26 അംഗ സഭയിൽ കളി മാറി! ; രണ്ടും കൽപ്പിച്ച് കോൺഗ്രസ് ; സ്വതന്ത്രൻ കളത്തിൽ

പാലാ നഗരസഭയിൽ രാഷ്ട്രീയ സമവാക്യങ്ങൾ മാറിമറിയുമ്പോൾ, തത്ത്വാധിഷ്ഠിത നിലപാടുകളുമായി ശക്തമായ മുന്നേറ്റത്തിനൊരുങ്ങി യു.ഡി.എഫ്.  മുന്നണി ധാരണകൾ കാറ്റിൽപ്പറത്തി അധികാരത്തിന് വേണ്ടി അവസരവാദ രാഷ്ട്രീയം കളിക്കുന്ന എൽ.ഡി.എഫിന്റെയും മാണി വിഭാഗത്തിന്റെയും രാഷ്ട്രീയ കുതന്ത്രങ്ങൾക്ക് മറുപടി നൽകാൻ കോൺഗ്രസും യു.ഡി.എഫും തികഞ്ഞ ആത്മവിശ്വാസത്തിലാണ്.  ഓഗസ്റ്റ് 19-ന് നടക്കുന്ന ചെയർപേഴ്‌സൺ തെരഞ്ഞെടുപ്പിൽ യു.ഡി.എഫും സ്വതന്ത്ര കൂട്ടായ്മയും ഒറ്റക്കെട്ടായി തങ്ങളുടെ സ്ഥാനാർത്ഥിയെ മത്സരരംഗത്തിറക്കും. കഴിഞ്ഞ ഏഴ് മാസത്തെ യു.ഡി.എഫ് ഭരണത്തിൽ പാലായിലെ ജനങ്ങൾക്ക് നൽകിയ വാഗ്ദാനങ്ങൾ കൃത്യമായി പാലിക്കാൻ മുന്നണിക്ക് സാധിച്ചിരുന്നു. എന്നാൽ ജനക്ഷേമ ഭരണത്തിന്റെ പൊരുൾ മനസ്സിലാക്കാതെ, കേവലം രാഷ്ട്രീയ ലാഭത്തിനു വേണ്ടി ജനവിധി അട്ടിമറിക്കാനാണ് എൽ.ഡി.എഫും സി.പി.എമ്മും ശ്രമിച്ചത്. ഡിവൈഎഫ്ഐ സമ്മേളനത്തിന് കൊട്ടാരമറ്റം ബസ് സ്റ്റാൻഡ് വിട്ടുനൽകിയതിലെ തർക്കങ്ങളും നഗരസഭയിലെ ഭരണപരമായ ഭരണപക്ഷ വിയോജിപ്പുകളും മുതലെടുത്ത് എൽ.ഡി.എഫ് കൊണ്ടുവന്ന അവിശ്വാസപ്രമേയത്തിന് പിന്നിൽ തനി രാഷ്ട്രീയ ഗൂഢാലോചനയായിരുന്നു. പാർട്ടിയുടെയും മുന്നണിയുടെയും വിപ്പ് ലംഘിച്ചുകൊണ്ട് ചില അംഗങ്ങളെ ഒപ്പം നിർത്തി ഭരണം അട്ടിമറിച്ചവർക്ക്, പാലായിലെ ജനങ്ങളുടെ മുന്നിൽ കൃത്യമായ ഉത്തരം നൽകേണ്ടി വരും.

