രാഹുൽ ഗാന്ധി ഒരുങ്ങി തന്നെ..; മോദി സർക്കാരിനെതിരെ പ്രതിപക്ഷത്തിന്റെ വൻ നീക്കം

പാർലമെന്റിന്റെ വർഷകാല സമ്മേളനം ആരംഭിച്ചതുമുതൽ രാജ്യത്തെ രാഷ്ട്രീയ അന്തരീക്ഷം അത്യന്തം ഗൗരവകരമായ തലങ്ങളിലേക്കാണ് വിരൽചൂണ്ടുന്നത്. ആദ്യ ആഴ്ചയിൽ ഡൽഹിയിൽ ഉയർന്നുവന്ന വിദ്യാർത്ഥി പ്രക്ഷോഭങ്ങളുടെ അലയടികൾ കാരണം പാർലമെന്റ് നടപടികൾ പൂർണ്ണമായും തടസ്സപ്പെടുകയും സഭ സ്തംഭനാവസ്ഥയിലാവുകയും ചെയ്തിരുന്നു. തുടർന്ന് ഉയർന്ന രാഷ്ട്രീയ സമ്മർദ്ദങ്ങൾക്കൊടുവിൽ കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജിയിലേക്ക് കാര്യങ്ങൾ എത്തിയതോടെ വിദ്യാർത്ഥി സമരം താൽക്കാലികമായി ശമിച്ചെങ്കിലും, സഭയുടെ രണ്ടാം ആഴ്ചയിലേക്ക് കടക്കുമ്പോൾ അതിനേക്കാൾ കടുപ്പമേറിയ വിനിമയങ്ങൾക്കും രാഷ്ട്രീയ പോരാട്ടങ്ങൾക്കുമാണ് കളമൊരുങ്ങുക. വിദ്യാഭ്യാസ മന്ത്രിയുടെ രാജി സമരം  ശാന്തമാക്കാൻ സഹായിച്ചെങ്കിലും, പ്രക്ഷോഭത്തിന്റെ ഭാഗമായി  ജൂലൈ 20-ന് നടപ്പിലാക്കിയ പാർലമെന്റ് മാർച്ചിനിടയിൽ ഡൽഹി പൊലീസ് സ്വീകരിച്ച അടിച്ചമർത്തൽ നടപടികൾ പുതിയൊരു വൻ വിവാദത്തിന് തിരികൊളുത്തിയിരിക്കുകയാണ്. മാർച്ചിൽ പങ്കെടുത്ത വിദ്യാർത്ഥികൾക്ക് നേരെ പൊലീസ് നടത്തിയ അതിശക്തമായ ലാത്തിച്ചാർജ്ജും മറ്റു നടപടികളും കേന്ദ്ര സർക്കാരിനെ വലിയ രീതിയിൽ പ്രതിക്കൂട്ടിലാക്കാൻ പ്രതിപക്ഷത്തിന് പുതിയ ആയുധം നൽകി. വിഷയം രാജ്യശ്രദ്ധയിലേക്ക് കൊണ്ടുവരുന്നതിൽ ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി നേരിട്ട് ഇടപെടുകയുണ്ടായി. കേന്ദ്ര ആഭ്യന്തര മന്ത്രി അമിത് ഷായ്ക്ക് അയച്ച കത്തിലൂടെ അദ്ദേഹം സർക്കാരിനോട് കടുത്ത ചോദ്യങ്ങൾ ഉന്നയിച്ചു. അക്രമമില്ലാതെ പ്രതിഷേധിച്ച വിദ്യാർത്ഥികൾക്ക് നേരെ പെല്ലറ്റ് ഗണ്ണുകൾ ഉൾപ്പെടെയുള്ള മാരകാഭംഗമുള്ള ബലപ്രയോഗങ്ങൾ നടത്താൻ ആഭ്യന്തര മന്ത്രാലയം അനുമതി നൽകിയിരുന്നോ എന്ന് രാഹുൽ ഗാന്ധി വ്യക്തമായി ചോദിക്കുന്നു. അതോടൊപ്പം തന്നെ, പ്രക്ഷോഭകരുടെ ഇടയിലേക്ക് സിവിൽ വേഷത്തിലെത്തി വിദ്യാർത്ഥികളെ ക്രൂരമായി മർദ്ദിച്ച വ്യക്തികൾ യഥാർത്ഥത്തിൽ പൊലീസുകാരാണോ അതോ മറ്റ് ഏതെങ്കിലും സംഘടനകളുടെ ആളുകളാണോ എന്ന് വെളിപ്പെടുത്തണമെന്നും പ്രതിപക്ഷം കർശനമായി ആവശ്യപ്പെടുന്നു. സഭയ്ക്കകത്തും പുറത്തും ആഭ്യന്തര മന്ത്രാലയത്തിനെതിരെ പ്രക്ഷോഭം വ്യാപിപ്പിക്കാനാണ് പ്രതിപക്ഷ കക്ഷികളുടെ തീരുമാനം. പാർലമെന്റ് സമ്മേളനം ആരംഭിച്ച