സസ്പെൻഷന് സ്റ്റേയില്ല; എഡിജിപി എം.ആർ. അജിത് കുമാറിന് ട്രിബ്യൂണലിലും തിരിച്ചടി
No Stay on Suspension: Major Setback for ADGP M.R. Ajith Kumar as CAT Rejects Interim Relief
Desk Mediagraamam 
രക്ഷാപ്രവർത്തനക്കേസ് അട്ടിമറിക്കാൻ ശ്രമിച്ച സംഭവത്തിൽ സസ്പെൻഷനിലുള്ള എഡിജിപി എം.ആർ. അജിത് കുമാറിന് സെൻട്രൽ അഡ്മിനിസ്ട്രേറ്റീവ് ട്രിബ്യൂണലിലും (CAT) തിരിച്ചടി. സസ്പെൻഷൻ നടപടികൾ സ്റ്റേ ചെയ്യണമെന്ന അജിത് കുമാറിന്റെ ഹർജി ട്രിബ്യൂണൽ തള്ളി. സർക്കാരിന്റെ ശക്തമായ വാദങ്ങൾ അംഗീകരിച്ചാണ് ട്രിബ്യൂണലിന്റെ ഇടക്കാല ഉത്തരവ്. കേസിൽ മറുപടി നൽകാൻ സർക്കാരിന് നിർദേശം നൽകിയ ട്രിബ്യൂണൽ, ഹർജിയിൽ വിശദമായ വാദം കേൾക്കുന്നതിനായി ഈ മാസം 20-ലേക്ക് മാറ്റി.ഇരകൾക്ക് നീതി ലഭിക്കുന്നത് തടയുന്ന രീതിയിൽ കേസ് അട്ടിമറിച്ച ഉദ്യോഗസ്ഥനാണ് അജിത് കുമാറെന്നും, അതിനാൽ അദ്ദേഹത്തിന് ഡിജിപി പദവിയിലേക്ക് സ്ഥാനക്കയറ്റം ലഭിക്കാൻ യോഗ്യതയില്ലെന്നും സർക്കാർ ട്രിബ്യൂണലിൽ വാദിച്ചു. എന്നാൽ, നടപടിച്ചട്ടങ്ങൾ പാലിക്കാതെയാണ് തന്റെ സസ്പെൻഷനെന്നും കേസിന്റെ അന്വേഷണം നടത്തിയത് തന്റെ കീഴുദ്യോഗസ്ഥനാണെന്നുമായിരുന്നു അജിത് കുമാറിന്റെ വാദം.
ഈ മാസം 31-ന് ഡിജിപി പദവിയിലേക്ക് സ്ഥാനക്കയറ്റം ലഭിക്കാനിരിക്കെയാണ് ആഭ്യന്തര മന്ത്രിയുടെ ശുപാർശ അംഗീകരിച്ച് മുഖ്യമന്ത്രി അജിത് കുമാറിനെ സസ്പെൻഡ് ചെയ്തത്. നടപടി വൈകുന്നതിനെതിരെ വ്യാപക വിമർശനമുയർന്നതിന് പിന്നാലെയായിരുന്നു സർക്കാരിന്റെ നീക്കം. സസ്പെൻഷൻ സ്റ്റേ ചെയ്യാൻ ട്രിബ്യൂണൽ തയ്യാറാകാത്തതോടെ അജിത് കുമാറിന്റെ ഡിജിപി പ്രൊമോഷൻ സാധ്യതകൾ അനിശ്ചിതത്വത്തിലായി.
