പാലക്കാട് സിപിഎമ്മിൽ വീണ്ടും വിവാദം; ജില്ലാ നേതാവിനെതിരെ ഭാര്യയുടെ ഗുരുതര പരാതി

പാലക്കാട്: സി.പി.എം. പാലക്കാട് ജില്ലാ കമ്മിറ്റി അംഗവും ഡി.വൈ.എഫ്.ഐ. ജില്ലാ നേതാവുമായ വ്യക്തിക്കെതിരെ ഭാര്യയുടെ ഗുരുതര പരാതി. പ്രാദേശിക പാർട്ടി നേതാവായ മറ്റൊരു സ്ത്രീയുമായി ഭർത്താവ് അവിഹിത ബന്ധം പുലർത്തുന്നുവെന്നാണ് ഭാര്യയുടെ പ്രധാന ആരോപണം. സംഭവത്തിൽ പാർട്ടി സംസ്ഥാന സെക്രട്ടറി എം.വി. ഗോവിന്ദനും പാലക്കാട് ജില്ലാ സെക്രട്ടറിക്കും പരാതി നൽകിയിട്ട് മൂന്ന് മാസത്തോളമായിട്ടും തുടർ അച്ചടക്ക നടപടി ഉണ്ടായിട്ടില്ലെന്നാണ് പരാതിക്കാരിയുടെ ആരോപണം.

സംസ്ഥാന നേതൃത്വത്തിന്റെ നിർദേശപ്രകാരം എം.പി. കെ. രാധാകൃഷ്ണൻ പ്രാഥമിക അന്വേഷണം നടത്തുകയും പരാതിക്കാരിയുടേയും ബന്ധപ്പെട്ടവരുടേയും മൊഴിയെടുക്കുകയും ചെയ്തിരുന്നു. എന്നാൽ ഇതിന് പിന്നാലെ കാര്യമായ തുടർനടപടികൾ ഉണ്ടായില്ലെന്നാണ് ആരോപണം. നേരത്തെ ബന്ധത്തെക്കുറിച്ച് ചോദ്യം ചെയ്തപ്പോൾ ഇനി ആവർത്തിക്കില്ലെന്ന് നേതാവ് ഉറപ്പുനൽകിയിരുന്നെങ്കിലും പിന്നീട് ബന്ധം തുടരുകയായിരുന്നുവെന്നും, ഇടതുപക്ഷത്തിന് കനത്ത തെരഞ്ഞെടുപ്പ് തിരിച്ചടി നേരിട്ട ദിവസങ്ങളിൽ പോലും ഇത് തുടർന്നുവെന്നും ഭാര്യ പരാതിയിൽ വ്യക്തമാക്കിയതായി റിപ്പോർട്ടുകളുണ്ട്.

ജില്ലാ നേതൃത്വത്തിൽ നിന്ന് നീതി ലഭിച്ചില്ലെന്ന ആരോപണവും പരാതിക്കാരി ഉന്നയിക്കുന്നു. വിവാദം നിലനിൽക്കുന്നതിനിടയിലും ബന്ധപ്പെട്ട നേതാവിന് ഡി.വൈ.എഫ്.ഐ. സമ്മേളനത്തിൽ വീണ്ടും ജില്ലാ നേതൃസ്ഥാനം ലഭിച്ചതാണ് പാർട്ടിക്കുള്ളിൽ വിമർശനത്തിന് ഇടയാക്കിയിരിക്കുന്നത്. സിപിഎം അനുഭാവിയായ പരാതിക്കാരി ഒടുവിൽ സംസ്ഥാന നേതൃത്വത്തെ സമീപിക്കുകയായിരുന്നു. പാർട്ടിയുടെ സംഘടനാപരമായ വീഴ്ചകളും തെരഞ്ഞെടുപ്പ് പരാജയങ്ങളും വിലയിരുത്തുന്ന ഘട്ടത്തിലാണ് പുതിയ വിവാദവും ചർച്ചയാകുന്നത്.