ആരോഗ്യവും ദേവസ്വവും ഒരേ കൈയിൽ! മുരളീധരന്റെ ‘മെഗാ മിഷൻ’ എന്ത്?

നിയമസഭയും ഭരണചക്രവും പുതിയ ദിശയിലേക്ക് തിരിയുമ്പോൾ കേരള രാഷ്ട്രീയം ആകാംക്ഷയോടെ ഉറ്റുനോക്കുന്നത് ഒരേയൊരു നേതാവിലേക്കാണ് — കെ. മുരളീധരൻ! യുഡിഎഫ് മുന്നണിയിലെ അതികായനും കോൺഗ്രസിന്റെ കരുത്തനുമായ മുരളീധരന്റെ ചുമലിൽ ഇന്നിരിക്കുന്നത് ഭരണത്തിലെ ഏറ്റവും നിർണായകമായ രണ്ട് വകുപ്പുകളാണ്. ഒന്ന്, ജനങ്ങളുടെ ജീവനും ആരോഗ്യവുമായി നേരിട്ട് ബന്ധപ്പെട്ട ആരോഗ്യ വകുപ്പ്. രണ്ട്, കോടിക്കണക്കിന് ഭക്തജനങ്ങളുടെ വികാരവും വിശ്വാസവുമായി അലിഞ്ഞുചേർന്ന ദേവസ്വം വകുപ്പ്. മുൻപ് എൽഡിഎഫ് സർക്കാരിന്റെ കാലത്ത് വീണാ ജോർജ് കൈകാര്യം ചെയ്ത ആരോഗ്യവും വി. എൻ. വാസവൻ നോക്കിനടത്തിയ ദേവസ്വവും ഇന്ന് ഒറ്റയാളുടെ കരങ്ങളിലാണ് ഭദ്രമായിരിക്കുന്നത്. ഈ രണ്ട് മേഖലകളെയും ഒരേസമയം നയിക്കുക എന്നത് ചെറിയൊരു ദൗത്യമല്ല. എന്നാൽ ആ വെല്ലുവിളിയെ കൃത്യമായ രാഷ്ട്രീയ തന്ത്രങ്ങളോടെയും ഭരണപാടവത്തോടെയും നേരിടുകയാണ് മുരളീധരൻ.

ആരോഗ്യ വകുപ്പിലേക്ക് കണ്ണോടിച്ചാൽ അവിടെ വലിയൊരു മാറ്റത്തിന്റെ അലയടികളാണ് കാണാൻ കഴിയുക. വകുപ്പിൽ യാതൊരുവിധ അനാസ്ഥയും അനുവദിക്കില്ലെന്ന ദൃഢനിശ്ചയത്തിലാണ് അദ്ദേഹം. മുൻ സർക്കാരിന്റെ കാലത്ത് വാങ്ങിച്ച് കൂട്ടിയശേഷം, പാക്കറ്റ് പോലും പൊട്ടിക്കാതെ ആശുപത്രികളുടെ ഏതൊക്കെയോ ഇരുട്ടറകളിൽ തള്ളിയിട്ടിരുന്ന കോടിക്കണക്കിന് രൂപയുടെ അത്യാധുനിക ഉപകരണങ്ങളാണ് മുരളീധരൻ മുൻകൈയെടുത്ത് പുറത്തെത്തിച്ചത്. രമേശ് ചെന്നിത്തല രാഷ്ട്രീയത്തിൽ 'ഓപ്പറേഷൻ തൂഫാൻ' നടത്തിയത് പോലെ, ആരോഗ്യ മേഖലയിൽ മുരളീധരൻ നടത്തിയ ഈ തൂഫാൻ റെയ്ഡുകളും പരിശോധനകളും ജനങ്ങൾക്ക് നൽകിയത് വലിയൊരു ആശ്വാസമാണ്. ആരോഗ്യ മന്ത്രിയുടെ ഓഫീസിൽ രാത്രി 12 മണിവരെ വെളിച്ചം അണയുന്നില്ല എന്ന വാർത്തകൾ തന്നെ അദ്ദേഹത്തിന്റെ ജോലിത്തോതിനും ആത്മാർത്ഥതയ്ക്കും തെളിവാണ്. മന്ത്രിയുടെ ഈ അതിവേഗ പ്രവർത്തനരീതിയോടും കൃത്യതയോടും പൊരുത്തപ്പെടാൻ സാധിക്കാതെ ചില ഉദ്യോഗസ്ഥർ മറ്റ് വകുപ്പുകളിലേക്ക് സ്ഥലംമാറിപ്പോകുന്ന കാഴ്ച പോലും നാം കണ്ടു. അത്രമേൽ കർശനവും ജനകീയവുമായാണ് ആരോഗ്യ വകുപ്പ് ഇന്ന് മുന്നോട്ടുപോകുന്നത്...എന്നാൽ, മറുഭാഗത്ത് ദേവസ്വം വകുപ്പിന്റെ കാര്യമെടുക്കുമ്പോൾ സ്ഥിതി അല്പം സങ്കീർണ്ണമാണ്. ദിവസേന പുതിയ പ്രശ്നങ്ങളും വെല്ലുവിളികളുമാണ് അവിടെ ഉയർന്നു വരുന്നത്. ഏറ്റവും ഒടുവിലായി സ്വർണ്ണക്കിരീടം കാണാതെ പോയതിനെക്കുറിച്ചുള്ള അന്വേഷണങ്ങളുടെ വാർത്തകളുമാണ് പുറത്തുവരുന്നത്. അതോടൊപ്പം തന്നെ അരവണ വിതരണത്തിലെ തടസ്സങ്ങൾ, ഭക്തർക്ക് നൽകുന്ന പ്രസാദത്തിന്റെ ഗുണനിലവാരത്തെച്ചൊല്ലിയുള്ള പരാതികൾ, ഇനി വരാനിരിക്കുന്ന വലിയ മണ്ഡലകാല തീർത്ഥാടനത്തെക്കുറിച്ചുള്ള ആശങ്കകൾ എന്നിവയൊക്കെ ദേവസ്വം ബോർഡിന്റെ പ്രവർത്തനങ്ങളെ സംശയനിഴലിലാക്കുന്നുണ്ട്. വരാനിരിക്കുന്ന ഭക്തജനത്തിരക്ക് മുന്നിൽക്കണ്ട് കാര്യക്ഷമമായ നടപടികൾ ഉണ്ടാകുന്നില്ലെന്ന് കണ്ട് കോടതിയെ വരെ സമീപിക്കേണ്ടി വന്ന ഒരു സാഹചര്യവും ഇതോടൊപ്പം നമ്മൾ കണ്ടതാണ്. സ്ഥിതിഗതികൾ കൂടുതൽ നിയന്ത്രണവിധേയമാക്കാൻ ഒരു പുതിയ എഡിഎമ്മിനെ തന്നെ പ്രദേശത്ത് അടിയന്തരമായി നിയമിച്ചതായി മുരളീധരൻ വ്യക്തമാക്കിയിട്ടുണ്ട്....