നിലവിലെ 26 അംഗ കൗൺസിലിൽ 12 അംഗങ്ങളുള്ള എൽ.ഡി.എഫ്, തങ്ങൾക്ക് തനിച്ചു ഭരിക്കാനുള്ള ഭൂരിപക്ഷമില്ലാതിരുന്നിട്ടും, സ്വന്തമായി ചെയർപേഴ്‌സൺ സ്ഥാനാർത്ഥിയെപ്പോലും നിർത്താൻ ധൈര്യപ്പെടാതെ ഇതര അംഗങ്ങളെ പിന്തുണയ്ക്കാൻ നിർബന്ധിതരായിരിക്കുകയാണ്. 10 അംഗങ്ങളുള്ള കേരള കോൺഗ്രസ് മാണി വിഭാഗവും 2 സി.പി.എം അംഗങ്ങളും ഉൾപ്പെടുന്ന എൽ.ഡി.എഫ്, തങ്ങളുടെ രാഷ്ട്രീയ പാപ്പരത്തമാണ് ഇതിലൂടെ തുറന്നുകാട്ടുന്നത്. കോൺഗ്രസ് വിമതരുടെയും സ്വതന്ത്ര സ്ഥാനാർത്ഥി മായാ രാഹുലിന്റെയും പിന്തുണയോടെ ഭരണം പിടിച്ചെടുക്കാൻ എൽ.ഡി.എഫ് നടത്തുന്ന നീക്കങ്ങൾ പാലായിലെ ജനങ്ങൾ അറപ്പോടെയാണ് കാണുന്നത്.അതേസമയം, കോൺഗ്രസ്സിന്റെ രണ്ടു കൗൺസിലർമാരും കേരള കോൺഗ്രസ് ജോസഫ് വിഭാഗത്തിന്റെ മൂന്നു കൗൺസിലർമാരും കെ.ഡി.പി.യുടെ ഒരു പ്രതിനിധിയും ഉൾപ്പെടുന്ന യു.ഡി.എഫ് ആറംഗ ശക്തിയായി ഉറച്ചുനിൽക്കുന്നു. നഗരസഭയിലെ പ്രബല സ്വതന്ത്ര മുന്നണിയായ പുളിക്കകണ്ടം കുടുംബത്തിലെ മൂന്ന് കൗൺസിലർമാരും യു.ഡി.എഫിനൊപ്പം ചേരുന്നതോടെ 9 അംഗങ്ങളുടെ കരുത്തുറ്റ കൂട്ടായ്മയായി മുന്നണി മത്സരരംഗത്തുണ്ട്. അവിശ്വാസ പ്രമേയത്തിന്മേൽ നടന്ന വോട്ടെടുപ്പിൽ താൽക്കാലിക തിരിച്ചടി നേരിട്ടെങ്കിലും, തത്ത്വാധിഷ്ഠിത രാഷ്ട്രീയത്തിലും ജനങ്ങളുടെ വികസന ആവശ്യങ്ങളിലും ഉറച്ചുനിന്നുകൊണ്ട് മുന്നോട്ട് പോകാനാണ് യു.ഡി.എഫ് തീരൂമാനിച്ചിരിക്കുന്നത്.

വിപ്പ് ലംഘനങ്ങളും രാഷ്ട്രീയ അട്ടിമറികളും താൽക്കാലിക നേട്ടങ്ങൾ നൽകിയേക്കാം, എങ്കിലും വരാനിരിക്കുന്ന ചെയർപേഴ്‌സൺ തെരഞ്ഞെടുപ്പിൽ പാലായിലെ നഗരസഭാ ഭരണത്തിന്റെ യഥാർത്ഥ വികാരം പ്രതിഫലിക്കും. അവസരവാദ കൂട്ടുകെട്ടുകൾക്ക് മുന്നിൽ തലകുനിക്കാതെ, ജനങ്ങളുടെ ഭാഗത്തുനിന്ന് പോരാടാൻ യു.ഡി.എഫ് സ്ഥാനാർത്ഥി ഓഗസ്റ്റ് 19-ന് കടുത്ത പോരാട്ടം തന്നെ കാഴ്ചവെക്കും. ചിട്ടയായ പ്രവർത്തനങ്ങളിലൂടെയും മുന്നണി ഐക്യത്തിലൂടെയും പാലാ നഗരസഭയിൽ ജനകീയ ഭരണം തിരിച്ചുകൊണ്ടുവരാൻ യു.ഡി.എഫ് നേതൃത്വം പൂർണ്ണ സജ്ജമാണ്. ഓഗസ്റ്റ് 19-ന്റെ വോട്ടെടുപ്പ് പാലാ രാഷ്ട്രീയത്തിൽ നിർണ്ണായകമായ ഒരു പുതിയ അധ്യായത്തിന് വഴിവെക്കും.