എവിടുത്തെ ഡോക്ടറാ?? മമ്മൂട്ടിയുടെ ചോദ്യത്തില്‍ ഞെട്ടി ഡോക്ടറും നേതാക്കളും
വോട്ട് തേടി മമ്മൂട്ടിയുടെ വീട്ടിലെത്തിയ സ്ഥാനാര്‍ത്ഥിയോട് താരം ആദ്യം തിരക്കിയത്..
കൊച്ചി: തൃക്കാക്കരയിലെ എല്‍ഡിഎഫ് സ്ഥാനാര്‍ത്ഥിയെ അവതരിപ്പിച്ചുകൊണ്ട് വാര്‍ത്തസമ്മേളനം നടത്തിയ സിപിഎം നേതാക്കള്‍ ആവര്‍ത്തിച്ച കാര്യമാണ് ഡോ. ജേ ജോസഫ് മണ്ഡലത്തിന് സുപരിചിതനാണെന്നും ജോയെ അറിയാത്തവരായി ആരുമില്ലെന്നും. എന്നാല്‍ ഇടതുപക്ഷ സഹയാത്രികനായ സൂപ്പര്‍താരം മമ്മൂട്ടിക്ക് സ്ഥാനാര്‍ത്ഥിയെ വല്ല്യ പരിചയമില്ല. വോട്ട് തേടി മമ്മൂട്ടിയുടെ വീട്ടിലെത്തിയ സ്ഥാനാര്‍ത്ഥിയോട് താരം ആദ്യം തിരക്കിയത് എറണാകുളത്ത് ഏത് ആശുപത്രിയിലാണ് ജോലി ചെയ്യുന്നതെന്നായിരുന്നു. കൊച്ചി മേയര്‍ അഡ്വ. എം അനില്‍കുമാര്‍ അടക്കമുള്ളവരുടെ സാനിധ്യത്തിലായിരുന്നു മമ്മൂട്ടി സ്ഥാനാര്‍ത്ഥിയുടെ വിവരങ്ങള്‍ ആരാഞ്ഞത്. ലിസി ആശുപത്രിയിലെ ഡോക്ടറാണ് താനെന്ന് ബോധ്യപ്പെടുത്തിയ ജോ ജോസഫ് വ്യക്തി വിവരങ്ങളും മമ്മൂട്ടിയുമായി പങ്കുവച്ചു. ഇടതുപക്ഷ സഹയാത്രികനാണെന്നും പാര്‍ട്ടിയിലെ എല്ലാവരുമായി ബന്ധമുണ്ടെന്നുമുള്ള ഇടത് നേതാക്കളുടെ വെളിപ്പെടുത്തലുകള്‍ വെറും പൊള്ളയാണെന്ന് തെളിഞ്ഞുകഴിഞ്ഞു. മമ്മൂട്ടിയുടെ ചോദ്യവും ഡോക്ടറുടെ മറുപടിയുമെല്ലാം അടങ്ങിയ ദൃശ്യങ്ങള്‍ സോഷ്യല്‍ മീഡിയയില്‍ വൈറലായി ഓടുന്നുണ്ട്.
