കടം കുന്നുകൂട്ടിയ ഇടത് ഭരണം അവസാനിച്ച് മൂന്ന് മാസം; കേരളത്തെ പിടിച്ചുനിർത്താൻ UDF സർക്കാരിന്റെ ശ്രമകരമായ ദൗത്യം

തിരുവനന്തപുരം: കടബാധ്യതയും സാമ്പത്തിക പ്രതിസന്ധിയും ഭരണപരമായ നിരവധി വെല്ലുവിളികളും ഏറ്റെടുത്താണ് UDF സർക്കാർ അധികാരത്തിലെത്തിയത്. വർഷങ്ങളായി അടിഞ്ഞുകൂടിയ ബാധ്യതകൾക്കിടയിൽ വൈദ്യുതി, ആരോഗ്യം, ഗതാഗതം തുടങ്ങിയ ജനജീവിതവുമായി നേരിട്ട് ബന്ധപ്പെട്ട മേഖലകളെ വീണ്ടും കാര്യക്ഷമമാക്കുക എന്ന വലിയ ദൗത്യമാണ് പുതിയ സർക്കാരിന് മുന്നിലുള്ളത്.

‘ആന ചവിട്ടി മെതിച്ചതുപോലെയായിരുന്നു കഴിഞ്ഞ ഇടത് ഭരണം’ എന്ന രാഷ്ട്രീയ വിമർശനം ഉയരുമ്പോൾ, സംസ്ഥാനത്തിന്റെ സാമ്പത്തിക സ്ഥിതിയെ സംബന്ധിച്ച കണക്കുകളും ഗുരുതരമായ ചിത്രം തന്നെയാണ് നൽകുന്നത്. CAGയുടെ 2024-25 റിപ്പോർട്ട് പ്രകാരം 2015-16ൽ ഏകദേശം 1.60 ലക്ഷം കോടി രൂപയായിരുന്ന കേരളത്തിന്റെ മൊത്തം ബാധ്യത 2024-25ൽ 4.46 ലക്ഷം കോടി രൂപയിലധികമായി ഉയർന്നു. 2025 മാർച്ച് 31ന് സംസ്ഥാനത്തിന്റെ മൊത്തം ബാധ്യത 4,45,901 കോടിയിലധികമായിരുന്നു. ഓഫ്-ബജറ്റ് വായ്പകൾ കൂടി പരിഗണിക്കുമ്പോൾ ബാധ്യത ഏകദേശം 4.85 ലക്ഷം കോടി രൂപയിലേക്ക് ഉയരുന്നതായും കണക്കുകൾ സൂചിപ്പിക്കുന്നു.

KIIFB ഉൾപ്പെടെയുള്ള സംവിധാനങ്ങളിലൂടെ സമാഹരിച്ച ഓഫ്-ബജറ്റ് വായ്പകളാണ് സാമ്പത്തിക ചർച്ചകളിലെ മറ്റൊരു പ്രധാന വിഷയം. KIIFBയും കേരള സോഷ്യൽ സെക്യൂരിറ്റി പെൻഷൻ ലിമിറ്റഡും വഴിയുള്ള ഓഫ്-ബജറ്റ് വായ്പകളുടെ കുടിശ്ശിക 2025 മാർച്ച് 31ന് 39,230.33 കോടി രൂപയായിരുന്നുവെന്നാണ് CAG റിപ്പോർട്ട് വ്യക്തമാക്കുന്നത്. 2024-25ൽ മാത്രം KIIFBയും KSSPLയും ചേർന്ന് 13,653.01 കോടി രൂപ വായ്പയെടുത്തതായും റിപ്പോർട്ടിലുണ്ട്.

വികസന പ്രവർത്തനങ്ങൾക്ക് ഇത്തരം സംവിധാനങ്ങൾ ഉപയോഗിക്കേണ്ട സാഹചര്യമുണ്ടായിരുന്നുവെന്ന സർക്കാർ വാദം നിലനിൽക്കുമ്പോഴും, വായ്പകളുടെ തിരിച്ചടവ് ബാധ്യതയും പലിശച്ചെലവും ഭാവിയിലെ സർക്കാരുകൾക്ക് വലിയ സമ്മർദമായി മാറുമെന്ന വിമർശനം ശക്തമാണ്.

