ചിത്രം വ്യക്തമാകുന്നു: ഖാർഗെയും ശശി തരൂരും കെ എൻ ത്രിപാഠിയും പത്രിക നൽകി
കോൺഗ്രസ് അധ്യക്ഷസ്ഥാനത്തേക്ക് ശശി തരൂരും മല്ലികാർജുൻ ഖാർഗെയും ജാര്‍ഖണ്ഡിൽ നിന്നുള്ള കോണ്‍ഗ്രസ് നേതാവ് കെ.എൻ.ത്രിപാഠിയും നാമനിർദേശ പത്രിക നൽകി. മധുസൂദൻ മിസ്ത്രി അധ്യക്ഷനായ കോൺഗ്രസ് തെരഞ്ഞെടുപ്പ് കമ്മിറ്റി മുമ്പാകെ വാദ്യമേളങ്ങളുടെ അകമ്പടിയോടെയാണ് എഐസിസി ആസ്ഥാനത്ത് എത്തി തരൂർ പത്രിക സമർപ്പിച്ചത്. പത്രികാസമർപ്പണ വേളയിൽ ജി-23 നേതാക്കൾ അടക്കം പാർട്ടിയുടെ ദേശീയ നേതാക്കൾ സന്നിഹിതരായിരുന്നു.മുദ്രാവാക്യങ്ങളുടെ അകമ്പടിയോടെ ഓഫീസിനുള്ളിൽ പ്രവേശിച്ച തരൂർ നാല് സെറ്റ് പത്രിക സമർപ്പിച്ചതായാണ് വിവരം.
ഹൈക്കമാന്‍ഡ് പിന്തുണയുള്ള സ്ഥാനാര്‍ഥിയായ മല്ലികാർജുൻ ഖാര്‍ഗെ മുതിർന്ന നേതാക്കൾക്കൊപ്പമെത്തിയാണ് പത്രിക സമർപ്പിച്ചത്. ഖാര്‍ഗെയെ പിന്തുണയ്ക്കുമെന്ന് മുതിര്‍ന്ന നേതാക്കളായ മുകുള്‍ വാസ്‌നിക്, ദിഗ് വിജയ് സിംഗ്, അശോക് ഗെഹ്‌ലോട്ട് എന്നിവർ അറിയിച്ചു.
