എൺപതാം സ്വാതന്ത്ര്യദിനാഘോഷത്തിൽ രാജ്യം; ചെങ്കോട്ടയിൽ പ്രധാനമന്ത്രി പതാക ഉയർത്തും

ഡൽഹി: എൺപതാം സ്വാതന്ത്ര്യദിനാഘോഷത്തിന്റെ നിറവിൽ രാജ്യം. ഡൽഹിയിലെ ചരിത്രപ്രസിദ്ധമായ ചെങ്കോട്ടയിൽ നടക്കുന്ന ഔദ്യോഗിക ചടങ്ങിൽ പ്രധാനമന്ത്രി നരേന്ദ്ര മോദി ദേശീയപതാക ഉയർത്തി രാജ്യത്തെ അഭിസംബോധന ചെയ്യും. വിവിധ മേഖലകളിൽ നിന്നുള്ള 5,000-ത്തിലധികം വിശിഷ്ടാതിഥികൾ ചടങ്ങിൽ പങ്കെടുക്കും. രാജ്യത്തിന്റെ വിവിധ ഭാഗങ്ങളിൽ നിന്നുള്ള ജനപ്രതിനിധികൾ, യുവാക്കൾ, വിവിധ തൊഴിൽ മേഖലകളിൽ നിന്നുള്ളവർ, മികച്ച സംഭാവനകൾ നൽകിയവർ തുടങ്ങിയവരും ചടങ്ങിന്റെ ഭാഗമാകും. ആകെ 27,000ത്തോളം പേർ ചെങ്കോട്ടയിലെ ആഘോഷങ്ങൾക്ക് സാക്ഷ്യം വഹിക്കും 

ഇത്തവണത്തെ സ്വാതന്ത്ര്യദിനാഘോഷത്തിന് പ്രത്യേകതകൾ ഏറെയാണ്. വന്ദേമാതരത്തിന്റെ 150-ാം വാർഷികാഘോഷങ്ങളുടെ ഭാഗമായി ചെങ്കോട്ടയിൽ ആദ്യമായി ദേശീയഗാനത്തിന് മുമ്പായി വന്ദേമാതരം ആലപിക്കും. പ്രധാനമന്ത്രി ചെങ്കോട്ടയിൽ എത്തുമ്പോഴാണ് ദേശീയഗാനം ആലപിക്കുന്നതിന് മുമ്പായി വന്ദേമാതരം അവതരിപ്പിക്കുന്നത്. തുടർന്ന് പ്രധാനമന്ത്രി ദേശീയപതാക ഉയർത്തുകയും രാജ്യത്തെ അഭിസംബോധന ചെയ്യുകയും ചെയ്യും.

ചടങ്ങിന്റെ ഭാഗമായി പ്രധാനമന്ത്രി ഗാർഡ് ഓഫ് ഓണർ സ്വീകരിക്കും. ദേശീയപതാക ഉയർത്തലിന് പിന്നാലെ 21 ഗൺ സല്യൂട്ടും നൽകും. തുടർന്ന് പ്രധാനമന്ത്രി സ്വാതന്ത്ര്യദിന സന്ദേശം രാജ്യത്തിന് നൽകും. സർക്കാരിന്റെ നേട്ടങ്ങൾ, രാജ്യത്തിന്റെ വികസന ലക്ഷ്യങ്ങൾ, യുവജനങ്ങളുടെ പങ്ക്, 2047ഓടെ വികസിത ഭാരതം കൈവരിക്കാനുള്ള ലക്ഷ്യം തുടങ്ങിയ വിഷയങ്ങൾ സന്ദേശത്തിൽ പ്രധാനമായി ഉയർന്നുവരും. ഈ വർഷത്തെ ആഘോഷങ്ങളുടെ പ്രധാന ആശയങ്ങളിൽ ‘വന്ദേമാതരത്തിന്റെ 150 വർഷം’, ‘2047ലെ വികസിത ഭാരതത്തിനായുള്ള യുവശക്തി’ എന്നിവ ഉൾപ്പെടുന്നു.

സ്വാതന്ത്ര്യസമര സേനാനികളുടെ ത്യാഗങ്ങളെ അനുസ്മരിച്ചുകൊണ്ടും രാജ്യത്തിന്റെ ജനാധിപത്യ മൂല്യങ്ങളും ദേശീയ ഐക്യവും ഉയർത്തിപ്പിടിച്ചുകൊണ്ടുമാണ് രാജ്യത്തുടനീളം സ്വാതന്ത്ര്യദിനാഘോഷങ്ങൾ നടക്കുന്നത്. ഡൽഹിയിൽ സുരക്ഷാ ക്രമീകരണങ്ങളും ശക്തമാക്കിയിട്ടുണ്ട്.

