ഇന്ത്യക്ക് 'ഇരട്ടപ്രഹരം': വനിത ടി 20 ലോകകപ്പിൽ ഓസീസിനോട് തോറ്റ് ഇന്ത്യ പുറത്ത്; അയർലൻഡിനെതിരെ പരമ്പര നഷ്ടപ്പെടുത്തി പുരുഷടീമും
Twin blows for India as the women's team loses to Australia, while the men's team concedes the T20I series 2-0 to Ireland
Desk Mediagraamam 
ലോർഡ്സ്/ബെൽഫാസ്റ്റ്: ഇന്ത്യൻ ക്രിക്കറ്റ് ആരാധകർക്ക് കനത്ത ആഘാതം സമ്മാനിച്ച് ഒരേ ദിവസം പുരുഷ-വനിതാ ടീമുകൾക്ക് തോൽവി. ലണ്ടനിലെ ലോർഡ്സിൽ നടന്ന വനിതാ ടി20 ലോകകപ്പിലെ നിർണായക ആദ്യ റൗണ്ട് പോരാട്ടത്തിൽ ഇന്ത്യ ഓസ്ട്രേലിയയോട് പരാജയപ്പെട്ട് പുറത്തായപ്പോൾ, ബെൽഫാസ്റ്റിൽ നടന്ന രണ്ടാം ടി20യിൽ ഐറിഷ് പടയോട് ഒരുറണ്ണിന് തോറ്റ് ഇന്ത്യൻ പുരുഷ ടീം പരമ്പരയും കൈവിട്ടു (2-0).
ലോർഡ്സിൽ പൊരുതി വീണ് വനിതകൾ; സെമിയിൽ ഓസീസ് vs വെസ്റ്റ് വിൻഡീസ്.: ഇംഗ്ലണ്ട് vs ദക്ഷിണാഫ്രിക്ക
വനിതാ ടി20 ലോകകപ്പിലെ ഗ്രൂപ്പ് എയിലെ നിർണായക മത്സരത്തിൽ കരുത്തരായ ഓസ്ട്രേലിയയോട് 6 വിക്കറ്റിന് പരാജയപ്പെട്ട ഇന്ത്യൻ വനിതകൾ സെമി കാണാതെ പുറത്ത്. ടോസ് നേടി ആദ്യം ബാറ്റ് ചെയ്ത ഇന്ത്യ, ക്യാപ്റ്റൻ ഹർമൻപ്രീത് കൗറിന്റെ (56) തകർപ്പൻ അർധസെഞ്ചുറിയുടെയും സ്മൃതി മന്ദാന (38), ഷഫാലി വർമ്മ (34) എന്നിവരുടെ പ്രകടനത്തിന്റെയും കരുത്തിൽ 20 ഓവറിൽ 4 വിക്കറ്റ് നഷ്ടത്തിൽ 170 റൺസെന്ന താരതമ്യേന മികച്ച സ്കോർ പടുത്തുയർത്തിയിരുന്നു.
എന്നാൽ മറുപടി ബാറ്റിങ്ങിന് ഇറങ്ങിയ ഓസ്ട്രേലിയ, എലീസ് പെറിയുടെ (56) അർധസെഞ്ചുറിയുടെയും ആഷ്ലി ഗാർഡ്നറുടെ (53) വെടിക്കെട്ട് ബാറ്റിങ്ങിന്റെയും പിൻബലത്തിൽ 19 ഓവറിൽ 4 വിക്കറ്റ് മാത്രം നഷ്ടപ്പെടുത്തി ലക്ഷ്യം കണ്ടു (172/4).
ചരിത്രനേട്ടം: പരമ്പര അയർലൻഡിന്
രണ്ടാം ടി20 മത്സരത്തിൽ ഇന്ത്യയെ ഒരു റണ്ണിന് അട്ടിമറിച്ച് അയർലൻഡ് ചരിത്ര നേട്ടം കുറിച്ച് പരമ്പര സ്വന്തമാക്കി.
രണ്ട് മത്സരങ്ങളടങ്ങിയ പരമ്പരയിൽ രണ്ടാം മത്സരത്തിലും ടി20 ലോകചാമ്പ്യന്മാരെ അയർലൻഡ് കെട്ടുകെട്ടിച്ചു. അയർലൻഡ് ഉയർത്തിയ 155 റൺസ് വിജയലക്ഷ്യം പിന്തുടർന്ന ഇന്ത്യക്ക് നിശ്ചിത 20 ഓവറിൽ ഒൻപത് വിക്കറ്റ് നഷ്ടത്തിൽ 153 റൺസെടുക്കാനേ സാധിച്ചുള്ളൂ. അയർലൻഡ് ആദ്യമായാണ് ഇന്ത്യയെ തോൽപ്പിക്കുന്നതും പരമ്പര നേടുന്നതും.
ടോസ് നേടിയ ഇന്ത്യ അയർലൻഡിനെ ബാറ്റിങ്ങിനയക്കുകയായിരുന്നു. ഹാരി ടെക്ടറുടെ (53) ബാറ്റിങ് മികവിലാണ് അയർലൻഡ് 20 ഓവറിൽ 8 വിക്കറ്റിന് 154 റൺസെടുത്തത്. ഇന്ത്യക്കായി അരങ്ങേറ്റം കുറിച്ച പ്രിൻസ് യാദവ് 3 വിക്കറ്റ് വീഴ്ത്തി തിളങ്ങി.
155 റൺസ് വിജയലക്ഷ്യവുമായി മറുപടി ബാറ്റിങ്ങിന് ഇറങ്ങിയ ഇന്ത്യക്ക് തുടക്കത്തിലേ പ്രഹരമേറ്റു. കഴിഞ്ഞ മത്സരത്തിൽ 5 റൺസിന് പുറത്തായ മലയാളി താരം സഞ്ജു സാംസൺ ഈ മത്സരത്തിൽ റണ്ണൊന്നുമെടുക്കാതെ (0) പുറത്തായി. തിലക് വർമ്മ (55) അർധസെഞ്ചുറിയോടെ ഇന്ത്യയെ വിജയത്തിനടുത്തെത്തിച്ചെങ്കിലും അവസാന ഓവറിലെ കടുത്ത സമ്മർദം അതിജീവിക്കാൻ ഇന്ത്യൻ ബാറ്റിങ്ങ് നിരക്കായില്ല. 3 വിക്കറ്റ് വീഴ്ത്തിയ മാറ്റ് ഹോളാർഡാണ് ഇന്ത്യയെ തകർത്തത്. ആദ്യ മത്സരത്തിൽ 34 റൺസിന് ജയിച്ച അയർലൻഡ് ഇതോടെ രണ്ട് മത്സരങ്ങളുടെ പരമ്പര 2-0 ന് സ്വന്തമാക്കി ചരിത്രം കുറിച്ചു.
