന്നും ഇനി പിന്നോട്ടുപോകരുതെന്നും മുഖ്യമന്ത്രി വ്യക്തമാക്കി. ജാതി, മതം, ലിംഗം എന്നിവയുടെ പേരിലുള്ള വിവേചനവും മുൻവിധികളും അവസാനിപ്പിച്ച് കൂടുതൽ സമത്വാധിഷ്ഠിതമായ സമൂഹം കെട്ടിപ്പടുക്കേണ്ടതുണ്ടെന്നും അദ്ദേഹം പറഞ്ഞു.

‘നവകേരളം’ വെറും മുദ്രാവാക്യമല്ലെന്നും അത് പ്രായോഗികമായ ഒരു വികസന സങ്കൽപ്പമാണെന്നും മുഖ്യമന്ത്രി വ്യക്തമാക്കി. മതേതരത്വം, കാരുണ്യം, സാമൂഹിക നീതി, ശാസ്ത്രീയ സമീപനം, പുരോഗമന വികസനം എന്നിവയിൽ അധിഷ്ഠിതമായ കേരളമാണ് ലക്ഷ്യമെന്നും അദ്ദേഹം പറഞ്ഞു.

അടുത്തിടെ ഉണ്ടായ വെള്ളപ്പൊക്കങ്ങളും മണ്ണിടിച്ചിലുകളും ഉൾപ്പെടെയുള്ള പ്രകൃതിദുരന്തങ്ങളിൽ ജീവൻ നഷ്ടപ്പെട്ടവരെ മുഖ്യമന്ത്രി അനുസ്മരിച്ചു. ദുരിതബാധിത കുടുംബങ്ങൾക്കൊപ്പം സർക്കാർ ശക്തമായി നിലകൊള്ളുമെന്നും ദുരന്തസാധ്യതകൾ കുറയ്ക്കുന്നതിനായി ശാസ്ത്രീയമായ ദുരന്തനിവാരണ സംവിധാനങ്ങൾ കൂടുതൽ ശക്തിപ്പെടുത്തുമെന്നും അദ്ദേഹം പറഞ്ഞു.

ജനാധിപത്യം തുറന്ന സംവാദത്തിലൂടെയും വിയോജിപ്പിനുള്ള അവകാശത്തിലൂടെയുമാണ് ശക്തിപ്പെടുന്നതെന്ന് വി.ഡി. സതീശൻ ചൂണ്ടിക്കാട്ടി. വർഗീയതയ്ക്കും വിദ്വേഷത്തിനും സമൂഹത്തിൽ ഇടം നൽകുന്നത് ജനാധിപത്യത്തിന്റെ അടിസ്ഥാന മൂല്യങ്ങളെ ദുർബലപ്പെടുത്തുമെന്നും അദ്ദേഹം മുന്നറിയിപ്പ് നൽകി.

സാമൂഹിക ക്ഷേമം സർക്കാരിന്റെ കാരുണ്യമല്ലെന്നും ജനങ്ങളുടെ അവകാശമാണെന്നും മുഖ്യമന്ത്രി പറഞ്ഞു. സമൂഹത്തിലെ പിന്നാക്ക വിഭാഗങ്ങൾക്കും ദുരിതമനുഭവിക്കുന്നവർക്കും ആവശ്യമായ സംരക്ഷണവും ക്ഷേമവും ഉറപ്പാക്കുന്നത് സർക്കാരിന്റെ ഉത്തരവാദിത്തമാണെന്നും അദ്ദേഹം വ്യക്തമാക്കി.

മതേതരത്വവും ജനാധിപത്യബോധവും ഐക്യവുമാണ് രാജ്യത്തിന്റെ കരുത്തും ഊർജ്ജവും. ഈ മൂല്യങ്ങളിൽ യാതൊരു വീഴ്ചയും വരുത്തില്ലെന്ന് സ്വാതന്ത്ര്യദിനത്തിൽ പ്രതിജ്ഞ ചെയ്യണമെന്നും മുഖ്യമന്ത്രി ആഹ്വാനം ചെയ്തു.