കടമെടുത്ത പണത്തിന്റെ വിനിയോഗത്തെക്കുറിച്ചും CAG മുന്നറിയിപ്പ് നൽകിയിട്ടുണ്ട്. കടത്തിന്റെ വലിയൊരു ഭാഗം പഴയ കടങ്ങൾ തിരിച്ചടയ്ക്കുന്നതിനും റവന്യൂ ചെലവുകൾ നിറവേറ്റുന്നതിനുമായി ഉപയോഗിക്കേണ്ടിവരുന്നത് സംസ്ഥാനത്തിന്റെ മൂലധന നിക്ഷേപ ശേഷിയെ പരിമിതപ്പെടുത്തുന്നുവെന്നാണ് ഓഡിറ്റ് റിപ്പോർട്ടിലെ വിലയിരുത്തൽ.

2024-25ൽ സംസ്ഥാനത്തിന്റെ റവന്യൂ കമ്മി 31,059.72 കോടി രൂപയും ധനക്കമ്മി 48,248.14 കോടി രൂപയുമായിരുന്നു. ഇതാണ് പുതിയ സർക്കാരിന് ലഭിച്ച സാമ്പത്തിക പശ്ചാത്തലം.

സാമ്പത്തിക പ്രതിസന്ധിക്കൊപ്പം വൈദ്യുതി മേഖലയിലെ വെല്ലുവിളികളും പുതിയ സർക്കാരിന് മുന്നിലുണ്ട്. വർധിച്ചുവരുന്ന വൈദ്യുതി ആവശ്യം, പുറത്തുനിന്ന് വൈദ്യുതി വാങ്ങുന്നതിനുള്ള ചെലവ്, വിതരണ-പ്രസരണ സംവിധാനങ്ങളുടെ പരിപാലനം എന്നിവ വലിയ സാമ്പത്തിക സമ്മർദമാണ് സൃഷ്ടിക്കുന്നത്.

2014ൽ ഉമ്മൻചാണ്ടി സർക്കാരിന്റെ കാലത്ത് 465 മെഗാവാട്ട് വൈദ്യുതി 25 വർഷത്തേക്ക് യൂണിറ്റിന് 4.39 രൂപ നിരക്കിൽ വാങ്ങുന്നതിനായി കരാർ ഒപ്പിട്ടിരുന്നു. ഏകദേശം പത്ത് വർഷത്തോളം ഈ കരാർ പ്രകാരം കേരളത്തിന് വൈദ്യുതി ലഭിച്ചു.

എന്നാൽ പിന്നീട് LDF സർക്കാരിന്റെ കാലത്ത് ഈ കരാർ റദ്ദാക്കപ്പെട്ടു. ഇപ്പോൾ സംസ്ഥാനത്ത് ഏകദേശം 600 മെഗാവാട്ടിന്റെ വൈദ്യുതി ക്ഷാമം നേരിടുന്ന സാഹചര്യത്തിൽ, 465 മെഗാവാട്ടിന്റെ വൈദ്യുതി കരാർ തുടർന്നിരുന്നെങ്കിൽ നിലവിലെ ക്ഷാമത്തിന്റെ വലിയൊരു ഭാഗം മറികടക്കാൻ കഴിയുമായിരുന്നില്ലേയെന്ന ചോദ്യം ഉയരുകയാണ്.

കരാർ റദ്ദാക്കിയതിന്റെ പശ്ചാത്തലവും അതിന്റെ സാമ്പത്തിക പ്രത്യാഘാതങ്ങളും ഇനി വിശദമായി വിലയിരുത്തേണ്ട സാഹചര്യമാണുള്ളത്.

