ഷോർട്ട് ഫിലിമിലൂടെ ശ്രദ്ധേയയായി കസബയിൽ നിന്നൊരു താരം; സിനിമയിലേക്ക് ചുവടുവെച്ച് മയൂര

കാസർകോട് കസബയിലെ കലാലോകത്ത് നിന്ന് ഷോർട്ട് ഫിലിമിലൂടെ ശ്രദ്ധേയയായ മയൂര ഇനി സിനിമയിലേക്ക്. കലയോടുള്ള അടങ്ങാത്ത മോഹമാണ് മയൂരയെ അഭിനയരംഗത്തേക്ക് എത്തിച്ചത്. ഷോർട്ട് ഫിലിമുകളിലെ ശ്രദ്ധേയമായ വേഷങ്ങൾക്ക് പിന്നാലെ സിനിമയിലേക്കുള്ള അവസരങ്ങളുടെ വാതിലും തുറന്നിരിക്കുകയാണ് ഈ കലാകാരിക്ക്.

നെല്ലിക്കുന്ന് ഗവ. ഗേൾസ് സ്കൂളിൽ പഠിക്കുന്ന കാലത്തുതന്നെ കലാരംഗത്ത് മികവ് തെളിയിച്ചിരുന്ന മയൂരയ്ക്ക് അധ്യാപകരുടെയും സഹപാഠികളുടെയും വലിയ പിന്തുണ ലഭിച്ചിരുന്നു. സ്കൂൾ യൂത്ത് ഫെസ്റ്റിവലിൽ ആൺശബ്ദം അനുകരിച്ച പ്രകടനമാണ് അഭിനയരംഗത്തേക്കുള്ള ആത്മവിശ്വാസം വർധിപ്പിച്ചത്. തുടർന്ന് നാടകവേദിയിലും സജീവമായി. കോവിഡ് കാലത്ത് നാടകപ്രവർത്തനങ്ങൾ നിലച്ചതോടെ സുഹൃത്തുക്കൾക്കൊപ്പം തുടങ്ങിയ വാട്സാപ്പ് കൂട്ടായ്മയിലൂടെയാണ് പുതിയ അവസരങ്ങൾ തേടിയെത്തിയത്.

അതിനിടെയാണ് ഷോർട്ട് ഫിലിം സംവിധായകൻ എ.എസ്. അജിത് കുമാറുമായി പരിചയപ്പെടുന്നത്. മയൂരയുടെ അഭിനയം ശ്രദ്ധിച്ച അജിത് കുമാർ ശ്രീ മുത്തപ്പനെക്കുറിച്ചുള്ള ഷോർട്ട് ഫിലിമിലും ‘വിഷുക്കണി’യിലും ശ്രദ്ധേയമായ വേഷങ്ങൾ നൽകി. തുടർന്ന് അജിത് കുമാറിന്റെ ‘കാവൽ’ എന്ന ഷോർട്ട് ഫിലിമിൽ നായികയായും മയൂര എത്തി. ചിത്രത്തിന്റെ റിലീസിന് പിന്നാലെ കസബയിൽ ലഭിച്ച സ്വീകരണവും നാട്ടിൽ ഉയർന്ന അനുമോദന ഫ്ലക്സ് ബോർഡുകളും മറക്കാനാകാത്ത അനുഭവമായിരുന്നെന്ന് മയൂര പറയുന്നു. ഫോർച്യൂൺ ക്രിയേഷൻസിന്റെ ബാനറിൽ ആ ഫ്ലക്സ് ബോർഡുകൾ ഒരുക്കിയതും മയൂര തന്നെയായിരുന്നു.

പിന്നീട് നിരവധി ഷോർട്ട് ഫിലിമുകളിലേക്ക് അവസരങ്ങൾ ലഭിച്ചു. ഇപ്പോൾ റിലീസിനൊരുങ്ങുന്ന ‘കാലാമുഖി’യിലാണ് മയൂര മുഴുനീള വേഷത്തിലെത്തുന്നത്. എ.എസ്. അജിത് കുമാർ സംവിധാനം ചെയ്യുന്ന ചിത്രത്തിന്റെ കഥ, തിരക്കഥ, എഡിറ്റിങ്, ക്യാമറ എന്നിവ രാജീവ് കൗതുകമാണ് നിർവഹിച്ചത്. പുരുഷവിരോധികളായ രണ്ട് യുവതികളുടെ ജീവിതവും അവരെ കീഴ്പ്പെടുത്താൻ ശ്രമിക്കുന്ന യുവാവും ലഹരിയുടെ പിടിയിൽ ജീവിതം നഷ്ടപ്പെടുന്നവരുമെല്ലാം ചിത്രത്തിന്റെ പ്രമേയത്തിന്റെ ഭാഗമാണ്. ഒരു മണിക്കൂർ ദൈർഘ്യമുള്ള ചിത്രത്തിന്റെ ടീസർ ഓണദിനത്തിൽ പുറത്തിറങ്ങി. ടീസറിന് ലഭിച്ച സ്വീകാര്യത മയൂരയുടെ ആത്മവിശ്വാസം വർധിപ്പിച്ചിട്ടുണ്ട്.

“ഇനി ലക്ഷ്യം സിനിമയാണ്. നിരവധി സംവിധായകരും നിർമ്മാതാക്കളും വിളിച്ചിട്ടുണ്ട്. കൂടുതൽ സെലക്ടീവായി മുന്നോട്ട് പോകാനാണ് തീരുമാനം,” മയൂര പറയുന്നു.

കുടുംബത്തിലെ പ്രാരാബ്ധങ്ങളെ തുടർന്ന് ഏതാനും വർഷം ഷാർജയിൽ ജോലി ചെയ്തിരുന്ന മയൂര, കലയോടുള്ള അടങ്ങാത്ത ആഗ്രഹമാണ് വീണ്ടും അഭിനയരംഗത്തേക്ക് തിരികെയെത്തിച്ചതെന്ന് പറയുന്നു. ഭർത്താവ് സന്തോഷ് ബാബുവും മക്കളായ ജഗന്നാഥും ജനനിയും ഉൾപ്പെടെ കുടുംബവും നാട്ടുകാരും പൂർണ പിന്തുണയുമായി കൂടെയുണ്ട്. അഭിനയരംഗത്തേക്ക് എത്തിച്ചതിൽ എ.എസ്. അജിത് കുമാറിനും രാജീവ് കൗതുകത്തിനും തീരാത്ത കടപ്പാടുണ്ടെന്നും മയൂര പറയുന്നു.

അഭിനയത്തിന് പുറമെ നന്നായി പാടാനും കഴിയുമെന്നൊരു പ്രത്യേകതയും മയൂരയ്ക്കുണ്ട്.

കാസർകോട്ടെ കൊച്ചു കസബയിൽ നിന്ന് ഷോർട്ട് ഫിലിമിലൂടെ ചുവടുവെച്ച ഈ കലാകാരിയുടെ ലക്ഷ്യം ഇനി സിനിമയാണ്. പുതിയ അവസരങ്ങൾ തേടിയെത്തുമ്പോൾ, മയൂരയുടെ അഭിനയജീവിതത്തിനും വലിയ പ്രതീക്ഷകളാണ് മുന്നിലുള്ളത്.