ബസ് കൊക്കയിലേയ്ക്ക് മറിഞ്ഞ് 11 മരണം
പെറുവില്‍ ബസ് കൊക്കയിലേക്ക് മറിഞ്ഞ് രണ്ട് കുട്ടികളടക്കം 11 പേര്‍ മരിക്കുകയും 34 പേര്‍ക്ക് പരിക്കേല്‍ക്കുകയും ചെയ്തു. ശനിയാഴ്ച ഉച്ചയ്ക്ക് ലിമയുടെ വടക്ക് ഭാഗത്തുള്ള അന്‍കാഷ് മേഖലയിലെ ഒരു കൊക്കയിലെ 100 മീറ്റര്‍ (330 അടി) താഴേക്ക് മറിഞ്ഞാണ് അപകടമുണ്ടായതെന്ന് അധികൃതര്‍ അറിയിച്ചു. ലാ ലിബര്‍ട്ടാഡിന്റെ വടക്കന്‍ മേഖലയില്‍ നിന്ന് തയാബാംബ ഹൈവേയിലൂടെ ലിമയിലേക്ക് പോവുകയായിരുന്നു ബസ്. പരിക്കേറ്റവരെ സിഹുവാസ് പ്രവിശ്യയിലെ പ്രാദേശിക ആശുപത്രിയില്‍ പ്രവേശിപ്പിച്ചു. അപകടകാരണം അന്വേഷിച്ചുവരികയാണെന്ന് അധികൃതര്‍ അറിയിച്ചു. അമിതവേഗത, മോശം റോഡ് ഉപരിതലം, അടയാളങ്ങളുടെ അഭാവം, അധികാരികളുടെ നിയമങ്ങള്‍ പാലിക്കാത്തത് എന്നിവ കാരണം പെറുവില്‍ റോഡപകടങ്ങള്‍ പതിവാണെന്നാണ് റിപ്പോര്‍ട്ടുകള്‍. ഫെബ്രുവരിയിലും പെറുവിലെ വടക്കന്‍ പട്ടണമായ തയബാംബയില്‍ ബസ് കൊക്കയിലേക്ക് മറിഞ്ഞ് 20 പേര്‍ മരിച്ചിരുന്നു.
