കേരള പി.എസ്.സി: അഴിമതിച്ചെളിയിലോ? മുങ്ങുന്ന തൊഴിൽ സ്വപ്നങ്ങളും യുവതയുടെ അനിശ്ചിതത്വവും

ആയിരക്കണക്കിന് ഉദ്യോഗാർത്ഥികളുടെ അഹോരാത്രമുള്ള കഠിനാധ്വാനവും ഭാവി പ്രതീക്ഷകളുമാണ് പബ്ലിക് സർവീസ് കമ്മീഷൻ നടത്തുന്ന ഓരോ പരീക്ഷയും. എന്നാൽ, പരീക്ഷാ നടത്തിപ്പിലും മൂല്യനിർണ്ണയത്തിലും നൂറുശതമാനം സത്യസന്ധത പുലർത്തേണ്ട ഒരു ഭരണഘടനാ സ്ഥാപനത്തിൽ നിന്ന്, രാഷ്ട്രീയ താൽപ്പര്യങ്ങൾ മുൻനിർത്തി ഇഷ്ടക്കാരെ തിരുകിക്കയറ്റാനുള്ള ശ്രമങ്ങൾ നടക്കുന്നത് വലിയ ആശങ്കയ്ക്കാണ് വഴിതുറന്നിരിക്കുന്നത്.

സംസ്ഥാന ആസൂത്രണ ബോർഡിലെ ഉയർന്ന രണ്ട് പ്രധാന തസ്തികകളിലേക്ക് നടത്തിയ പരീക്ഷയുടെ ഫലം, 42 മാർക്ക് പൂർണ്ണമായും ഒഴിവാക്കി കേവലം 58 മാർക്കിന് മാത്രം മൂല്യനിർണ്ണയം നടത്തി പ്രസിദ്ധീകരിച്ചത് പി.എസ്.സിയുടെ വിശ്വാസ്യതയെ തന്നെ തുലാസിലാക്കി. വഴിവിട്ട ഇടപെടലുകളിലൂടെ യോഗ്യതയില്ലാത്തവർ ആസൂത്രണ ബോർഡ് പോലുള്ള സ്ഥാപനങ്ങളിൽ എത്തുമ്പോൾ, അപാകതകൾ നിറഞ്ഞ നയരൂപീകരണം കാരണം അന്തിമമായി ഇതിന്റെ ദുരിതം അനുഭവിക്കേണ്ടി വരുന്നത് സാധാരണക്കാരായ ജനങ്ങളാണ്.

കഴിഞ്ഞ പത്തു വർഷത്തിനിടയിൽ നടന്ന അഴിമതികളുടെ ഒരു ചെറിയ പകർപ്പ് മാത്രമാണിത്. കേരള അഡ്മിനിസ്ട്രേറ്റീവ് സർവീസ് (KAS) പരീക്ഷയും നിയമനങ്ങളും മുൻ മുഖ്യമന്ത്രി ഉമ്മൻ ചാണ്ടിയുടെ കാലത്ത് വേണ്ടെന്ന് വെച്ചെങ്കിലും, പിന്നീട് വന്ന പിണറായി വിജയൻ സർക്കാർ എടുത്ത ശക്തമായ തീരുമാനം ഏറെ പ്രശംസനീയമായിരുന്നു. എന്നാൽ ഈ നീക്കത്തിന് പിന്നാലെ ഉയർന്നുവന്ന ക്രമക്കേടുകളും വലിയ ആഘാതമാണ് സൃഷ്ടിച്ചത്.

ഇത്തരം ക്രമക്കേടുകളെക്കുറിച്ചും കേരള പി.എസ്.സിയിലെ ഘടനാപരമായ അപാകതകളെക്കുറിച്ചും എഴുത്തുകാരനും ഇൻഫർമേഷൻ ആൻഡ് പബ്ലിക് റിലേഷൻസ് ഡിപ്പാർട്ട്മെന്റ് മുൻ അഡീഷണൽ ഡയറക്ടറും 'പീപ്പിൾ ഫോർ ബെറ്റർ സൊസൈറ്റി' പ്രസിഡന്റുമായ വി.ആർ. അജിത് കുമാർ ചൂണ്ടിക്കാണിക്കുന്ന പ്രധാന കാര്യങ്ങളും പരിഹാരമാർഗ്ഗങ്ങളും താഴെ പറയുന്നവയാണ്:

