വിദ്യാർഥിനികളെ ബാത്ത്റൂമിലേക്ക് പിന്തുടർന്നെന്ന് ആരോപണം; നവാഡയിൽ സ്കൂൾ പ്രിൻസിപ്പൽ അറസ്റ്റിൽ

ബിഹാർ : നവാഡയിൽ സർക്കാർ സ്കൂൾ പ്രിൻസിപ്പലിനെതിരെ വിദ്യാർഥിനികൾ ഉന്നയിച്ച ലൈംഗികാതിക്രമ ആരോപണം വലിയ പ്രതിഷേധത്തിന് ഇടയാക്കി. ആനന്ദ്പുരയിലെ സർക്കാർ സ്കൂളിലെ 52കാരനായ പ്രിൻസിപ്പൽ മഹേഷ് പ്രസാദ് യാദവിനെതിരെയാണ് വിദ്യാർഥിനികൾ ഗുരുതര ആരോപണങ്ങൾ ഉന്നയിച്ചത്. സംഭവത്തിൽ പൊലീസ് പോക്‌സോ നിയമപ്രകാരം കേസെടുത്ത് പ്രിൻസിപ്പലിനെ അറസ്റ്റ് ചെയ്തു. 

വിദ്യാർഥിനികളുടെ മൊഴി പ്രകാരം, പ്രിൻസിപ്പൽ തങ്ങളെ പലപ്പോഴും എടുത്തുയർത്തുകയും കവിളിൽ സ്പർശിക്കുകയും ചെയ്തിരുന്നു. ബാത്ത്റൂമിലേക്ക് പോകുന്ന വിദ്യാർഥിനികളെ പിന്തുടരുകയും അവിടെ ഒളിഞ്ഞുനോക്കാൻ ശ്രമിക്കുകയും ചെയ്തതായും കുട്ടികൾ ആരോപിച്ചു. പരീക്ഷയ്ക്കിടെ ചോദ്യപേപ്പർ വാങ്ങാൻ പ്രിൻസിപ്പലിന്റെ ഓഫീസിലെത്തിയ ഒരു വിദ്യാർഥിനിയോടും മോശമായി പെരുമാറിയെന്നാണ് പരാതിയിൽ പറയുന്നത്. 

വിദ്യാർഥിനികൾ വിവരം രക്ഷിതാക്കളെ അറിയിച്ചതോടെ രക്ഷിതാക്കളും നാട്ടുകാരും സ്കൂൾ പരിസരത്ത് പ്രതിഷേധവുമായി എത്തി. സെപ്റ്റംബർ 18നാണ് സംഭവം പൊലീസിന്റെ ശ്രദ്ധയിൽപ്പെട്ടത്. സ്ഥിതിഗതികൾ നിയന്ത്രിക്കാൻ പൊലീസ് സംഘം സ്ഥലത്തെത്തി. തുടർന്ന് വിദ്യാർഥിനികളുടെ പരാതിയുടെ അടിസ്ഥാനത്തിൽ പ്രിൻസിപ്പലിനെ കസ്റ്റഡിയിലെടുത്ത് ചോദ്യം ചെയ്യുകയും പിന്നീട് ഔദ്യോഗികമായി അറസ്റ്റ് രേഖപ്പെടുത്തുകയുമായിരുന്നു. 

അന്വേഷണത്തിന്റെ ഭാഗമായി വനിതാ പൊലീസ് ഉദ്യോഗസ്ഥയുടെ നേതൃത്വത്തിലുള്ള സംഘം സ്കൂളിലെത്തി വിദ്യാർഥിനികളുടെ മൊഴി രേഖപ്പെടുത്തി. സ്കൂളിലെ സിസിടിവി ദൃശ്യങ്ങളും പൊലീസ് പരിശോധിച്ചു. പരാതിക്കാരികളായ വിദ്യാർഥിനികളെ വൈദ്യപരിശോധനയ്ക്കായി ആശുപത്രിയിലെത്തിക്കുകയും പിന്നീട് കോടതിയിൽ മൊഴി രേഖപ്പെടുത്തുന്നതിനുള്ള നടപടികൾ സ്വീകരിക്കുകയും ചെയ്തു. 

പോക്‌സോ നിയമത്തിലെ വകുപ്പുകൾ ഉൾപ്പെടെ ചുമത്തി കേസെടുത്തതിന് പിന്നാലെ മഹേഷ് പ്രസാദ് യാദവിനെ കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടു. നവാഡ ജില്ലാ ഭരണകൂടത്തിന്റെ റിപ്പോർട്ട് പ്രകാരം, പ്രിൻസിപ്പലിനെ സസ്‌പെൻഡ് ചെയ്തിട്ടുമുണ്ട്. അന്വേഷണം പൂർത്തിയാകുന്നതുവരെ സർവീസ് ചട്ടങ്ങൾ പ്രകാരമുള്ള തുടർനടപടികൾ ഉണ്ടാകുമെന്ന് അധികൃതർ അറിയിച്ചു. 

കേസിന്റെ ഗൗരവം കണക്കിലെടുത്ത് നവാഡ പൊലീസ് സൂപ്രണ്ട് പ്രത്യേക അന്വേഷണ സംഘത്തെയും (SIT) രൂപീകരിച്ചിട്ടുണ്ട്. പൊലീസ് അന്വേഷണം തുടരുകയാണ്.