സൈനിക സ്കൂളുകളിൽ സ്വകാര്യ സ്ഥാപനങ്ങളുടെ പങ്ക്; കേന്ദ്രത്തോട് ചോദ്യ ശരങ്ങളുമായി രാഹുൽ ഗാന്ധി.
പാർലമെന്ററി പ്രതിരോധ സമിതി യോഗത്തിൽ PPP മാതൃകയിലെ സൈനിക് സ്കൂൾ പദ്ധതി വിശദീകരിക്കാൻ ആവശ്യപ്പെട്ട് പ്രതിപക്ഷ നേതാവ്
Desk Mediagraamam 
ന്യൂഡൽഹി: രാജ്യത്തെ സൈനിക് സ്കൂളുകളുടെ നടത്തിപ്പിൽ സ്വകാര്യ സ്ഥാപനങ്ങളെ ഉൾപ്പെടുത്തുന്ന കേന്ദ്ര സർക്കാരിന്റെ നയത്തെ ചോദ്യം ചെയ്ത് ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി . പാർലമെന്റിന്റെ പ്രതിരോധ കാര്യങ്ങളുമായി ബന്ധപ്പെട്ട സ്ഥിരംസമിതി (Standing Committee on Defence) യോഗത്തിലാണ് അദ്ദേഹം വിഷയമുന്നയിച്ചത്.
കേന്ദ്ര സർക്കാർ രാജ്യത്ത് 100 പുതിയ സൈനിക് സ്കൂളുകൾ പൊതു–സ്വകാര്യ പങ്കാളിത്ത (Public-Private Partnership - PPP) മാതൃകയിൽ ആരംഭിക്കുന്ന പദ്ധതിയാണ് നടപ്പാക്കുന്നത്. ഈ പദ്ധതിപ്രകാരം സർക്കാർ അംഗീകാരം ലഭിച്ച സ്വകാര്യ വിദ്യാഭ്യാസ സ്ഥാപനങ്ങൾ, ട്രസ്റ്റുകൾ, സൊസൈറ്റികൾ തുടങ്ങിയവയ്ക്ക് സൈനിക് സ്കൂൾ മാതൃകയിൽ സ്ഥാപനങ്ങൾ നടത്താൻ അവസരം നൽകുന്ന സംവിധാനമാണ് നിലവിലുള്ളത്.
ഈ സാഹചര്യത്തിൽ, സൈനിക് സ്കൂളുകൾ പോലുള്ള ദേശീയ പ്രാധാന്യമുള്ള സ്ഥാപനങ്ങളുടെ നടത്തിപ്പിൽ സ്വകാര്യ സ്ഥാപനങ്ങൾക്ക് എന്ത് ആവശ്യകതയാണുള്ളത്, വിദ്യാർത്ഥി പ്രവേശനം, അധ്യാപക നിയമനം, പരിശീലന നിലവാരം, സാമ്പത്തിക നിയന്ത്രണം എന്നിവയിൽ സർക്കാർ എങ്ങനെ മേൽനോട്ടം വഹിക്കുന്നു തുടങ്ങിയ കാര്യങ്ങളിൽ രാഹുൽ ഗാന്ധി വിശദീകരണം തേടിയത് . Ministry of Defence ഉദ്യോഗസ്ഥരോടും അദ്ദേഹം ചോദ്യങ്ങൾ ഉന്നയിച്ചു.
യോഗത്തിൽ നിലവിലുള്ള സൈനിക് സ്കൂളുകളുടെ പ്രവർത്തനം, പുതിയ സ്കൂളുകളുടെ പുരോഗതി, പ്രവേശന നടപടികൾ, വിദ്യാർത്ഥികളുടെ നിലവാരം, സൈന്യത്തിലേക്കുള്ള പ്രവേശനത്തിൽ ഇവയുടെ പങ്ക് തുടങ്ങിയ വിഷയങ്ങളും ചർച്ചയായി. Standing Committee on Defence അംഗങ്ങൾ വിവിധ നിർദേശങ്ങളും അഭിപ്രായങ്ങളും മുന്നോട്ടുവച്ചു.
സൈനിക് സ്കൂളുകൾ സ്ഥാപിതമായത് രാജ്യത്തെ വിദ്യാർത്ഥികളിൽ അച്ചടക്കം, നേതൃത്വപാടവം, ദേശസ്നേഹം എന്നിവ വളർത്തുകയും ദേശീയ പ്രതിരോധ അക്കാദമി (NDA) ഉൾപ്പെടെയുള്ള സായുധ സേനാ സ്ഥാപനങ്ങളിലേക്ക് വിദ്യാർത്ഥികളെ സജ്ജമാക്കുകയും ചെയ്യുക എന്ന ലക്ഷ്യത്തോടെയാണ്. കഴിഞ്ഞ കുറച്ച് വർഷങ്ങളായി കൂടുതൽ വിദ്യാർത്ഥികൾക്ക് ഈ അവസരം ലഭ്യമാക്കുന്നതിനായി സർക്കാർ PPP മാതൃകയിൽ പുതിയ സ്കൂളുകൾ ആരംഭിക്കുകയാണ്.
അതേസമയം, ഈ മാതൃകയെ വിമർശിക്കുന്നവർ സൈനിക് സ്കൂളുകളുടെ സ്വഭാവവും നിലവാരവും ദീർഘകാലത്ത് ബാധിക്കപ്പെടാൻ സാധ്യതയുണ്ടെന്നും സർക്കാർ നേരിട്ടുള്ള നിയന്ത്രണം കുറയുമെന്ന ആശങ്കയും ഉയർത്തുന്നുണ്ട്. മറുവശത്ത്, സർക്കാർ കൂടുതൽ ജില്ലകളിലേക്ക് സൈനിക് സ്കൂൾ വിദ്യാഭ്യാസം വ്യാപിപ്പിക്കാനും അടിസ്ഥാന സൗകര്യങ്ങൾ വേഗത്തിൽ വികസിപ്പിക്കാനുമാണ് PPP മാതൃക സ്വീകരിച്ചതെന്നാണ് വിശദീകരിക്കുന്നത്.
