ഓൺ‌ലൈൻ ഷോപ്പിങ് കെണികൾ പെരുകുന്നു: 5 വർഷത്തിനിടെ 20 ലക്ഷത്തോളം പരാതികൾ; ഫ്ലിപ്‌കാർട്ടും ആമസോണും മുൻപന്തിയിൽ

രാജ്യത്ത് ഇ-കൊമേഴ്സ് പ്ലാറ്റ്‌ഫോമുകൾ വഴിയുള്ള വ്യാപാരം കുതിച്ചുയരുമ്പോഴും ഉപഭോക്തൃ പരാതികളുടെ എണ്ണത്തിൽ വൻ വർധനവ്. കഴിഞ്ഞ അഞ്ച് വർഷത്തിനിടെ നാഷണൽ കൺസ്യൂമർ ഹെൽപ്പ് ലൈനിൽ (NCH) ഇ-കൊമേഴ്സ് കമ്പനികൾക്കെതിരെ ലഭിച്ചത് 20 ലക്ഷത്തോളം പരാതികളാണെന്ന് കേന്ദ്ര സർക്കാർ ലോകസഭയെ അറിയിച്ചു.

2021-ൽ 2.24 ലക്ഷമായിരുന്ന പരാതികളുടെ എണ്ണം 2025 ആയപ്പോഴേക്കും ഇരട്ടിയിലധികമായി വർധിച്ച് 5.11 ലക്ഷത്തിലെത്തി. കേന്ദ്ര ഉപഭോക്തൃകാര്യ സഹമന്ത്രി ബി.എൽ. വർമയാണ് പാർലമെന്റിൽ കണക്കുകൾ വ്യക്തമാക്കിയത്.

പരാതികളിൽ മുന്നിൽ ഫ്ലിപ്‌കാർട്ട്

ലഭിച്ച പരാതികളുടെ പട്ടികയിൽ മുൻനിരയിലുള്ളത് പ്രമുഖ ഇ-കൊമേഴ്സ് ഭീമന്മാരാണ്.

ഫ്ലിപ്‌കാർട്ട് (Flipkart): 1.33 ലക്ഷം പരാതികൾ

ആമസോൺ (Amazon): 91,248

മീഷോ (Meesho): 29,284

മിന്ത്ര (Myntra): 25,384

നെറ്റ്‌മെഡ്‌സ് (Netmeds): 19,895

ഇവയ്ക്ക് പുറമെ ക്വിക് കൊമേഴ്സ്, ഫാഷൻ പ്ലാറ്റ്‌ഫോമുകളായ സെപ്റ്റോ (5,774), ബ്ലിങ്കിറ്റ് (5,102), നാപ്‌ടോൾ (4,079), വി.എൽ.ഇ ബസാർ (3,907), നൈക (3,405) എന്നിവയ്‌ക്കെതിരെയും വ്യാപകമായി പരാതികൾ രജിസ്റ്റർ ചെയ്തിട്ടുണ്ട്.

പ്രധാന പ്രശ്നങ്ങൾ ഇവയാണ്

2025-ൽ ലഭിച്ച പരാതികളിൽ ഭൂരിഭാഗവും (79,818 കേസുകൾ) ഓർഡർ ചെയ്ത ഉൽപ്പന്നങ്ങൾ കൃത്യസമയത്ത് ഡെലിവറി ചെയ്യാത്തതുമായി ബന്ധപ്പെട്ടതാണ്. കൂടാതെ:

ഓർഡർ ചെയ്തതിന് പകരം തെറ്റായ സാധനങ്ങൾ അയക്കുക.

കേടുപാടുകൾ സംഭവിച്ച ഉൽപ്പന്നങ്ങൾ വിതരണം ചെയ്യുക.

കമ്പനി പോളിസി അനുസരിച്ചുള്ള റീഫണ്ടോ റീപ്ലേസ്‌മെന്റോ നിഷേധിക്കുക.

വ്യാജ ഉൽപ്പന്നങ്ങളുടെ വിൽപ്പനയും അനുമതിയില്ലാതെ അക്കൗണ്ടിൽ നിന്ന് പണം ഈടാക്കലും.

ശക്തമായ നടപടിയുമായി അതോറിറ്റി

നിയമലംഘനം നടത്തിയ 47 ഇ-കൊമേഴ്സ് പ്ലാറ്റ്‌ഫോമുകൾക്കായി സെൻട്രൽ കൺസ്യൂമർ പ്രൊട്ടക്ഷൻ അതോറിറ്റി (CCPA) ആകെ 1,12,01,500 രൂപ പിഴ ചുമത്തി.

കൂടാതെ, എൻ.സി.എച്ച് ഇടപെടലിലൂടെ 2025 ഏപ്രിൽ 25 മുതൽ 2026 ജൂൺ 30 വരെയുള്ള കാലയളവിൽ ഉപഭോക്താക്കൾക്കായി 91 കോടിയോളം രൂപ തിരികെ ലഭ്യമാക്കിയിട്ടുണ്ട്. ഇതിൽ 63 കോടി രൂപയിലധികം തുകയും ഇ-കൊമേഴ്സ് മേഖലയിലെ പരാതികൾ പരിഹരിച്ചതിലൂടെ ലഭിച്ച റീഫണ്ടാണ്. 2025-ൽ ക്വിക് കൊമേഴ്സുമായി ബന്ധപ്പെട്ട് ലഭിച്ച 5.11 ലക്ഷം പരാതികളും പൂർണ്ണമായും പരിഹരിച്ചതായി മന്ത്രി കൂട്ടിചേർത്തു.