അതേസമയം സബ്സ്റ്റേഷൻ നിർമ്മാണം, പ്രസരണ ശൃംഖലയുടെ നവീകരണം, ലൈൻ ശേഷി വർധിപ്പിക്കൽ, പ്രസരണ നഷ്ടം കുറയ്ക്കൽ തുടങ്ങിയ മേഖലകളിൽ അടിയന്തര ഇടപെടലാണ് ആവശ്യം. പുതിയ കണക്ഷനുകൾ, വോൾട്ടേജ് പ്രശ്നങ്ങൾ, വൈദ്യുതി മുടക്കം, ഉപഭോക്തൃ പരാതികൾ എന്നിവയിലും കാര്യക്ഷമത ഉറപ്പാക്കേണ്ടതുണ്ട്.

ആരോഗ്യ മേഖലയിൽ കോടികളുടെ ബാധ്യത

സാമ്പത്തിക പ്രതിസന്ധിയുടെ നേരിട്ടുള്ള പ്രതിഫലനം ആരോഗ്യ മേഖലയിലും പ്രകടമാണ്. മരുന്ന് കമ്പനികൾക്കും മെഡിക്കൽ ഉപകരണ വിതരണക്കാർക്കും നൽകാനുള്ള കുടിശ്ശിക, ആശുപത്രികളുടെ അടിസ്ഥാന സൗകര്യങ്ങളുടെ ആവശ്യകത, KASP ഉൾപ്പെടെയുള്ള ആരോഗ്യ പദ്ധതികളിലെ സാമ്പത്തിക ബാധ്യതകൾ, ജീവനക്കാരുടെ കുറവ് തുടങ്ങിയ നിരവധി പ്രശ്നങ്ങളാണ് പുതിയ സർക്കാരിന് മുന്നിലുള്ളത്.

പ്രാഥമികാരോഗ്യ കേന്ദ്രങ്ങൾ മുതൽ മെഡിക്കൽ കോളേജുകൾ വരെയുള്ള സ്ഥാപനങ്ങളിൽ ആവശ്യമായ ജീവനക്കാരെ ഉറപ്പാക്കുന്നതിനൊപ്പം മരുന്നുകളും മെഡിക്കൽ ഉപകരണങ്ങളും സമയബന്ധിതമായി ലഭ്യമാക്കേണ്ടതുണ്ട്.

ഇവയെല്ലാം മൂന്ന് മാസം കൊണ്ട് സൃഷ്ടിക്കപ്പെട്ട പ്രശ്നങ്ങളല്ലെന്നതാണ് പ്രധാന യാഥാർഥ്യം. വർഷങ്ങളായി രൂപപ്പെട്ട സാമ്പത്തിക ബാധ്യതകളും ആരോഗ്യ മേഖലയിലെ വർധിച്ചുവരുന്ന ചെലവുകളും പുതിയ സർക്കാരിന് ഒരേസമയം കൈകാര്യം ചെയ്യേണ്ടിവരികയാണ്.

കെ.എസ്.ആർ.ടി.സി: നഷ്ടത്തിൽ നിന്ന് നിലനിൽപ്പിലേക്ക്

കേരളത്തിന്റെ പൊതുഗതാഗതത്തിന്റെ നട്ടെല്ലായ കെ.എസ്.ആർ.ടി.സിയുടെ സാമ്പത്തിക പ്രതിസന്ധിയും UDF സർക്കാരിന് വലിയ വെല്ലുവിളിയാണ്.

ശമ്പളം, പെൻഷൻ, ഡീസൽ, സ്പെയർ പാർട്സ്, അറ്റകുറ്റപ്പണി തുടങ്ങിയ ചെലവുകൾക്കൊപ്പം വരുമാനവും ചെലവും തമ്മിലുള്ള വലിയ അന്തരമാണ് പ്രധാന പ്രശ്നം. സൗജന്യ യാത്രാ പദ്ധതികൾ ഉൾപ്പെടെയുള്ള സർക്കാർ തീരുമാനങ്ങളുടെ സാമ്പത്തിക ബാധ്യത കൃത്യമായി കണക്കാക്കി ആവശ്യമായ തുക സമയബന്ധിതമായി നൽകേണ്ടതും നിർണായകമാണ്.