ഘട്ടം മുതൽക്കേ സർക്കാരിനെതിരെയുള്ള ഏറ്റവും മൂർച്ചയേറിയ രണ്ടാമത്തെ ആക്രമണം അയോധ്യ രാമക്ഷേത്ര നിർമ്മാണവുമായി ബന്ധപ്പെട്ട അഴിമതി ആരോപണങ്ങളാണ്. ക്ഷേത്രവുമായി ബന്ധപ്പെട്ട് ഏഴ് കോടി രൂപയുടെ കാണിക്കവഞ്ചി തിരിമറിയും മോഷണങ്ങളും നടന്നുവെന്ന വാർത്തകൾ ഉയർത്തിക്കാട്ടി പ്രതിപക്ഷം സഭയെ  സ്തംഭിപ്പികാനാണ്  ഇന്നും  സാധ്യത. കോൺഗ്രസ്, സമാജ്‌വാദി പാർട്ടി, ആം ആദ്മി പാർട്ടി എന്നീ പ്രമുഖ രാഷ്ട്രീയ കക്ഷികളും ഇടതുപക്ഷ പ്രസ്ഥാനങ്ങളും ഒറ്റക്കെട്ടായാണ് ഈ വിഷയത്തിൽ സർക്കാരിനെതിരെ അണിനിരന്നിരിക്കുന്നത്. അയോധ്യയിലെ അഴിമതിയെക്കുറിച്ച് നിഷ്പക്ഷവും സമഗ്രവുമായ അന്വേഷണം വേണമെന്ന ആവശ്യം അവർ ശക്തമായി മുന്നോട്ടുവെക്കുന്നുന്ദ്. അടുത്ത വർഷം ആദ്യവാരം ഉത്തർപ്രദേശ്, ഉത്തരാഖണ്ഡ് എന്നീ സംസ്ഥാനങ്ങളിൽ നിർണ്ണായകമായ നിയമസഭാ തിരഞ്ഞെടുപ്പുകൾ നടക്കാനിരിക്കെ, രാമക്ഷേത്രവുമായി ബന്ധപ്പെട്ടുയരുന്ന ഇത്തരം സാമ്പത്തിക ക്രമക്കേടുകൾ സഭയിൽ ചർച്ചയാക്കുന്നത് ഹിന്ദു വോട്ടർമാർക്കിടയിൽ പ്രതിഫലിക്കുമെന്നും അത് രാഷ്ട്രീയമായി ഗുണം ചെയ്യുമെന്നും പ്രതിപക്ഷം കണക്കുകൂട്ടുന്നുണ്ട്.

വിദ്യാർത്ഥി പ്രക്ഷോഭവും രാമക്ഷേത്ര അഴിമതിയും മാത്രമല്ല, രാജ്യത്തെ കർഷക സമൂഹത്തെ ബാധിക്കുന്ന വിഷയങ്ങളും ഭരണപക്ഷത്തെ കടുത്ത പ്രതിരോധത്തിലാക്കാൻ പ്രതിപക്ഷം ഉപയോഗിക്കുന്നുണ്ട്. ഇന്ത്യയും അമേരിക്കയും തമ്മിൽ ഒപ്പുവെച്ച പുതിയ വ്യാപാരക്കരാറിലെ കാർഷിക മേഖലയിലെ വിട്ടുവീഴ്ചകൾ ഇന്ത്യൻ കർഷകരുടെ ഭാവി അപകടത്തിലാക്കുമെന്ന ആശങ്കയും സർക്കാരിനെതിരെ കർഷക സംഘടനകൾ നടത്തുന്ന പ്രതിഷേധങ്ങളും പ്രതിപക്ഷം സഭയിൽ സജീവമായി ഉന്നയിക്കുന്നു. ഇതിനോടൊപ്പം തന്നെ കേന്ദ്ര സർക്കാർ പ്രോത്സാഹിപ്പിക്കുന്ന എഥനോൾ ഇന്ധന നയവുമായി ബന്ധപ്പെട്ടുയർന്ന പുതിയ വിവാദങ്ങളും ക്രമക്കേടുകളും കൂടി ഉയർന്നുവന്നതോടെ വിഷയം കൂടുതൽ വശങ്ങളിലേക്ക് പടരുകയാണ്.ചുരുക്കത്തിൽ, വിദ്യാർത്ഥി സമരം, പൊലീസിന്റെ ബലപ്രയോഗം, രാമക്ഷേത്രത്തിലെ അഴിമതി ആരോപണങ്ങൾ, കർഷക പ്രക്ഷോഭം, ഇന്ധന നയത്തിലെ പാളിച്ചകൾ എന്നിങ്ങനെ ഭരണപക്ഷത്തെ പ്രതിരോധത്തിലാക്കാവുന്ന ബഹുവിധ വിഷയങ്ങൾ  പ്രതിപക്ഷം സഭയിൽ ശക്തമായി ഉന്നയിക്കുന്നുണ്ട്. വരും ദിവസങ്ങളിൽ പാർലമെന്റിന്റെ ഇരുസഭകളിലും ഭരണ-പ്രതിപക്ഷാംഗങ്ങൾ തമ്മിൽ അതിരൂക്ഷമായ വാഗ്വാദങ്ങൾക്കും രാഷ്ട്രീയ പോരുകൾക്കുമാണ് വേദിയാകാൻ പോകുന്നത്.