നേതാക്കള്‍ കണ്ണുരുട്ടി; കുന്നുംകുളം പോസ്റ്റ് ശ്രീനിജന്‍ മുക്കി
മാപ്പ് പറയണമെന്ന സാബു എം ജേക്കബിന്റെ ആവശ്യത്തെ പരിഹസിച്ച് പി.വി. ശ്രീനിജിന്‍ എംഎല്‍എ ഫേസ്ബുക്കിലിട്ട പോസ്റ്റ് പിന്‍വലിച്ചു. തൃക്കാക്കര ഇലക്ഷനില്‍ ആര്‍ക്ക് പിന്തുണ നല്‍കുമെന്നത സംബന്ധിച്ച് ട്വന്റി20യും ആം ആദ്മിയും ചേര്‍ന്ന് രൂപം നല്‍കിയ മുന്നണി യോഗം കൊച്ചിയില്‍ ചേരാനിരിക്കെയാണ് പോസ്റ്റ് പിന്‍വലിച്ചത്. ഇത് സംബന്ധിച്ച് സിപിഎം നേതൃത്വം ഇടപെട്ടതായും സൂചനയുണ്ട്. ട്വന്റി ട്വന്റിയോട് വോട്ട് ചോദിക്കും മുമ്പ് ട്വന്റി-20ക്കെതിരെ നടത്തിയ അക്രമങ്ങളില്‍ പി.വി. ശ്രീനിജിന്‍ എംഎല്‍എ മാപ്പ് പറയണമെന്ന് സാബു എം.ജേക്കബ് നേരത്തെ ആവശ്യപ്പെട്ടിരുന്നു. ഇതിനെ പരിഹസിച്ചുകൊണ്ടാണ് പി.വി. ശ്രീനിജിന്‍ എംഎല്‍എ ഫേസ്ബുക്ക് പോസ്റ്റിട്ടത്. ആരുടെ കൈയ്യിലെങ്കിലും കുന്നംകുളം മാപ്പ് ഉണ്ടെങ്കില്‍ തരണേ ഒരാള്‍ക്ക് കൊടുക്കാനാണ് എന്നായിരുന്നു പി.വി. ശ്രീനിജിന്റെ പരിഹാസം. തൃക്കാക്കര ഉപതെരഞ്ഞെടുപ്പില്‍ ഏത് മുന്നണിക്ക് പിന്തുണ നല്‍കുമെന്ന കാര്യത്തില്‍ തീരുമാനമെടുക്കാന്‍ ഉടന്‍ പ്രത്യേക യോഗം ചേരുമെന്ന് ട്വന്റി ട്വന്റി ചീഫ് കോ ഓര്‍ഡിനേറ്റര്‍ സാബു ജേക്കബ് വ്യക്തമാക്കിയിരുന്നു.
