32 വർഷമായി ഗാന്ധികുടുംബത്തിലെ ആരും മന്ത്രി പോലുമായില്ല; മോദി ഭയക്കുന്നതെന്തിന്?

കഴിഞ്ഞ 32 വർഷത്തിനിടെ ഗാന്ധി കുടുംബത്തിൽനിന്ന് ആരും പ്രധാനമന്ത്രിയോ കേന്ദ്രമന്ത്രിയോ മുഖ്യമന്ത്രിയോ ആയിട്ടില്ലെന്നിരിക്കെ, ഗാന്ധി കുടുംബത്തെ പ്രധാനമന്ത്രി നരേന്ദ്ര മോദി ഇത്രയ്ക്ക് ഭയക്കുന്നത് എന്തിനെന്ന്  അശോക് ഗെലോട്ട് ചോദിച്ചു. കോൺഗ്രസിനുള്ളിലെ കുടുംബാധിപത്യത്തെക്കുറിച്ച് പ്രധാനമന്ത്രി തുടർച്ചയായി വിമർശനമുയർത്തുന്ന സാഹചര്യത്തിലാണ് ഗെലോട്ടിന്റെ ചോദ്യം. എന്തുകൊണ്ടാണ് എല്ലാവരും എപ്പോഴും കോണ്‍ഗ്രസിനെ ആക്രമിക്കുന്നതെന്നും ഗെലോട്ട് ചോദിച്ചു.

സെപ്റ്റംബർ 20ന് പുതിയ കോൺഗ്രസ് പ്രസിഡന്റിനെ തിരഞ്ഞെടുക്കാനിരിക്കെ, പാർട്ടി പ്രവർത്തകരുടെ താൽപര്യം മനസ്സിലാക്കി പ്രസിഡന്റ് സ്ഥാനം ഏറ്റെടുക്കാൻ രാഹുൽ ഗാന്ധി തയാറാകണമെന്നും ഗെലോട്ട് ആവശ്യപ്പെട്ടു. ‘‘രാഹുൽ പാർട്ടി പ്രസിഡന്റ് പദം ഏറ്റെടുക്കാൻ വിസമ്മതിച്ചാൽ, അത് രാജ്യത്തെ കോൺഗ്രസ് പ്രവർത്തകർക്ക് കനത്ത നിരാശ സമ്മാനിക്കുമെന്ന് തീർച്ചയാണ്. ഒട്ടേറെ ആളുകൾ വീടുകളിൽ ഒതുങ്ങിക്കൂടും. അതിന്റെ നഷ്ടം പാർട്ടിക്കായിരിക്കും. അതുകൊണ്ട് രാഹുൽതന്നെ സ്വന്തം ഇഷ്ടപ്രകാരം പ്രസിഡന്റ് പദം ഏറ്റെടുക്കണം’’ – ഗെലോട്ട് ആവശ്യപ്പെട്ടു.