വന്ദേമാതരം വിവാദം: അമിത് ഷായ്ക്ക് മറുപടിയുമായി ജയ്റാം രമേശ്

ന്യൂഡൽഹി: വന്ദേമാതരം വിവാദത്തിൽ കേന്ദ്ര ആഭ്യന്തരമന്ത്രി അമിത് ഷായെ രൂക്ഷമായി വിമർശിച്ച് മുതിർന്ന കോൺഗ്രസ് നേതാവ് ജയ്റാം രമേശ്. സോണിയാ ഗാന്ധി വന്ദേമാതരം ആലാപനം നിർത്താൻ ആവശ്യപ്പെട്ടതിനെ തുടർന്ന് കോൺഗ്രസിനെതിരെ അമിത് ഷാ നടത്തിയ വിമർശനത്തിനാണ് ജയ്റാം രമേശിന്റെ മറുപടി.

ഭരണഘടനാശിൽപി ഡോ. ബി.ആർ. അംബേദ്കറെ പാർലമെന്റിൽ അപമാനിച്ചുവെന്ന് ആരോപിച്ച ജയ്റാം രമേശ്, ആർ.എസ്.എസ്. ആസ്ഥാനത്ത് ദേശീയപതാക ഉയർത്താൻ മടിച്ച പ്രസ്ഥാനത്തിന്റെ പ്രത്യയശാസ്ത്രം പിന്തുടരുന്നയാളാണ് അമിത് ഷായെന്നും വിമർശിച്ചു.

2024 ഡിസംബർ 17ന് രാജ്യസഭയിൽ അംബേദ്കറെ അധിക്ഷേപിക്കുന്ന രീതിയിൽ സംസാരിച്ച വ്യക്തിയാണ് അമിത് ഷായെന്ന് ജയ്റാം രമേശ് ആരോപിച്ചു. സമാധാനപരമായി പ്രതിഷേധിച്ച യുവാക്കൾക്കെതിരെ ഡൽഹി പോലീസ് നടത്തിയ നടപടിക്കും അമിത് ഷായെ അദ്ദേഹം കുറ്റപ്പെടുത്തി.

യഥാർഥ പ്രശ്നങ്ങളിൽനിന്ന് ജനശ്രദ്ധ തിരിക്കാനാണ് അമിത് ഷായും അദ്ദേഹത്തിന്റെ ‘യജമാനനും’ വന്ദേമാതരം വിവാദം ഉയർത്തുന്നതെന്നും ജയ്റാം രമേശ് എക്സിൽ കുറിച്ചു.

അതിനിടെ, എ.ഐ.സി.സി. ആസ്ഥാനത്ത് വന്ദേമാതരം പൂർണമായി ആലപിച്ചതാണ് പുതിയ രാഷ്ട്രീയ വിവാദത്തിന് തുടക്കമായത്. ആദ്യ രണ്ട് ചരണങ്ങൾക്കുശേഷവും ഗാനം തുടർന്നതോടെ സോണിയാ ഗാന്ധിയും കോൺഗ്രസ് അധ്യക്ഷൻ മല്ലികാർജുൻ ഖർഗെയും ഇടപെട്ടു. ഗാനം നിർത്താൻ ആവശ്യപ്പെട്ടെങ്കിലും ആലാപനം തുടരുകയായിരുന്നു.

ഇതിനെതിരെയാണ് അമിത് ഷാ രംഗത്തെത്തിയത്. 140 കോടി ജനങ്ങൾ സോണിയാ ഗാന്ധിയെ കണ്ടുകൊണ്ടിരിക്കുകയാണെന്നും വന്ദേമാതരം അപൂർണമായി അവസാനിപ്പിക്കുന്നത് അംഗീകരിക്കാനാകില്ലെന്നും അമിത് ഷാ പ്രതികരിച്ചു. കോൺഗ്രസ് ജനങ്ങളോടും ബങ്കിംചന്ദ്ര ചാറ്റർജിയുടെ അനശ്വര ആത്മാവിനോടും മാപ്പുപറയണമെന്നും അദ്ദേഹം ആവശ്യപ്പെട്ടു.

ഇതിന് പിന്നാലെയാണ് ജയ്റാം രമേശിന്റെ രൂക്ഷമായ മറുപടി. വന്ദേമാതരം സംബന്ധിച്ച വിവാദം ദേശീയ രാഷ്ട്രീയത്തിൽ പുതിയ വാക്‌പോരിന് വഴിയൊരുക്കിയിരിക്കുകയാണ്.