വനിതാ കമ്മീഷൻ യോഗത്തിനിടെ കൊമ്പുകോർത്ത് അധ്യക്ഷയും പോലീസ് ഉദ്യോഗസ്ഥയും
ഖൈത്താലിൽ നടന്ന ഹരിയാന വനിതാ കമ്മീഷൻ യോഗത്തിനിടെ വനിതാ കമ്മീഷൻ അധ്യക്ഷയും പോലീസ് ഉദ്യോഗസ്ഥയും പരസ്പരം കൊമ്പുകോർത്തു.
യോഗത്തിനിടെ ഒരു ദാമ്പത്യ തർക്ക കേസ് അന്വേഷണത്തിൽ അനാസ്ഥ ചൂണ്ടിക്കാട്ടി പോലീസ് ഉദ്യോഗസ്ഥയ്ക്ക് നേരെ അധ്യക്ഷ രേണു ഭാട്ടിയ കയർത്തു സംസാരിച്ചു. സംഭവത്തെ കുറിച്ച് പോലീസുകാരി നൽകിയ വിശദീകരണം തൃപ്തികരമല്ല എന്ന് ചൂണ്ടിക്കാട്ടി യോഗത്തിൽ നിന്ന് ഇറങ്ങിപോകാൻ ഭാട്ടിയ ആജ്ഞാപിച്ചു. ഇതിൽ പ്രകോപിതയായ ഉദ്യോഗസ്ഥ, ഭാട്ടിയയുടെ ധിക്കാരത്തെ ചോദ്യ ചെയ്ത് മുറിയിൽ തന്നെ തുടർന്നു. പിന്നീട് ഇവരെ മറ്റ് ഉദ്യോഗസ്ഥർ ചേർന്ന് ബലമായി പുറത്തേക്ക് കൊണ്ടുപോവുകയായിരുന്നു.
സംഭവത്തിന് തുടക്കമിട്ട ദാമ്പത്യ തർക്ക കേസിൽ പോലീസ് പക്ഷപാതപരമായി പെരുമാറിയെന്നും പരാതിക്കാരിയായ സ്ത്രീയോട് അപമര്യാദയായി പെരുമാറിയെന്നും ഭാട്ടിയ സാമൂഹ്യ മാധ്യമങ്ങളിൽ വൈറലായ തന്‍റെ രോഷപ്രകടനത്തെ ന്യായീകരിക്കവേ മാധ്യമങ്ങളോട് പറഞ്ഞു.
എന്നാൽ സംഭവത്തെ കുറിച്ച് പോലീസ് ഉദ്യോഗസ്ഥ പ്രതികരണമൊന്നും നടത്തിയിട്ടില്ല
