ഉമ തോമസ് ശിവഗിരിയില്‍
തിരുവനന്തപുരം: തൃക്കാക്കരയിലെ യുഡിഎഫ് സ്ഥാനാര്‍ത്ഥി ഉമ തോമസ് വര്‍ക്കല ശിവഗിരി സന്ദര്‍ശിച്ചു. ശിവഗിരി മഠം പ്രസിഡന്റ് സ്വാമി സച്ചിദാനന്ദയുമായി സ്ഥാനാര്‍ത്ഥി കൂടിക്കാഴ്ച്ച നടത്തി. അനുഗ്രഹം തേടിയെത്തിയതാണെന്ന് ഉമ പറഞ്ഞു. പുലര്‍ച്ചെയാണ് ഉമ തോമസ് വര്‍ക്കല ശിവഗിരിയിലെത്തിയത്. മഠത്തില്‍ ഏറെ സമയം ചെലവഴിച്ചാണ് സ്ഥാനാര്‍ത്ഥി മടങ്ങിയത്. അതേസമയം തൃക്കാക്കരയില്‍ സ്ഥാനാര്‍ത്ഥികള്‍ രണ്ടാംഘട്ട പ്രചാരണത്തിലേക്ക് കടന്നിരിക്കുകയാണ്. ഇടത് സ്ഥാനാര്‍ഥി ഡോ.ജോ ജോസഫിന്റെ വാഹന പ്രചാരണം ഇന്ന് എല്‍ഡിഎഫ് കണ്‍വീനര്‍ ഇ പി ജയരാജന്‍ ഉദഘാടനം ചെയ്തു. ചിന്തന്‍ ശിബിരം കഴിഞ്ഞ് നേതാക്കള്‍ മടങ്ങി എത്തുന്നതോടെ കോണ്‍ഗ്രസ് ക്യാമ്പും കൂടുതല്‍ സജീവമാകും. സംസ്ഥാന നേതാക്കള്‍ എല്ലാം ഇനി തൃക്കാക്കരയില്‍ കേന്ദ്രീകരിക്കും. ഉമ തോമസിന്റെ ഇന്നത്തെ പ്രചാരണം കെ സുധാകരനാണ് ഉദഘാടനം ചെയ്യുന്നത്. എന്‍ഡിഎ യുടെ തെരെഞ്ഞെടുപ്പ് ഓഫീസ് ഇന്ന് പ്രവര്‍ത്തനം തുടങ്ങും.
