ഓപ്പറേഷൻ തൂഫാൻ: മൂന്നിലധികം ലഹരി കേസുകളുള്ള പ്രതികളുടെ സ്വത്ത് കണ്ടുകെട്ടും; എക്സൈസും പൊലീസും സംയുക്തമായി പട്ടിക തയാറാക്കുന്നു.
രാഷ്ട്രീയക്കാരും സിനിമാക്കാരും ഉദ്യോഗസ്ഥരും ഉൾപ്പെടെ ലഹരിമാഫിയയെ സഹായിക്കുന്ന പോലീസുകാർക്കെതിരെയും മുഖം നോക്കാതെ കടുത്ത നടപടി.
Desk Mediagraamam 
ലഹരിമാഫിയക്കെതിരെ കടുത്ത നടപടികളുമായി സംസ്ഥാന എക്സൈസ്-പോലീസ് വകുപ്പുകൾ സംയുക്തമായി രംഗത്തിറങ്ങുന്നു. മൂന്നിലധികം ലഹരി കേസുകളിൽ ഉൾപ്പെട്ടിട്ടുള്ള സ്ഥിരം കുറ്റവാളികളുടെ സ്വത്തുക്കൾ കണ്ടുകെട്ടാനാണ് അധികൃതരുടെ തീരുമാനം. ഇതിനായി ജില്ലാ അടിസ്ഥാനത്തിൽ ലഹരിക്കടത്തുകാരുടെ കൃത്യമായ പട്ടിക തയ്യാറാക്കി വരികയാണ്. ലഹരി ബിസിനസിലൂടെ നിയമവിരുദ്ധമായി സമ്പാദിക്കുന്ന സ്വത്തുക്കൾ കണ്ടുകെട്ടുന്നതിലൂടെ ഇത്തരം സംഘങ്ങളുടെ സാമ്പത്തിക സ്രോതസ്സ് പൂർണ്ണമായും തകർക്കുകയാണ് ഈ കർശന നീക്കത്തിലൂടെ ലക്ഷ്യമിടുന്നത്.
സ്വാധീനമുള്ള വമ്പന്മാരായാലും ഈ നിയമത്തിന് മുന്നിൽ ആരും രക്ഷപ്പെടില്ലെന്ന് അധികൃതർ വ്യക്തമാക്കിയിട്ടുണ്ട്. രാഷ്ട്രീയക്കാർ, സിനിമാ മേഖലയിലുള്ളവർ, ഉദ്യോഗസ്ഥർ എന്നിവർക്ക് പുറമെ ലഹരി മാഫിയയെ സഹായിക്കുന്ന പോലീസുകാർ ഉൾപ്പെടെയുള്ളവർക്കെതിരെ മുഖം നോക്കാതെ നടപടിയുണ്ടാകും. പ്രഖ്യാപനങ്ങളിൽ ഒതുങ്ങാതെ, യാതൊരുവിധ വിട്ടുവീഴ്ചയുമില്ലാതെ ഈ തീരുമാനം പ്രായോഗിക തലത്തിൽ നടപ്പിലാക്കാനാണ് എക്സൈസിന്റെയും പോലീസിന്റെയും സംയുക്ത നീക്കം.