1. ഘടനാപരമായ തകരാറുകളും രാഷ്ട്രീയ നിയമനങ്ങളും

• ആവശ്യമില്ലാത്ത അംഗസംഖ്യ: മഹാരാഷ്ട്ര പോലുള്ള വലിയ സംസ്ഥാനങ്ങളിൽ 6 മുതൽ 10 വരെ അംഗങ്ങൾ മാത്രമുള്ളപ്പോഴും, അയ്യായിരത്തിലധികം ക്ലാസ്-1, ക്ലാസ്-2 നിയമനങ്ങൾ നടത്തുന്ന യു.പി.എസ്.സിയിൽ (UPSC) 10 അംഗങ്ങൾ മാത്രമുള്ളപ്പോഴും കേരള പി.എസ്.സിയിൽ ചെയർമാനും അംഗങ്ങളുമടക്കം 21 പേരാണുള്ളത്.
  യോഗ്യതയില്ലാത്ത അംഗങ്ങളും സാമ്പത്തിക ബാധ്യതയും: പകുതി പേരെ സർക്കാരിന്റെ ഇഷ്ടാനുസരണം നിയമിക്കാമെന്ന വ്യവസ്ഥ കാരണം രാഷ്ട്രീയ സ്വാധീനത്തിൽ യോഗ്യതയില്ലാത്തവർ കടന്നുകൂടുന്നു. ജനങ്ങളുടെ നികുതിപ്പണത്തിൽ നിന്ന് ഒരു അംഗത്തിനായി പ്രതിമാസം ഏകദേശം 4 ലക്ഷം രൂപയോളമാണ് സർക്കാർ ചെലവഴിക്കുന്നത്. ആവശ്യത്തിന് യോഗ്യതയില്ലാതെ എത്തുന്ന അംഗങ്ങളാണ് അഴിമതി ശൃംഖലയ്ക്കും അട്ടിമറികൾക്കും വഴിതുറക്കുന്നത്.

2. തട്ടിപ്പിന്റെ വഴികളും തൊഴിലന്വേഷകരുടെ നിരാശയും

• രണ്ടുതരം ക്രമക്കേടുകൾ: എഴുത്തുപരീക്ഷകളിലും ഇന്റർവ്യൂകളിലും ഒരുപോലെ വഴിവിട്ട ഇടപെടലുകൾ നടക്കുന്നു. അഭിമുഖം നടത്തുന്നവർക്കോ അവർ തിരഞ്ഞെടുക്കുന്നവർക്കോ അതിനുള്ള യോഗ്യതയുണ്ടാകുന്നില്ല.

• യുവതലമുറയുടെ നിരാശ: കോച്ചിംഗ് സെന്ററുകളിൽ വൻ തുക ഫീസ് നൽകി പഠിക്കുന്ന കഴിവുള്ള ഉദ്യോഗാർത്ഥികൾ പുറന്തള്ളപ്പെടുകയും, സ്വാധീനമുള്ളവർക്ക് പിൻവാതിലിലൂടെ ഉയർന്ന മാർക്കുകൾ നൽകി നിയമനം നൽകുകയും ചെയ്യുന്നു. ഇത് കഠിനാധ്വാനം ചെയ്യുന്ന യുവാക്കളെ കടുത്ത നിരാശയിലേക്കാണ് തള്ളിവിടുന്നത്.

• ഒഴിവുകൾ മറച്ചുവെക്കൽ: വെബ്‌സൈറ്റും 'വൺ ടൈം രജിസ്‌ട്രേഷനും' നിലവിൽ വന്നത് ആശ്വാസമായെങ്കിലും, അഴിമതിക്കാർ തന്ത്രപൂർവ്വം ഒഴിവുകൾ റിപ്പോർട്ട് ചെയ്യാതെ മറച്ചുവെക്കുകയും ആ തസ്തികകളിൽ തങ്ങൾക്ക് താൽപ്പര്യമുള്ളവരെ കരാർ അടിസ്ഥാനത്തിൽ തിരുകിക്കയറ്റുകയും ചെയ്യുന്നു.

