കേരളത്തിൽ ഇന്നും നാളെയും ഇടിമിന്നലോടുകൂടിയ മഴ; 40 km/h വരെ ശക്തമായ കാറ്റിന് സാധ്യത

തിരുവനന്തപുരം: കേരളത്തിൽ ഒറ്റപ്പെട്ടയിടങ്ങളിൽ ഇന്നും, നാളെയും ഇടിമിന്നലോടുകൂടിയ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇടിമിന്നൽ സാധ്യത കണക്കിലെടുത്ത് പൊതുജനങ്ങൾ ജാഗ്രത പാലിക്കണമെന്ന് IMD, KSEOC, KSDMA എന്നിവർ നിർദേശിച്ചു.

കാർമേഘങ്ങൾ കണ്ടുതുടങ്ങുമ്പോൾ തന്നെ മുൻകരുതൽ സ്വീകരിക്കണം. ഇടിമിന്നലിന്റെ ആദ്യ സൂചന ലഭിച്ചാൽ തുറസായ സ്ഥലങ്ങളിൽ തുടരാതെ സുരക്ഷിതമായ കെട്ടിടത്തിനുള്ളിലേക്ക് മാറണം. ജനലുകൾക്കും വാതിലുകൾക്കും സമീപം നിൽക്കാതിരിക്കുകയും ശക്തമായ കാറ്റിന്റെ സമയത്ത് വീടിനുള്ളിൽ തന്നെ തുടരുകയും വേണം.

ഇടിമിന്നലുള്ള സമയത്ത് വൈദ്യുതോപകരണങ്ങളുമായുള്ള സാമീപ്യം ഒഴിവാക്കണം. സാധ്യമെങ്കിൽ ഗൃഹോപകരണങ്ങളുടെ വൈദ്യുതി ബന്ധം വിച്ഛേദിക്കണം. ടെലിഫോൺ ഉപയോഗം ഒഴിവാക്കുന്നതാണ് സുരക്ഷിതം. അതേസമയം മൊബൈൽ ഫോൺ ഉപയോഗിക്കുന്നത് അപകടകരമല്ലെന്നും മുന്നറിയിപ്പിൽ പറയുന്നു.

തുറസായ സ്ഥലങ്ങളിലും ടെറസുകളിലും കുട്ടികൾ ഉൾപ്പെടെ കളിക്കുന്നത് ഒഴിവാക്കണം. മരങ്ങളുടെ ചുവട്ടിൽ നിൽക്കുകയോ വാഹനങ്ങൾ മരച്ചുവട്ടിൽ പാർക്ക് ചെയ്യുകയോ ചെയ്യരുത്. ഇടിമിന്നൽ ഉണ്ടാകുമ്പോൾ വാഹനത്തിനുള്ളിൽ തന്നെ തുടരുന്നതാണ് സുരക്ഷിതം. സൈക്കിൾ, ബൈക്ക്, ട്രാക്ടർ തുടങ്ങിയ വാഹനങ്ങളിലുള്ള യാത്ര പരമാവധി ഒഴിവാക്കി സുരക്ഷിതമായ കെട്ടിടത്തിൽ അഭയം തേടണമെന്നും നിർദേശമുണ്ട്.

ഇടിമിന്നൽ സമയത്ത് കുളിക്കുകയോ ടാപ്പുകളിൽ നിന്ന് വെള്ളം ശേഖരിക്കുകയോ ചെയ്യരുത്. ജലാശയങ്ങളിൽ കുളിക്കാനും മീൻപിടിക്കാനും ഇറങ്ങരുത്. മത്സ്യബന്ധനം, ബോട്ടിങ് തുടങ്ങിയ പ്രവർത്തനങ്ങൾ കാർമേഘങ്ങൾ കണ്ടുതുടങ്ങുമ്പോൾ തന്നെ നിർത്തി സുരക്ഷിതമായി കരയിലെത്തണം. ബോട്ടിന്റെ ഡെക്കിൽ നിൽക്കുന്നതും ചൂണ്ടയിടുന്നതും വലയെറിയുന്നതും ഒഴിവാക്കണം.

കാറ്റിൽ മറിഞ്ഞുവീഴാൻ സാധ്യതയുള്ള വസ്തുക്കൾ സുരക്ഷിതമായി കെട്ടിവയ്ക്കണം. പട്ടം പറത്തുന്നതും ടെറസിലോ ഉയർന്ന സ്ഥലങ്ങളിലോ വൃക്ഷക്കൊമ്പുകളിലോ ഇരിക്കുന്നതും ഒഴിവാക്കണം. വളർത്തുമൃഗങ്ങളെയും തുറസായ സ്ഥലത്ത് കെട്ടിയിടരുത്.

അടുത്തുള്ള കെട്ടിടത്തിലേക്ക് മാറാൻ കഴിയാത്തവിധം തുറസായ സ്ഥലത്ത് അകപ്പെട്ടാൽ പാദങ്ങൾ ചേർത്തുവച്ച് തല കാൽമുട്ടുകൾക്കിടയിൽ ഒതുക്കി ചുരുണ്ടിരിക്കാൻ അധികൃതർ നിർദേശിച്ചു.

മിന്നലേറ്റ വ്യക്തിയുടെ ശരീരത്തിൽ വൈദ്യുത പ്രവാഹം തുടരുന്നില്ല. അതിനാൽ മിന്നലേറ്റയാൾക്ക് പ്രഥമശുശ്രൂഷ നൽകാൻ മടിക്കരുത്. മിന്നലേറ്റതിന് ശേഷമുള്ള ആദ്യ 30 സെക്കൻഡ് ജീവൻ രക്ഷിക്കുന്നതിൽ നിർണായകമാണെന്നും ഉടൻ വൈദ്യസഹായം ലഭ്യമാക്കണമെന്നും അധികൃതർ അറിയിച്ചു.

ഇടിമിന്നൽ സാധ്യത മനസ്സിലാക്കുന്നതിനായി കേന്ദ്ര കാലാവസ്ഥ വകുപ്പ് തയ്യാറാക്കിയ ‘ദാമിനി’ മൊബൈൽ ആപ്ലിക്കേഷൻ ഉപയോഗിക്കാം. ശക്തമായ കാറ്റിനെ നേരിടാനുള്ള സുരക്ഷാ നിർദേശങ്ങൾ KSDMAയുടെ ഔദ്യോഗിക സംവിധാനങ്ങളിലും ലഭ്യമാണ്.