കേരളത്തിലും സ്വാതന്ത്ര്യദിനാഘോഷങ്ങൾക്ക് വിപുലമായ ഒരുക്കങ്ങളാണ് നടത്തിയിരിക്കുന്നത്. തിരുവനന്തപുരം സെൻട്രൽ സ്റ്റേഡിയത്തിൽ നടക്കുന്ന സംസ്ഥാനതല ചടങ്ങിൽ മുഖ്യമന്ത്രി വി.ഡി. സതീശൻ ദേശീയപതാക ഉയർത്തും. തുടർന്ന് വിവിധ സേനാവിഭാഗങ്ങളുടെയും പൊലീസ് വിഭാഗങ്ങളുടെയും പരേഡിൽ മുഖ്യമന്ത്രി അഭിവാദ്യം സ്വീകരിക്കും. ദേശീയഗാനാലാപനം, മുഖ്യമന്ത്രിയുടെ സ്വാതന്ത്ര്യദിന സന്ദേശം, ദേശഭക്തിഗാനാലാപനം തുടങ്ങിയ പരിപാടികളും നടക്കും. സംസ്ഥാനത്തെ വിവിധ ജില്ലാ ആസ്ഥാനങ്ങളിലും മന്ത്രിമാരുടെ നേതൃത്വത്തിൽ സ്വാതന്ത്ര്യദിനാഘോഷങ്ങൾ നടക്കും.

കേരളത്തിലെ പ്രധാന രാഷ്ട്രീയ പാർട്ടി ആസ്ഥാനങ്ങളിലും സ്വാതന്ത്ര്യദിനാഘോഷങ്ങളുടെ ഭാഗമായി ദേശീയപതാക ഉയർത്തും. കോൺഗ്രസ് സംസ്ഥാന ആസ്ഥാനമായ ഇന്ദിരാഭവൻ, സിപിഐഎം സംസ്ഥാന ആസ്ഥാനമായ എകെജി സെന്റർ, ബിജെപി സംസ്ഥാന ആസ്ഥാനമായ മാരാർജി ഭവൻ, സിപിഐ സംസ്ഥാന ആസ്ഥാനമായ എം.എൻ. സ്മാരകം എന്നിവിടങ്ങളിലും വിവിധ പരിപാടികൾ സംഘടിപ്പിച്ചിട്ടുണ്ട്.

കേരളത്തിൽ 15,000 കേന്ദ്രങ്ങളിൽ ദേശീയപതാക ഉയർത്തുകയും വന്ദേമാതരം പൂർണമായി ആലപിക്കുകയും ചെയ്യുമെന്ന് ബിജെപി അറിയിച്ചിട്ടുണ്ട്. അതേസമയം, സംസ്ഥാനത്തെ വിദ്യാഭ്യാസ സ്ഥാപനങ്ങളിലെ സ്വാതന്ത്ര്യദിനാഘോഷവുമായി ബന്ധപ്പെട്ട് ദേശീയപതാക ഉയർത്തലും ദേശീയഗാനമായ ജനഗണമന ആലപിക്കലുമാണ് പൊതുവിദ്യാഭ്യാസ വകുപ്പിന്റെ നിർദേശങ്ങളിൽ ഉൾപ്പെടുത്തിയിരിക്കുന്നത്. വന്ദേമാതരം ആലപിക്കണമെന്ന പ്രത്യേക നിർദേശം നൽകിയിട്ടില്ലെന്നത് സംബന്ധിച്ച് സംസ്ഥാനത്ത് ചർച്ചയും ഉയർന്നിട്ടുണ്ട്.

സ്വാതന്ത്ര്യസമരത്തിന്റെ ചരിത്രവും രാജ്യത്തിന്റെ നേട്ടങ്ങളും ഓർമിക്കുന്നതിനൊപ്പം ഭാവി ഇന്ത്യയുടെ വികസന ലക്ഷ്യങ്ങളിലേക്കുള്ള പ്രതിജ്ഞ പുതുക്കുന്ന ദിനമായാണ് ഇത്തവണത്തെ 80-ാം സ്വാതന്ത്ര്യദിനം രാജ്യം ആചരിക്കുന്നത്.