വോട്ടുകുറഞ്ഞാല്‍ ഉത്തരവാദിത്വം ഏറ്റെടുക്കുമോ? ചോദ്യത്തിന് സതീശന്റെ മറുപടിയിങ്ങനെ
തൃക്കാക്കര ഉപതെരഞ്ഞെടുപ്പില്‍ യുഡിഎഫിന് ജയം ഉറപ്പെന്ന് പ്രതിപക്ഷ നേതാവ് വി ഡി സതീശന്‍. വോട്ട് കുറയുന്ന സാഹചര്യമുണ്ടായാല്‍ അതിന്റെ ഉത്തരവാദിത്തം ഏറ്റെടുക്കുമോ എന്ന ചോദ്യത്തിന് ഏറ്റെടുക്കുമെന്നും പൂര്‍ണ ഉത്തരവാദിത്വം തനിക്ക് മാത്രമാണെന്നും അദേഹം പറഞ്ഞു. കള്ളവോട്ട് ചെയ്യുന്നത് മുഴുവന്‍ സിപിഐഎം ആണെന്ന് പകല്‍ പോലെ വ്യക്തമായിട്ടുള്ള കാര്യമാണ് എന്നും അദ്ദേഹം മാധ്യമങ്ങളോട് പ്രതികരിച്ചു. 'കള്ളവോട്ട് ചെയ്യുന്നത് മുഴുവന്‍ സിപിഐഎം ആണെന്ന് പകല്‍ പോലെ വ്യക്തമായിട്ടുള്ള കാര്യമാണ്. അവര്‍ ജാഗരൂകരാവട്ടെ. ഞങ്ങള്‍ പറയുന്നത് ഒരെണ്ണം പോലും ചെയ്യിക്കില്ല എന്നതാണ്. പൂര്‍ണമായ ഡോക്യുമെന്റുകളോടെ കൊടുത്ത 7000 ഓളം അപേക്ഷകളില്‍ 3000ഓളമാണ് ചേര്‍ത്തത്. അത് സിപിഐഎം ചെയ്തതാണ്. അതിനുള്ള പണി കൂടി ഞങ്ങള്‍ ചെയ്തിട്ടുണ്ട്. മുന്‍പ് തൃക്കാക്കരയിലെ രണ്ട് തെരഞ്ഞെടുപ്പുകളില്‍ ഉണ്ടായതിനെക്കാള്‍ കൂടിയ പോളിംഗ് ശതമാനം ഉണ്ടാവുമെന്ന് പ്രതീക്ഷിക്കുന്നു. കാലാവസ്ഥ മോശമായതിനാല്‍ അതിനെ അതിജീവിക്കുന്നതിനായുള്ള മുന്നൊരുക്കം നടത്തിയിട്ടുണ്ട്. യുഡിഎഫിനു വോട്ട് വര്‍ധിക്കും. വോട്ട് കുറയുന്ന സാഹചര്യമുണ്ടായാല്‍ അതിന്റെ ഉത്തരവാദിത്തം എനിക്കാണ്. വലിയ ഭൂരിപക്ഷത്തോടെ ജയിച്ചാല്‍ അത് കൂട്ടായ്മയുടെ വിജയമാണ്.' വി ഡി സതീശന്‍ പറഞ്ഞു.
