ഇലക്ഷൻ കമ്മീഷനെതിരെ പ്രതിഷേധം; പ്രകാശ് രാജിനെ ബെംഗളൂരു പൊലീസ് കസ്റ്റഡിയിലെടുത്തു

ബെംഗളൂരു: കർണാടകയിലെ വോട്ടർപട്ടികയുടെ പ്രത്യേക തീവ്ര പരിഷ്‌കരണമായ SIR (Special Intensive Revision) നടപടിക്കെതിരെ നടന്ന പ്രതിഷേധത്തിനിടെ നടനും സാമൂഹിക പ്രവർത്തകനുമായ പ്രകാശ് രാജിനെ ബെംഗളൂരു പൊലീസ് കസ്റ്റഡിയിലെടുത്തു. ഫ്രീഡം പാർക്കിൽ നിന്ന് തിരഞ്ഞെടുപ്പ് കമ്മീഷൻ ഓഫീസിലേക്ക് നടത്തിയ ‘Election Commission Chalo’ മാർച്ചിനിടെയാണ് പൊലീസ് നടപടി. 

SIR നടപടിയിൽ വോട്ടർമാരുടെ പേരുകൾ നീക്കം ചെയ്യുന്നതിലും വിവിധ വിഭാഗങ്ങളിലായി വോട്ടർമാരെ ഉൾപ്പെടുത്തുന്നതിലും സുതാര്യതയില്ലെന്ന് ആരോപിച്ചാണ് പ്രതിഷേധം. നടൻ കിഷോർ ഉൾപ്പെടെയുള്ളവരും പ്രതിഷേധത്തിൽ പങ്കെടുത്തു. തിരഞ്ഞെടുപ്പ് കമ്മീഷൻ ഓഫീസിലേക്ക് മാർച്ച് നടത്താൻ ശ്രമിച്ച പ്രതിഷേധക്കാരെ പൊലീസ് തടയുകയും തുടർന്ന് പ്രകാശ് രാജ് അടക്കമുള്ളവരെ മുൻകരുതൽ നടപടിയുടെ ഭാഗമായി കസ്റ്റഡിയിലെടുക്കുകയുമായിരുന്നു. 

SIR പിൻവലിക്കണമെന്നാണ് പ്രകാശ് രാജിന്റെ ആവശ്യം. SIR പിൻവലിക്കുന്നതുവരെ പോരാട്ടം തുടരുമെന്നും വിഷയത്തിൽ കോടതിയെ സമീപിക്കുമെന്നും പ്രകാശ് രാജ് പ്രതിഷേധത്തിനിടെ പ്രതികരിച്ചു. ഓരോ പൗരന്റെയും അവകാശങ്ങൾക്കായി പോരാടുമെന്നും അദ്ദേഹം വ്യക്തമാക്കി. 

കർണാടകയിലെ ഡ്രാഫ്റ്റ് വോട്ടർപട്ടികയിൽ ഒരു കോടിയിലധികം പേരുകൾ ‘Absent, Shifted, Dead, Duplicate and Others’ വിഭാഗത്തിൽ ഉൾപ്പെടുത്തിയതിനെതിരെയും പ്രതിഷേധക്കാർ ആശങ്ക ഉയർത്തി. അർഹരായ വോട്ടർമാരുടെ പേരുകൾ ഒഴിവാക്കപ്പെടുന്ന സാഹചര്യം ഒഴിവാക്കണമെന്നും, പട്ടികയിൽ നിന്ന് നീക്കം ചെയ്യപ്പെട്ടവർക്ക് തങ്ങളുടെ യോഗ്യത തെളിയിക്കാൻ അവസരം നൽകണമെന്നും പ്രതിഷേധക്കാർ ആവശ്യപ്പെട്ടു.