ഓട്ടോണമസ് എന്നത് എന്ത് തോന്ന്യാസവും കാണിക്കാനുള്ള അധികാരമല്ല; തീരുമാനമെടുക്കാൻ ഒരു മരണം വേണ്ടിവന്നു

കോതമംഗലം: അരുണാചൽ പ്രദേശ് സ്വദേശിയായ ബിടെക് വിദ്യാർത്ഥി മിചി മാർപുവിന്റെ മരണത്തിന് പിന്നാലെ കോതമംഗലം എം.എ. കോളേജ് ഓഫ് എൻജിനീയറിങ്ങിൽ വിദ്യാർത്ഥി പ്രതിഷേധം ശക്തമാകുന്നു. കോളേജിന്റെ അക്കാദമിക് നയങ്ങളും ‘വർഷം നഷ്ടപ്പെടുന്ന’ (Year Back) സംവിധാനവും വിദ്യാർത്ഥികളിൽ വലിയ ആശങ്കയും പ്രതിഷേധവും ഉയർത്തിയിരിക്കുകയാണ്.

ഓട്ടോണമസ് പദവി ലഭിച്ച കോളേജിന് സ്വന്തം അക്കാദമിക് തീരുമാനങ്ങൾ എടുക്കാനുള്ള അധികാരമുണ്ടെങ്കിലും, വിദ്യാർത്ഥികളുടെ ഭാവിയെ നേരിട്ട് ബാധിക്കുന്ന തീരുമാനങ്ങൾ എടുക്കുമ്പോൾ ഉത്തരവാദിത്തവും സുതാര്യതയും ഉറപ്പാക്കേണ്ടതില്ലേയെന്ന ചോദ്യമാണ് ഇപ്പോൾ ഉയരുന്നത്. “ഓട്ടോണമസ് എന്നത് എന്ത് തോന്ന്യാസവും കാണിക്കാനുള്ള അധികാരമല്ല” എന്ന നിലപാടിലാണ് പ്രതിഷേധിക്കുന്ന വിദ്യാർത്ഥികൾ.

എം.എ. കോളേജിൽ അഞ്ചാം സെമസ്റ്ററിലേക്ക് പ്രവേശിക്കാൻ കുറഞ്ഞത് 22 ക്രെഡിറ്റ് വേണമെന്ന മാനദണ്ഡമാണ് വിദ്യാർത്ഥികളുടെ പ്രധാന പരാതികളിലൊന്ന്. കേരള ടെക്നോളജിക്കൽ യൂണിവേഴ്സിറ്റിയുമായി (KTU) അഫിലിയേറ്റ് ചെയ്ത കോളേജുകളിൽ 18 ക്രെഡിറ്റാണ് ആവശ്യമായതെന്ന് വിദ്യാർത്ഥി സംഘടനകൾ ചൂണ്ടിക്കാട്ടുന്നു. മിചി മാർപുവിന് 19 ക്രെഡിറ്റായിരുന്നു ലഭിച്ചിരുന്നത്.

ക്രെഡിറ്റ് മാനദണ്ഡത്തിൽ മാറ്റം വരുത്തിയ വിവരം നേരത്തെ നോട്ടീസ് ബോർഡിലൂടെയോ വാട്സ്ആപ്പ് ഗ്രൂപ്പുകളിലൂടെയോ കൃത്യമായി അറിയിച്ചിരുന്നില്ലെന്നാണ് വിദ്യാർത്ഥികളുടെ ആരോപണം. അഞ്ചാം സെമസ്റ്റർ രജിസ്ട്രേഷന്റെ സമയത്താണ് ചില വിദ്യാർത്ഥികൾക്ക് തങ്ങളുടെ പേരുകൾ റോളിൽ ഇല്ലെന്ന് മനസ്സിലായതെന്നും സഹപാഠികൾ പറയുന്നു.

മിചി മാർപുവിന്റെ മരണത്തിന് പിന്നാലെ വിദ്യാർത്ഥികൾ കോളേജിന് മുന്നിൽ പ്രതിഷേധിച്ചു. കുടുംബത്തിന് നഷ്ടപരിഹാരം നൽകുക, മാനേജ്മെന്റ് ഉത്തരവാദിത്തം ഏറ്റെടുക്കുക, വർഷം നഷ്ടപ്പെടുന്ന സംവിധാനം ഒഴിവാക്കുക, സപ്ലിമെന്ററി പരീക്ഷകൾ നടത്തുക തുടങ്ങിയ ആവശ്യങ്ങളാണ് വിദ്യാർത്ഥികൾ ഉന്നയിക്കുന്നത്. ആവശ്യങ്ങൾ പരിഹരിക്കുന്നതുവരെ ക്ലാസുകളിൽ പ്രവേശിക്കില്ലെന്ന നിലപാടും വിദ്യാർത്ഥികൾ സ്വീകരിച്ചിട്ടുണ്ട്.

സംഭവത്തിൽ ഉന്നത വിദ്യാഭ്യാസ മന്ത്രി റോജി എം. ജോൺ വിശദമായ അന്വേഷണം നടത്തുമെന്ന് വ്യക്തമാക്കിയിട്ടുണ്ട്. KTU വർഷം നഷ്ടപ്പെടുന്ന സംവിധാനം ഈ വർഷത്തേക്ക് ഒഴിവാക്കാൻ തീരുമാനിച്ചിട്ടും, ഓട്ടോണമസ് കോളേജായ എം.എ. കോളേജ് സ്വന്തം അക്കാദമിക് കൗൺസിലിന്റെ അധികാരം ഉപയോഗിച്ച് സംവിധാനം തുടരുകയായിരുന്നുവെന്നാണ് മന്ത്രിയുടെ വിശദീകരണം.

ഒരു വിദ്യാർത്ഥിയുടെ ജീവൻ നഷ്ടപ്പെട്ടതിന് ശേഷമാണോ ഇത്തരം തീരുമാനങ്ങൾ പുനഃപരിശോധിക്കേണ്ടത് എന്നതാണ് ഇപ്പോൾ ഉയരുന്ന ഏറ്റവും വലിയ ചോദ്യം. സ്വയംഭരണാവകാശം വിദ്യാർത്ഥികളുടെ അവകാശങ്ങളെയും മാനസിക സമ്മർദ്ദങ്ങളെയും മറികടക്കാനുള്ള അനുമതിയല്ലെന്ന സന്ദേശമാണ് പ്രതിഷേധം നൽകുന്നത്.