വാട്സ്ആപ്പ് യൂസർനെയിം ഫീച്ചറിന് കേന്ദ്രത്തിന്റെ പൂട്ട് ; തട്ടിപ്പുകാർക്ക് പുതിയ വാതിലാകുമെന്ന് ആശങ്ക.
ഫോൺ നമ്പറിന് പകരം യൂസർനെയിം സംവിധാനം; സുരക്ഷാ ആശങ്ക ഉയർത്തി കേന്ദ്ര സർക്കാർ.
Desk Mediagraamam 
വാട്സ്ആപ്പിന്റെ പുതിയ 'യൂസർനെയിം' ഫീച്ചറിന് കേന്ദ്രത്തിന്റെ നിരീക്ഷണം; തട്ടിപ്പുകൾ വർധിക്കുമെന്ന ആശങ്ക
ന്യൂഡൽഹി: ഫോൺ നമ്പർ പരസ്യമാക്കാതെ വാട്സ്ആപ്പ് ഉപയോഗിക്കാൻ സഹായിക്കുന്ന പുതിയ ‘യൂസർനെയിം’ ഫീച്ചർ കേന്ദ്ര സർക്കാരിന്റെ നിരീക്ഷണത്തിൽ. സുരക്ഷാ ഏജൻസികളുടെയും കേന്ദ്ര ഐടി മന്ത്രാലയത്തിന്റെയും വിശദമായ പരിശോധനയ്ക്ക് ശേഷമേ ഈ ഫീച്ചർ ഇന്ത്യയിൽ പൂർണമായി നടപ്പാക്കൂവെന്നാണ് റിപ്പോർട്ടുകൾ സൂചിപ്പിക്കുന്നത്.
വ്യാജ അക്കൗണ്ടുകൾ സൃഷ്ടിച്ച് ആളുകളെ തെറ്റിദ്ധരിപ്പിക്കുന്ന ‘ഇംപേഴ്സണേഷൻ’, ഓൺലൈൻ തട്ടിപ്പുകൾ തുടങ്ങിയവ വർധിക്കുമെന്ന ആശങ്കയാണ് കേന്ദ്രത്തിന്റെ ഇടപെടലിന് കാരണമായത്.
ഉപഭോക്താക്കളുടെ സ്വകാര്യത വർധിപ്പിക്കുന്നതിനായി ഫോൺ നമ്പറിന് പകരം ഇൻസ്റ്റാഗ്രാം, ടെലിഗ്രാം എന്നിവയിലേതുപോലെ തനതായ യൂസർനെയിം ഉപയോഗിച്ച് ചാറ്റ് ചെയ്യാനുള്ള ഫീച്ചറാണ് മെറ്റയുടെ ഉടമസ്ഥതയിലുള്ള വാട്സ്ആപ്പ് അടുത്തിടെ പ്രഖ്യാപിച്ചത്. എന്നാൽ, ഈ മാറ്റം രാജ്യത്തിന്റെ സൈബർ സുരക്ഷയ്ക്ക് വെല്ലുവിളി ഉയർത്താൻ സാധ്യതയുണ്ടെന്നാണ് കേന്ദ്ര സർക്കാരിന്റെ വിലയിരുത്തൽ.
പുതിയ സംവിധാനം ദുരുപയോഗം ചെയ്ത് പ്രമുഖ വ്യക്തികളുടെയോ സർക്കാർ സ്ഥാപനങ്ങളുടെയോ പേരിൽ വ്യാജ യൂസർനെയിമുകൾ സൃഷ്ടിച്ച് ജനങ്ങളെ പറ്റിക്കാൻ തട്ടിപ്പുകാർക്ക് കൂടുതൽ അവസരം ലഭിക്കുമെന്നാണ് ഐടി മന്ത്രാലയത്തിന്റെ ആശങ്ക.
ഇതിനിടെ, ഉയർന്ന ആശങ്കകൾക്ക് മറുപടിയുമായി വാട്സ്ആപ്പ് രംഗത്തെത്തി. തട്ടിപ്പുകൾ തടയാൻ ശക്തമായ സുരക്ഷാ സംവിധാനങ്ങൾ ഒരുക്കിയിട്ടുണ്ടെന്നും പ്രമുഖ വ്യക്തികൾ, സർക്കാർ സ്ഥാപനങ്ങൾ, സെലിബ്രിറ്റികൾ എന്നിവരുമായി ബന്ധപ്പെട്ട പ്രധാന യൂസർനെയിമുകൾ മറ്റാർക്കും ഉപയോഗിക്കാനാകാത്ത രീതിയിൽ സംരക്ഷിക്കുമെന്നും കമ്പനി വ്യക്തമാക്കി.
