UGC-NET പരീക്ഷാ വീഴ്ച: മോദി മറുപടി പറയണം; സർക്കാരിനെതിരെ ജയറാം രമേശ്

ന്യൂഡൽഹി: UGC-NET ജൂൺ 2026 പരീക്ഷയുമായി ബന്ധപ്പെട്ട് ദേശീയ ടെസ്റ്റിംഗ് ഏജൻസിയുടെ (NTA) ഭാഗത്തുണ്ടായ വീഴ്ചകളിൽ പ്രധാനമന്ത്രി നരേന്ദ്ര മോദി മറുപടി പറയണമെന്ന് കോൺഗ്രസ് ജനറൽ സെക്രട്ടറി ജയറാം രമേശ്. പരീക്ഷാ നടത്തിപ്പിലെ ഗുരുതര പിഴവുകൾ ചൂണ്ടിക്കാട്ടിയാണ് അദ്ദേഹം കേന്ദ്രസർക്കാരിനെതിരെ വിമർശനം ഉന്നയിച്ചത്.

ഇംഗ്ലീഷ്, കൊമേഴ്‌സ്, സോഷ്യോളജി വിഷയങ്ങളിലെ ചോദ്യപേപ്പറുകളിൽ അക്ഷരത്തെറ്റുകൾ, തെറ്റായ പുസ്തകങ്ങളുടെ പേരുകൾ, വ്യാകരണ പിശകുകൾ, നേരത്തെ ചോദിച്ച ചോദ്യങ്ങളുടെ ആവർത്തനം തുടങ്ങിയ വീഴ്ചകൾ ഉണ്ടായതായി NTA നിയോഗിച്ച സമിതി തന്നെ കണ്ടെത്തിയതായി ജയറാം രമേശ് ആരോപിച്ചു.

പരീക്ഷ കഴിഞ്ഞ് ഏകദേശം രണ്ട് മാസത്തിന് ശേഷമാണ് ഈ പിഴവുകൾ ഔദ്യോഗികമായി പുറത്തുവന്നതെന്നും അദ്ദേഹം ചൂണ്ടിക്കാട്ടി. NTAയുടെ വീഴ്ചകളുടെ ഉത്തരവാദിത്തം പ്രധാനമന്ത്രി ഏറ്റെടുക്കുമോ എന്ന ചോദ്യവും കോൺഗ്രസ് ഉന്നയിച്ചു.

സിസ്റ്റത്തിന്റെ പിഴവുകൾ കാരണം വിദ്യാർഥികൾ വീണ്ടും പരീക്ഷയെഴുതേണ്ട സാഹചര്യം എന്തിനാണെന്നും ജയറാം രമേശ് ചോദിച്ചു. പരീക്ഷയ്ക്കായി തയ്യാറെടുത്ത വിദ്യാർഥികൾക്ക് വീണ്ടും പരീക്ഷയെഴുതേണ്ടി വരുന്നത് അനാവശ്യമായ ബുദ്ധിമുട്ടുണ്ടാക്കുന്നതായും കോൺഗ്രസ് വിമർശിച്ചു.

അതേസമയം, പിഴവുകൾ കണ്ടെത്തിയ ഇംഗ്ലീഷ്, കൊമേഴ്‌സ്, സോഷ്യോളജി വിഷയങ്ങളിലെ UGC-NET പരീക്ഷകൾ വീണ്ടും നടത്താൻ NTA തീരുമാനിച്ചിട്ടുണ്ട്. സെപ്റ്റംബർ 9, 10 തീയതികളിലാണ് പുനഃപരീക്ഷ നടത്താൻ തീരുമാനിച്ചിരിക്കുന്നത്.