വൈഭവ് സൂര്യവംശിക്ക് വെടിക്കെട്ട് അർധസെഞ്ചുറി; ആദ്യ ട്വന്റി 20യിൽ സിംബാബ്വെയ്ക്കെതിരെ ഇന്ത്യക്ക് ഏഴ് വിക്കറ്റ് വിജയം
First T20 Win for Captain Shreyas Iyer as India Dominate Zimbabwe with 40 Balls to Spare
Desk Mediagraamam 
ഹരാരെ: 19 പന്തിൽ അർധസെഞ്ചുറി നേടി വൈഭവ് സൂര്യവംശി നയിച്ച വെടിക്കെട്ട് ബാറ്റിംഗിന്റെ കരുത്തിൽ സിംബാബ്വെയ്ക്കെതിരായ ആദ്യ ട്വന്റി-20യിൽ ഇന്ത്യക്ക് ഏഴ് വിക്കറ്റിന്റെ ആധികാരിക വിജയം. സിംബാബ്വെ ഉയർത്തിയ 126 റൺസ് ലക്ഷ്യം 40 പന്തുകൾ ശേഷിക്കെ മൂന്ന് വിക്കറ്റ് മാത്രം നഷ്ടത്തിൽ ഇന്ത്യ മറികടന്നു. വിജയത്തോടെ ട്വന്റി-20 ക്യാപ്റ്റനായ ശേഷമുള്ള തന്റെ ആദ്യ ജയം സ്വന്തമാക്കാനും ശ്രേയസ് അയ്യർക്കായി.
ഇന്ത്യൻ മറുപടി ബാറ്റിംഗിൽ നാല് ഫോറും നാല് സിക്സും സഹിതമാണ് വൈഭവ് 50 റൺസ് അടിച്ചുകൂട്ടിയത്. തുടക്കത്തിൽ 23 റൺസെടുക്കുന്നതിനിടെ ഓപ്പണർ അഭിഷേക് ശർമയെ (8 പന്തിൽ 1) ഇന്ത്യക്ക് നഷ്ടമായെങ്കിലും, തുടർന്നെത്തിയ വൈഭവ് സൂര്യവംശി ഇഷാൻ കിഷനൊപ്പം ചേർന്ന് ഇന്ത്യയെ തകർപ്പൻ സ്കോറിലേക്ക് നയിച്ചു. ഇരുവരും ചേർന്ന് 45 റൺസാണ് കൂട്ടിച്ചേർത്തത്. അർധ സെഞ്ചുറി പൂർത്തിയാക്കിയ ഉടൻ വൈഭവിനെ റിച്ചാർഡ് പുറത്താക്കുകയായിരുന്നു.
പിന്നീട് ഒത്തുചേർന്ന ഇഷാൻ കിഷനും ശ്രേയസ് അയ്യരും ചേർന്ന് സ്കോർ ബോർഡിലേക്ക് 46 റൺസ് കൂടി കൂട്ടിച്ചേർത്തു. 24 പന്തിൽ 35 റൺസെടുത്ത ഇഷാനെ ബ്ലെസ്സിങ് പുറത്താക്കി. തുടർന്ന് ശ്രേയസ് അയ്യരും (24 പന്തിൽ 28*) തിലക് വർമയും (5 പന്തിൽ 6*) ചേർന്ന് ഇന്ത്യയെ വിജയതീരത്തെത്തിച്ചു.
നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ആതിഥേയരായ സിംബാബ്വെ നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ 125 റൺസാണ് നേടിയത്. രണ്ട് വിക്കറ്റ് വീതം വീഴ്ത്തിയ മായങ്ക് യാദവും പ്രിൻസ് യാദവുമാണ് സിംബാബ്വെയെ ചെറിയ സ്കോറിലൊതുക്കിയത്. ശിവം ദുബെ, രവി ബിഷ്ണോയ് എന്നിവർ ഓരോ വിക്കറ്റ് വീതവും വീഴ്ത്തി. 39 റൺസെടുത്ത വെസ്ലിയാണ് സിംബാബ്വെയുടെ ടോപ് സ്കോറർ.
മത്സരത്തിലെ ആദ്യ പന്തിൽ തന്നെ മായങ്ക് യാദവിന്റെ പന്തിൽ ബ്രയാൻ ബെന്നറ്റിനെ പുറത്താക്കി ഇന്ത്യ കളിയിൽ ആധിപത്യം ഉറപ്പിച്ചിരുന്നു.
