പോപ്പുലർ ഫ്രണ്ട് ബന്ധം: ആന്ധ്രയിലും തെലുങ്കാനയിലും എൻഐഎ റെയ്ഡ്
തീവ്രവാദബന്ധം ആരോപിച്ച് പോപ്പുലർ ഫ്രണ്ട് പ്രവർത്തകരെ അറസ്റ്റ് ചെയ്ത കേസിന്‍റെ തുടരന്വേഷണത്തിന്‍റെ ഭാഗമായി ആന്ധ്രപ്രദേശിലും തെലുങ്കാനയിലും എൻഐഎ റെയ്ഡ് നടത്തി. 38 സ്ഥലങ്ങളിലായി നടന്ന റെയ്ഡിനൊടുവിൽ നാല് പോപ്പുലർ ഫ്രണ്ട് പ്രവർത്തകരെ ചോദ്യംചെയ്യലിനായി എന്‍ഐഎ കസ്റ്റഡിയിലെടുത്തു.
ജൂലൈ ആറിന് തീവ്രവാദക്കേസിൽ പിടിയിലായ അബ്ദുൾ ഖാദറിന്‍റെയും കൂട്ടാളികളുടെയും വസതികളിലും ഓഫീസിലുമാണ് റെയ്ഡ് നടന്നത്. തെലുങ്കാനയിലെ ഹൈദരാബാദ്, നിസാമാബാദ്, ജഗിതാൽ, ആദിലാബാദ്, കരീംനഗർ എന്നിവടങ്ങളിലും ആന്ധ്രയിലെ കർണൂൽ, നെല്ലൂർ മേഖലയിലുമാണ് റെയ്ഡ് നടന്നത്.
റെയ്ഡിൽ 8.31 ലക്ഷം രൂപയും ഇലക്ട്രോണിക് തെളിവുകൾ, രേഖകൾ, കഠാരകൾ എന്നിവയും പിടിച്ചെടുത്തതായി അന്വേഷണസംഘം അറിയിച്ചു. കസ്റ്റഡിയിലെടുത്തവരുടെ വിവരങ്ങൾ പുറത്തുവിട്ടിട്ടില്ല.
