ഭാരത് ജോഡോ യാത്ര ഇന്ന് ഹൈദരാബാദിൽ എത്തും; മല്ലികാർജുൻ ഖാർഗെ ജാഥയിൽ പങ്കെടുക്കും
ഇന്ന് വൈകിട്ട് ഹൈദരാബാദിലെത്തുന്ന ഭാരത് ജോഡോ യാത്രയ്ക്ക് ആവേശോജ്വല വരവേല്പ് ലഭിക്കും. ഒപ്പം നടക്കാൻ കോൺഗ്രസ് അധ്യക്ഷൻ മല്ലികാർജുൻ ഖാർഗെ എത്തുന്നതോ‌ടെ പതിനായിരങ്ങൾ ഇന്നത്തെ പദയാത്രയിൽ പങ്കാളികാളാകും. രാവിലെ ആറരയ്ക്ക് ഷംഷാബാദിൽ നിന്നു തുടങ്ങിയ ജാഥ വൈകുന്നേരം ഹൈദരാബാദിലെത്തും. അതിനു തൊട്ടു മുൻപാവും മല്ലികാർജുൻ ഖാർഗെ ജാഥയിൽ പങ്കെടുക്കുക. ഇന്നുച്ച കഴിഞ്ഞ് ഖാർഗെ ഹൈദരാബാദ് വിമാനത്താവളത്തിലെത്തും.
കഴിഞ്ഞ മാസം 16ന് ഖാർഗെ ജാഥയുടെ ഭാഗമായിരുന്നു. കർണാടകത്തിലെ ബെല്ലാരിയിലായിരുന്നു രാഹുൽ ഗാന്ധിയുടെ സംഘത്തിൽ ചേർന്നത്. അന്ന് ബെല്ലാരിയിൽ ചേർന്ന പൊതു സമ്മേളനത്തിലും അദ്ദേഹം പങ്കെടുത്തു.
ഇന്നു വൈകുന്നേരം ആറരയ്ക്ക് ഹൈദരാബാദ് ചാർമിനാറിനു സമീപം തയാറാക്കിയിട്ടുള്ള പ്രത്യേക വേദിയിൽ രാഹുൽ ഗാന്ധിക്കൊപ്പം മല്ലികാർജുൻ ഖാർഗെ ജനങ്ങളെ അഭിസംബോധന ചെയ്യും. മുൻ പ്രധാനമന്ത്രി രാജീവ് ഗാന്ധി നയിച്ച സദ്ഭാവനാ യാത്രയുടെ സ്ഥലത്തു തന്നെയാണ് ഇന്നത്തെ പൊതു സമ്മേളനത്തിനും വേദിയൊരുക്കുന്നതെന്ന പ്രത്യേകതയുണ്ട്. ഇവിടെത്തന്നെയാകും പാർട്ടി പ്രസിഡന്റ് മല്ലികാർജുൻ ഖാർഗെ പതാക ഉയർത്തുന്നത്. പദയാത്രയും പൊതു സമ്മേളനവും വിജയിപ്പിക്കാൻ തെലുങ്കാനയിലെ മുഴുവൻ ജനങ്ങളുടെയും പിന്തുച്ചണയുണ്ടെന്നു മുതിർന്ന നേതാവ് വി. ഹനുമന്ത റാവു പറഞ്ഞു.
ഭാരത് ജോഡോ യാത്രയിലൂടെ രാഹുൽ ഗാന്ധി ഇന്ത്യയുടെ മതേതര പാരമ്പര്യത്തിന്റെ വക്താവായി മാറിയെന്ന് ഹനുമന്ത റാവു ചൂണ്ടിക്കാട്ടി. പകയുടെയും വെറുപ്പിന്റെയും വിഭാഗീയതയുടെയും സ്വരങ്ങൾക്കിടയിൽ ദേശീയത മുറുകെപ്പിടിച്ചു കൊണ്ടുള്ള മതേതര ഐക്യമാണ് രാജ്യത്തു രൂപപ്പെട്ടു വരുന്നതെന്നും റാവു വ്യക്തമാക്കി.