ദേവസ്വം വകുപ്പിൽ ഇത്രയധികം തടസ്സങ്ങളും പ്രതിസന്ധികളും തുടർച്ചയായി ഉണ്ടാകാൻ കാരണം എന്താണെന്ന് പരിശോധിച്ചാൽ അതിന് പിന്നിലെ രാഷ്ട്രീയ ചിത്രം വ്യക്തമാകും. കഴിഞ്ഞ എൽഡിഎഫ് സർക്കാരിന്റെ കാലത്ത് രൂപീകരിക്കപ്പെട്ട ദേവസ്വം ബോർഡാണ് നിലവിലും ഭരണം തുടരുന്നത്. സ്വാഭാവികമായും ഒരു യുഡിഎഫ് സർക്കാരിന്റെ ഭരണനയങ്ങൾക്കോ നിലപാടുകൾക്കോ അനുസൃതമായി മാത്രം അവർ നീങ്ങണമെന്നില്ല. ആ ഒരു ആശയപരമായ അഭിപ്രായവ്യത്യാസമാണ് പലപ്പോഴും ഭരണപരമായ ഇടർച്ചകൾക്ക് കാരണമാകുന്നത്. എന്നാൽ ഇതിനെയൊക്കെ രാഷ്ട്രീയമായി അതിജീവിക്കാനുള്ള നീക്കങ്ങളും സജീവമാണ്...കഴിഞ്ഞദിവസം ദേവസ്വം ബോർഡ് പ്രസിഡന്റ് ജയകുമാർ നേരിട്ടെത്തി മുഖ്യമന്ത്രിയെ കണ്ടതും, സർക്കാരും ദേവസ്വം ബോർഡും തമ്മിൽ യാതൊരുവിധ ഭിന്നതകളുമില്ലെന്ന് പരസ്യമായി പ്രഖ്യാപിച്ചതും ഒരു വലിയ രാഷ്ട്രീയ സൂചനയാണ്. വരാനിരിക്കുന്ന മണ്ഡലകാലം കുറ്റമറ്റ രീതിയിൽ മുന്നോട്ടുകൊണ്ടുപോകാൻ സർക്കാരും ബോർഡും കൈകോർത്ത് പ്രവർത്തിക്കുമെന്ന പച്ചക്കൊടിയാണ് ഈ കൂടിക്കാഴ്ച നൽകുന്നത്. ഭരണത്തിലെ ഏറ്റവും കടുപ്പമേറിയ രണ്ട് വകുപ്പുകൾ കൈകാര്യം ചെയ്യുമ്പോഴും, ആരോഗ്യ വകുപ്പിൽ വിപ്ലവകരമായ മാറ്റങ്ങൾ കൊണ്ടുവന്നും, ദേവസ്വത്തിലെ സങ്കീർണ്ണമായ പ്രശ്നങ്ങളെ നയതന്ത്രപരമായി പരിഹരിച്ചും കെ. മുരളീധരൻ തന്റെ ഭരണമികവ് തെളിയിച്ചുകൊണ്ടിരിക്കുകയാണ്. വരും ദിവസങ്ങളിൽ ഈ രണ്ട് വകുപ്പുകളിലൂടെയും അദ്ദേഹം നടപ്പിലാക്കാൻ പോകുന്ന പുതിയ മാറ്റങ്ങളിലേക്ക് തന്നെയാണ് എല്ലാവരും ഉറ്റുനോക്കുന്നത്.