കുരുന്നു മനസ്സുകളിൽ കരുതലിന്റെ പൊൻചിറകുകൾ; വിദ്യാർഥികൾക്ക് സൗജന്യമായി താറാവുകുഞ്ഞുങ്ങൾ

കുരുന്നു മനസ്സുകളിൽ കരുതലിന്റെ പൊൻചിറകുകൾ; സ്കൂൾ വിദ്യാർഥികൾക്ക് സൗജന്യമായി താറാവുകുഞ്ഞുങ്ങൾ

പുതുതലമുറയെ കാർഷിക സംസ്‌കാരവുമായി ചേർത്തുനിർത്താനും വളർത്തുമൃഗങ്ങളോടും പക്ഷികളോടുമുള്ള സ്‌നേഹവും കരുതലും വളർത്താനും ലക്ഷ്യമിട്ട് മൃഗസംരക്ഷണ വകുപ്പ് നടപ്പാക്കുന്ന പദ്ധതിയാണ് ‘പൊൻചിറകുകൾ’.

കേരള സർക്കാരിന്റെ നൂറുദിന കർമപരിപാടിയുടെ ഭാഗമായി സ്‌കൂളുകളിലെ പൗൾട്രി ക്ലബ്ബുകൾ മുഖേനയാണ് ‘പൊൻചിറകുകൾ’ പദ്ധതി നടപ്പാക്കുന്നത്. പദ്ധതിയുടെ ഭാഗമായി വിദ്യാർഥികൾക്ക് സൗജന്യമായി താറാവുകുഞ്ഞുങ്ങളെ വിതരണം ചെയ്യും.

നാടൻ താറാവ് ജനുസ്സുകളെ വിദ്യാർഥികൾക്ക് പരിചയപ്പെടുത്തുന്നതിനൊപ്പം കൃഷിയോടും മൃഗപരിപാലനത്തോടുമുള്ള താൽപര്യം ചെറുപ്രായത്തിൽ തന്നെ വളർത്തിയെടുക്കുകയാണ് പദ്ധതിയുടെ പ്രധാന ലക്ഷ്യം. പക്ഷികളോടുള്ള സ്‌നേഹവും അവയുടെ സംരക്ഷണവും പരിചരണവും കുട്ടികളിൽ വളർത്താനും പദ്ധതി സഹായിക്കും.

സ്‌കൂൾ തലത്തിൽ പൗൾട്രി ക്ലബ്ബുകളുടെ പ്രവർത്തനങ്ങളുമായി ബന്ധിപ്പിച്ചാണ് പദ്ധതിയുടെ പ്രവർത്തനങ്ങൾ. ഇതിലൂടെ പഠനത്തോടൊപ്പം കാർഷിക-മൃഗപരിപാലന മേഖലകളിൽ പ്രായോഗിക പരിചയം നേടാനും വിദ്യാർഥികൾക്ക് അവസരം ലഭിക്കും. കൃഷിയെയും ജീവജാലങ്ങളെയും അടുത്തറിയുന്ന പുതുതലമുറയെ വളർത്തിയെടുക്കുക എന്ന ലക്ഷ്യത്തോടെയാണ് ‘പൊൻചിറകുകൾ’ പദ്ധതി മുന്നോട്ടുപോകുന്നത്.