“അക്കൗണ്ടുകൾ വഴി ഒഴുകിയത് ലഹരിപ്പണത്തിന്റെ ലക്ഷങ്ങൾ; എം.ഡി.എം.എ കേസിൽ ബി.ആർ.സി ജീവനക്കാരി അറസ്റ്റിൽ”
ഓപ്പറേഷൻ തൂഫാനിൽ വടകര ലഹരി ശൃംഖലയുടെ കൂടുതൽ വിവരങ്ങൾ പുറത്ത്; QR കോഡ് വഴി പണം സ്വീകരിച്ചെന്ന് അന്വേഷണ സംഘം
Desk Mediagraamam 
വടകര: എം.ഡി.എം.എ ലഹരിമരുന്ന് ഇടപാടുമായി ബന്ധപ്പെട്ട സാമ്പത്തിക ഇടപാടിൽ കുരാച്ചുണ്ട് സ്വദേശിയായ യുവതി അറസ്റ്റിൽ. പേരാമ്പ്ര ബി.ആർ.സി.യിലെ സ്പെഷ്യൽ എജുക്കേറ്ററായിരുന്ന കെ. കാവ്യ (29)യെയാണ് വടകര പോലീസ് അറസ്റ്റ് ചെയ്തത്. നിലവിൽ ബാലുശ്ശേരിയിലാണ് കാവ്യ താമസിക്കുന്നത്.
വടകര സ്വദേശിയായ സുഫ്യാനെ എം.ഡി.എം.എയുമായി പിടികൂടിയ കേസിന്റെ തുടർ അന്വേഷണത്തിലാണ് കാവ്യയിലേക്ക് അന്വേഷണം എത്തിയത്. കേസിൽ നേരത്തെ അറസ്റ്റിലായ പേരാമ്പ്ര ബി.ആർ.സി.യിലെ അധ്യാപികയായിരുന്ന കീർത്തനയുടെ ബാങ്ക് അക്കൗണ്ട് പരിശോധിച്ചതോടെയാണ് കൂടുതൽ വിവരങ്ങൾ പോലീസിന് ലഭിച്ചത്.
ലഹരിമരുന്ന് ആവശ്യക്കാരിൽ നിന്ന് ലഭിക്കുന്ന പണം കീർത്തനയുടെ അക്കൗണ്ടിലേക്കാണ് എത്തിയിരുന്നതെന്നാണ് അന്വേഷണ സംഘത്തിന്റെ കണ്ടെത്തൽ. പണം ലഭിച്ച ശേഷം ആവശ്യക്കാർക്ക് ഫോണിലൂടെ ലൊക്കേഷൻ കൈമാറുകയും, തുടർന്ന് മറ്റൊരാൾ എത്തി എം.ഡി.എം.എ കൈമാറുകയും ചെയ്തിരുന്നതായാണ് പോലീസ് പറയുന്നത്.
കീർത്തനയുടെ അക്കൗണ്ടിൽ വലിയ തുകകൾ എത്തിയതോടെ അവ കാവ്യയുടെ അക്കൗണ്ടിലേക്ക് മാറ്റിയിരുന്നതായും അന്വേഷണത്തിൽ കണ്ടെത്തിയതായി പോലീസ് അറിയിച്ചു. ഇത്തരത്തിൽ ലക്ഷക്കണക്കിന് രൂപയുടെ സാമ്പത്തിക ഇടപാടുകൾ നടന്നിട്ടുണ്ടെന്നാണ് അന്വേഷണ സംഘത്തിന്റെ പ്രാഥമിക നിഗമനം.
എം.ഡി.എം.എ വിതരണ ശൃംഖലയിലെ ആളുകളുമായി കാവ്യയ്ക്ക് നേരിട്ട് ബന്ധമുണ്ടോയെന്ന കാര്യവും പോലീസ് പരിശോധിച്ചുവരികയാണ്. പോലീസ് നോട്ടീസ് നൽകി വിളിച്ചുവരുത്തി ചോദ്യം ചെയ്ത ശേഷമാണ് അറസ്റ്റ് രേഖപ്പെടുത്തിയത്.
എസ്.പി. മെറിൻ ജോസഫിന്റെ മേൽനോട്ടത്തിൽ വടകര ഇൻസ്പെക്ടർ എ.വി. ദിനേശ്, എസ്.ഐ. പി. ഷമീർ എന്നിവരുടെ നേതൃത്വത്തിലാണ് അന്വേഷണം പുരോഗമിക്കുന്നത്.
അതേസമയം, കേസിൽ പ്രതിയായ കീർത്തനയെ കരാർ അടിസ്ഥാനത്തിൽ ജോലി ചെയ്തിരുന്ന പേരാമ്പ്ര ബി.ആർ.സി.യിൽ നിന്ന് പുറത്താക്കി. പോലീസ് റിപ്പോർട്ട് ലഭിക്കുന്നതനുസരിച്ച് കാവ്യക്കെതിരെയും തുടർനടപടികൾ സ്വീകരിക്കുമെന്ന് അധികൃതർ അറിയിച്ചു.