വരുമാനം കുറഞ്ഞ റൂട്ടുകൾ മാത്രം വെട്ടിക്കുറയ്ക്കുന്ന സമീപനത്തിന് പകരം, ഗ്രാമീണ മേഖലയിലെ സാധാരണക്കാരും വിദ്യാർഥികളും ആശ്രയിക്കുന്ന സർവീസുകൾ സംരക്ഷിച്ചുകൊണ്ടുള്ള ശാസ്ത്രീയ പുനഃസംഘടനയാണ് ആവശ്യം.

മൂന്ന് മാസം കൊണ്ട് എല്ലാം ശരിയാകില്ല; പക്ഷേ ദിശ മാറ്റാൻ കഴിയണം

വർഷങ്ങളായി അടിഞ്ഞുകൂടിയ കടബാധ്യതയും സാമ്പത്തിക പ്രതിസന്ധിയും ഏറ്റെടുത്ത് അധികാരത്തിലെത്തിയ സർക്കാരിനോട് മൂന്ന് മാസം കൊണ്ട് കേരളത്തിലെ എല്ലാ പ്രശ്നങ്ങളും പരിഹരിക്കണമെന്ന് ആവശ്യപ്പെടുന്നത് യാഥാർഥ്യബോധമില്ലാത്ത രാഷ്ട്രീയ നിലപാടാണെന്ന വിമർശനവും ശക്തമാണ്.

കടം കുന്നുകൂട്ടിയ ഇടത് ഭരണം അവസാനിച്ച് മൂന്ന് മാസം പിന്നിടുമ്പോൾ, അതിന്റെ സാമ്പത്തിക-ഭരണപരമായ പാരമ്പര്യത്തിൽ നിന്ന് കേരളത്തെ പുറത്തുകൊണ്ടുവരിക എന്ന ശ്രമകരമായ ദൗത്യമാണ് UDF സർക്കാരിന് മുന്നിലുള്ളത്.

തകർന്ന സംവിധാനങ്ങളെ പുനർനിർമിക്കാൻ സമയം വേണ്ടിവരും. എന്നാൽ ദിശയും മുൻഗണനകളും വ്യക്തമായിരിക്കണം. കടബാധ്യത നിയന്ത്രിക്കുക, ധനകാര്യ അച്ചടക്കം ശക്തിപ്പെടുത്തുക, അനാവശ്യ ചെലവുകൾ കുറയ്ക്കുക, വരുമാനം വർധിപ്പിക്കുക, വൈദ്യുതി-ആരോഗ്യം-ഗതാഗതം പോലുള്ള അടിസ്ഥാന മേഖലകളിൽ കാര്യക്ഷമത തിരിച്ചുകൊണ്ടുവരിക എന്നിവയാണ് മുന്നോട്ടുള്ള പ്രധാന വഴികൾ.

‘മൂന്ന് മാസം കൊണ്ട് കേരളം തകർന്നു’ എന്ന ഇടത് രാഷ്ട്രീയ വാദത്തിനപ്പുറം, 10‘വർഷമായി അടിഞ്ഞുകൂടിയ സാമ്പത്തിക-ഭരണ പ്രശ്നങ്ങളെ എങ്ങനെ ഘട്ടംഘട്ടമായി പുനർനിർമിക്കാം?’ എന്നതാണ് ഇപ്പോൾ കേരളം ചർച്ച ചെയ്യേണ്ടത്.

കാരണം പുതിയ സർക്കാരിന്റെ മുന്നിലുള്ളത് ഒരു സാധാരണ ഭരണപരിവർത്തനമല്ല — കടബാധ്യതയുടെ കനത്ത ഭാരത്തിൽ നിന്ന് കേരളത്തെ പതുക്കെ കരകയറ്റാനുള്ള വലിയ പുനർനിർമാണ ദൗത്യമാണ്.