മാസപ്പടി കേസ്: പിണറായിക്കെതിരെ കൈക്കൂലി കേസിൽ തെളിവ് ; കേസെടുക്കാമെന്ന് നിയമോപദേശം

തിരുവനന്തപുരം: സി.എം.ആർ.എൽ–എക്സാലോജിക് മാസപ്പടി കേസിൽ മുൻ മുഖ്യമന്ത്രി പിണറായി വിജയനെതിരായ കൈക്കൂലി ആരോപണങ്ങളിൽ പ്രഥമദൃഷ്ട്യാ തെളിവുണ്ടെന്ന് നിയമോപദേശം. എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി.) കൈമാറിയ റിപ്പോർട്ടിന്റെയും രേഖകളുടെയും അടിസ്ഥാനത്തിൽ കേസെടുക്കുന്നതിന് നിയമതടസ്സമില്ലെന്നാണ് നിയമോപദേശത്തിലെ നിലപാടെന്നാണ് റിപ്പോർട്ട്.

പിണറായി വിജയൻ ഉൾപ്പെടെയുള്ളവർക്കെതിരെ അഴിമതി നിരോധന നിയമപ്രകാരം എഫ്.ഐ.ആർ രജിസ്റ്റർ ചെയ്ത് അന്വേഷണം നടത്തുന്നതിനുള്ള സാധ്യതയാണ് പരിശോധിച്ചത്. നേരിട്ട് എഫ്.ഐ.ആർ രജിസ്റ്റർ ചെയ്യുകയോ, അതിന് മുന്നോടിയായി വിജിലൻസ് പ്രാഥമിക അന്വേഷണം നടത്തുകയോ ചെയ്യാമെന്നാണ് നിയമോപദേശത്തിൽ വ്യക്തമാക്കുന്നതായാണ് വിവരം.

മാസപ്പടി ഇടപാടുമായി ബന്ധപ്പെട്ട് ഇ.ഡി. നടത്തിയ അന്വേഷണത്തിൽ ലഭിച്ച രേഖകളും മൊഴികളും ഉൾപ്പെടെയുള്ള വിവരങ്ങളുടെ അടിസ്ഥാനത്തിലാണ് സംസ്ഥാനതലത്തിൽ തുടർനടപടി ആവശ്യപ്പെട്ടത്. പിണറായി വിജയൻ, ടി. വീണ, പി.എ. മുഹമ്മദ് റിയാസ് എന്നിവർക്കെതിരെ അന്വേഷണം ആവശ്യപ്പെട്ട് ഇ.ഡി. സംസ്ഥാന പൊലീസ് മേധാവിക്ക് റിപ്പോർട്ട് നൽകിയിരുന്നു.