3. പി.എസ്.സിയെ രക്ഷിക്കാൻ അടിയന്തരമായി ചെയ്യേണ്ട മാറ്റങ്ങൾ

• പ്രഗത്ഭരായ അംഗങ്ങളെ നിയമിക്കുക: രാഷ്ട്രീയ നിയമനങ്ങൾ അവസാനിപ്പിച്ച് സിവിൽ സർവീസ്, ജുഡീഷ്യറി, സർവ്വകലാശാല പ്രൊഫസർമാർ തുടങ്ങിയ മേഖലകളിൽ നിന്ന് വിരമിച്ച ഉയർന്ന യോഗ്യതയുള്ളവരെ മാത്രം അംഗങ്ങളാക്കുക.

• ഐ.എ.എസ്. സെക്രട്ടറി: സ്ഥാപനത്തിന്റെ ഭരണപരമായ കാര്യക്ഷമതയും സുതാര്യതയും വർദ്ധിപ്പിക്കാൻ ഒരു മുതിർന്ന ഐ.എ.എസ്. ഉദ്യോഗസ്ഥനെ പി.എസ്.സി. സെക്രട്ടറിയായി നിയമിക്കുക.

• സ്റ്റാഫ് സെലക്ഷൻ കമ്മീഷൻ (SSC) രൂപീകരണം: ഇന്റർവ്യൂവും പ്രാക്ടിക്കൽ പരീക്ഷയും ആവശ്യമായ ഉയർന്ന തസ്തികകൾ മാത്രം പി.എസ്.സിയിൽ നിലനിർത്തുക. ലാസ്റ്റ് ഗ്രേഡ്, പത്താം ക്ലാസ്, പ്ലസ് ടു, ബിരുദം എന്നിവ യോഗ്യതയായുള്ള പരീക്ഷകൾക്കായി (ജില്ലാതല നിയമനങ്ങൾ ഉൾപ്പെടെ) സംസ്ഥാനതലത്തിൽ ഒരു SSC അല്ലെങ്കിൽ സബ്സിഡിയറി സ്ഥാപനം രൂപീകരിക്കുക. സാങ്കേതികവിദ്യ പ്രയോജനപ്പെടുത്തി കുറഞ്ഞ ജീവനക്കാരെ വെച്ച് ഇത് പ്രവർത്തിപ്പിക്കാം. ഇന്റർവ്യൂ ഇല്ലാത്തതിനാൽ അധിക അംഗങ്ങളെ നിയമിക്കുന്ന സാമ്പത്തിക ബാധ്യതയും ഒഴിവാക്കാം.

• പൊതുപരീക്ഷയും ഓപ്ഷൻ സംവിധാനവും: സെക്രട്ടേറിയറ്റ് അസിസ്റ്റന്റ്, പി.എസ്.സി അസിസ്റ്റന്റ്, അഡ്വക്കേറ്റ് ജനറൽ ഓഫീസ്, ലോക്കൽ ഫണ്ട് ഓഡിറ്റ് എന്നിവയ്ക്ക് ചെയ്യുന്നത് പോലെ സമാന യോഗ്യതയുള്ള പരീക്ഷകൾ ഒന്നിച്ചു നടത്തുക. യു.പി.എസ്.സി മാതൃകയിൽ ഉദ്യോഗാർത്ഥികൾക്ക് വകുപ്പുകൾ തിരഞ്ഞെടുക്കാനുള്ള ഓപ്ഷൻ നൽകുക.

• വാർഷിക കലണ്ടറും സമയബന്ധിത നിയമനവും: റാങ്ക് ലിസ്റ്റിന്റെ കാലാവധി കൃത്യമായി 2 വർഷമായി ക്ലിപ്തപ്പെടുത്തുക. ജനുവരിയിൽ പരീക്ഷ നടപടികൾ ആരംഭിച്ച് ഡിസംബറോടെ ലിസ്റ്റ് പ്രസിദ്ധീകരിക്കുന്ന വാർഷിക കലണ്ടർ നടപ്പിലാക്കുക. ഓരോ വർഷവും ഉണ്ടാകുന്ന ഒഴിവുകളിലേക്ക് മാത്രം പരീക്ഷ നടത്തിയാൽ പുതിയതായി പഠിച്ചിറങ്ങുന്നവർക്കും അവസരം ലഭിക്കും.

• ഉദ്യോഗസ്ഥർക്കെതിരെ നടപടി: ഒഴിവുകൾ കൃത്യമായി റിപ്പോർട്ട് ചെയ്യാത്ത വകുപ്പ് മേധാവികൾക്കെതിരെ കർശന നടപടി സ്വീകരിക്കുക.